ନୂଆଦିଲ୍ଲୀ,୨୭। ୩: କରୋନା ପ୍ରଭାବକୁ କମ୍ କରିବା ଲାଗି ସରକାର ଏବେ ସାରା ଦେଶରେ କଟକଣା ଲାଗୁ କରୁଛନ୍ତି। ଏହି ସମୟରେ କିଛି ବଛାବଛା ବ୍ୟାଙ୍କ ଶାଖା ଲୋକଙ୍କୁ ବ୍ୟାଙ୍ଗିଙ୍ଗ ସେବା ପ୍ରଦାନ କରୁଛି। ଅତି ଆବଶ୍ୟକ ନ ହେଲେ ବ୍ୟାଙ୍କ ନ ଆସିବାକୁ ଲୋକଙ୍କୁ କୁହାଯାଇଛି। ଅନଲାଇନ କାରବାର ଉପରେ ଫୋକସ କରିବାକୁ ଲୋକଙ୍କୁ ପରାମର୍ଶ ରହିଛି। ସାରା ଦେଶରେ କାମ କରୁଥିବା ବ୍ୟାଙ୍କ କର୍ମଚାରୀମାନେ କରୋନା ଭୂତାଣୁ ସଂକ୍ରମଣର ଶିକାର ହେବା ନେଇ ଆଶଙ୍କା ରହିଛି। ବର୍ତ୍ତମାନ ବ୍ୟାଙ୍କ ଶାଖାଗୁଡିକୁ ସମ୍ପୂର୍ଣ୍ଣ ବନ୍ଦ କରିବା ଲାଗି କେନ୍ଦ୍ରୀୟ ବ୍ୟାଙ୍କ ଏବଂ ପ୍ରମୁଖ ବ୍ୟାଙ୍କଗୁଡିକ ବିଚାର କରୁଥିବା ପ୍ରକ୍ରିୟା ସହ ଜଡିତ ୪ଜଣ ଉଚ୍ଚ ଅଧିକାରୀ କହିଛନ୍ତି।
ଦେଶର ଅଧିକାଂଶ ଲୋକ ଏବେ ମଧ୍ୟ ନଗଦ ଉପରେ ନିର୍ଭର କରୁଛନ୍ତି। ସାରା ଦେଶରେ ୨୧ ଦିନିଆ ଲକ୍ଡାଉନ କରାଯାଇଥିବା ବେଳେ ବ୍ୟାଙ୍କ ଜରୁରୀ ସେବା ମଧ୍ୟରେ ରହିଥିବାରୁ ଶାଖାଗୁଡିକୁ ବନ୍ଦ କରାଯାଇନାହିଁ। ପ୍ରମୁଖ ସହରଗୁଡିକରେ କେବଳ ୫ କିମି ମଧ୍ୟରେ ଗୋଟିଏ ବ୍ୟାଙ୍କ ଶାଖା ଖୋଲା ରଖିବା ନେଇ ମଧ୍ୟ ବିଚାର କରାଯାଉଛି। ଏ ନେଇ ସରକାର ଏବେ ଯାଏ ବିଧିବଦ୍ଧ ଭାବେ କିଛି ସ୍ପଷ୍ଟ କରି ନ ଥିବା ଅଧିକାରୀ କହିଛନ୍ତି। ଦେଶର ୭୦% ଲୋକ ନଗଦ ଉପରେ ନିର୍ଭର କରୁଛନ୍ତି। ଅତି ଜରୁରୀ ସେବା ପାଇଁ ନିର୍ଦ୍ଧିଷ୍ଟ ଦିନ ଏବଂ କର୍ମଚାରୀଙ୍କୁ କମ୍ ରଖିବା ନେଇ ମଧ୍ୟ ବିଚାର କରାଯାଉଥିବା ଅନ୍ୟ ଜଣେ ଅଧିକାରୀ କହିଛନ୍ତି। ଗ୍ରାମାଞ୍ଚଳର ଲୋକମାନେ ଡିଜିଟାଲ ନେଣଦେଣ ସହିତ ସକ୍ରିୟ ଭାବେ ଜଡିତ ନ ଥିବା ଯୋଗୁ ଏନେଇ ଗାଇଡଲାଇନ ଆସିପାରେ ବୋଲି ଶୁଣାଯାଉଛି। ସରକାର ଏହି ସମୟରେ ବ୍ୟାଙ୍କ ଖାତାରେ ସିଧାସଳଖ ଅର୍ଥ ପ୍ରଦାନ କରିବାକୁ ଥିବା ବେଳେ ଏ ନେଇ ଶାଖାରେ ଭିଡ ଲାଗିବ। ଏଭଳି ସ୍ଥିତିକୁ ନିୟନ୍ତ୍ରଣ କରିବା ଲାଗି ବ୍ୟାଙ୍କଗୁଡିକ ସେମାନଙ୍କ ସ୍ତରରେ ପ୍ରସ୍ତୁତି କରୁଥିବା କୁହାଯାଇଛି।
