ନୂଆଦିଲ୍ଲୀ: କରୋନା ପାଇଁ ଏବେ ସମସ୍ତେ ସାମାଜିକ ଦୂରତା ଅବଲମ୍ବନ କରିବା ଉପରେ ଗୁରୁତ୍ୱ ଦେଉଛନ୍ତି। ତେବେ ସାମାଜିକ ଦୂରତା ରକ୍ଷା କରିବା ପାଇଁ ବେଳେବେଳେ କେତେଜଣ ଏଭଳି ଉପାୟ ଅବଲମ୍ବନ କରିଥାନ୍ତି, ଯେଉଁଥିପାଇଁ ସବୁଆଡ଼େ ଚର୍ଚ୍ଚାର କାରଣ ପାଲଟିଥାନ୍ତି। ଏଭଳି ଏକ ଉଦାହରଣ ଦେଖିବାକୁ ମିଳିଛି ଦିଲ୍ଲୀରେ। ସମସ୍ତଙ୍କ ଘର ଘର ବୁଲି କ୍ଷୀର ଦେବା ପାଇଁ ଜଣେ ବ୍ୟକ୍ତି ଏଭଳି ଏକ ଉପାୟ ବ୍ୟବସ୍ଥା କରିଛନ୍ତି, ଯାହାଫଳରେ କାହାକୁ ହେଲେ ବି ଛୁଇଁବାକୁ ପଡ଼ିବ ନାହିଁ କି ପାଖକୁ ଆସିବାକୁ ପଡ଼ିବ ନାହିଁ। ସାମାଜିକ ଦୂରତା ରକ୍ଷା କରିବା ସହ ସେ ସମସ୍ତଙ୍କ ପାଖରେ କ୍ଷୀର ପହଞ୍ଚାଇ ପାରିବେ।
ଏହି କ୍ଷୀର ବିକାଳି ତାଙ୍କ ବାଇକ୍ରେ ଏକ ପାଇପ୍ ଲଗାଇ ତା’ ସହିତ ଏକ କାହାଳୀ ସଂଯୁକ୍ତ କରି ଦେଇଛନ୍ତି। ତେଣୁ ଆବଶ୍ୟକ ଅନୁସାରେ କ୍ଷୀର ଦେବାପାଇଁ ସେ କାହାଳୀରେ ଢାଳିବା ମାତ୍ରେ ତାହା ପାଇପ୍ ଦେଇ କିଛି ଦୂରରେ ବାହାରି ଥାଏ। ତେଣୁ ସେଠାରୁ ସହଜରେ କ୍ଷୀର ସଂଗ୍ରହ କରି ଲୋକମାନେ ନେଇଥାନ୍ତି। ଏଭଳି ବ୍ୟବସ୍ଥା ସହିତ କ୍ଷୀର ବିକାଳି ମାସ୍କ ଓ ଗ୍ଲୋଭ୍ସ ବି ପିନ୍ଧିଛନ୍ତି। ସାମାଜିକ ଦୂରତ୍ୱ ନିମନ୍ତେ କ୍ଷୀର ବିକାଳିଙ୍କ ଏଭଳି ଏକ ଟେକ୍ନିକ୍ ସମସ୍ତଙ୍କୁ ଭଲ ଲାଗୁଛି ଓ ଏଭଳି ସତର୍କତା ନିମନ୍ତେ ସମସ୍ତେ ତାଙ୍କୁ ପ୍ରଶଂସା ବି କରୁଛନ୍ତି। ଏଭଳି ଏକ ଶୈଳୀରେ କ୍ଷୀର ବିକୁଥିବା ବ୍ୟକ୍ତିଙ୍କ ଫଟୋ ଓ ଭିଡିଓକୁ ସୋସିଆଲ୍ ମିଡିଆରେ ଶେୟାର କରିଛନ୍ତି ଆଇଏଏସ୍ ଅଫିସର ନୀତିନ୍ ସଙ୍ଗୱାନ୍। ଏହି ଫଟୋଟି ସୋସିଆଲ୍ ମିଡିଆରେ ପୋଷ୍ଟ ହେବାର ମାତ୍ର ଦିନକ ପରେ ଶହ ଶହ ଲୋକ ଲାଇକ୍ ସହ ପ୍ରଶଂସା କରିଛନ୍ତି। ଆଇଏଏସ୍ ଅଫିସର ଜଣକ ମଧ୍ୟ ଏଭଳି ଚିନ୍ତାଧାରାକୁ ପ୍ରଶଂସା କରିଛନ୍ତି।
