ସୋନପୁର,୧୦ା୮(ନି.ପ୍ର):
ସୁବର୍ଣ୍ଣପୁର ଜିଲା ସଦର ବ୍ଲକ ରେଙ୍ଗାଲି ପଁଚେତ୍ ଅଧୀନ ବିଶାଲପାଲି ଗଁାର ବିପିନ ମହାକୁର(୪୬)। ୨ ବଛର ହେଲା ସେ ପକ୍ଷାଘାତ ରୋଗ୍ରେ ପୀଡ଼ିତ ହେଇ ସେ ଭିନ୍ନକ୍ଷମ ପାଲଟି ଯାଇଛନ୍। ତାକର ୨ ହାତ୍ଗୋଡ଼ କାମ୍ ନାଇଁ କରବାର। ଇଆଡ଼େ ଅଭାବ ଅନାଟନ ଲାଗି ସେ ଉଚ ଚିକିଛା ବି କରେଇ ନାଇଁପାରବାର। ତାକର ମାଏକିନା ସୁରେଖାକଁର ଅଭିଯୋଗ ଅନ୍ସାରେ ବିପିନକୁଁ ଆଏଜ୍ତକ ଭିନ୍ନକ୍ଷମ ଭତା ଆର ପ୍ରଧାନମନ୍ତ୍ରୀ ଆବାସ ଯୋଜନାରେ ଘରଖଁଡ଼େ ନାଇଁ ମିଲିପାରି। ବିଭାଗୀୟ ଅଧ୍କାରୀକଁରନେ ଆବେଦନ କରି ସେ ନିରାଶ ହେଇଛନ୍। ଇ ଦମ୍ପତିକଁର ୨ ଝି’ ଆର ଗୁଟେ ପୁଓ ଅଛନ୍। ହେଲେ ଟଁକା ପଏସା ଅଭାବୁ ବଡ଼ଖା ଝି’ ସୁଜାତା ମାଟ୍ରିକ୍ ପାସ୍ କଲା ଉତାରୁ ପାଠ୍ପଢ଼ାରେ ଗଏଁଠ୍ ପକେଇଛନ୍। ପରିବାରର ଜମିବାଡ଼ି ବଲି କିଛି ମୂଲରୁ ସୁଖ୍ବାସୀ ଆନ୍। ସହାଯ୍ ଆଶ୍ରେ ବିପିନକୁଁ ଧରି ପରିବାର ଲୋକ୍ ଜିଲାପାଲ ମୋନିଷା ବାନାର୍ଜୀକଁୁ ଗୁହାରି କରବାକେ ଆସିଥିଲେ। ଜିଲାପାଲ ସୋନପୁର ବିଡିଓକୁଁ ଇ ଦିଗେ ପଦକ୍ଷେପ ନେବାକେ ନିରଦେଶ ଦେଇଛନ୍। ଏନ୍ତାଥି ପରିବାର ଲୋକ୍ ବି ସରକାରୀ ସାହାଯ୍ ମିଲବା ବଲି ଆଶ୍ କରି ରହିଛନ୍।
