ବଲାଙ୍ଗୀର ଅଫିସ, ୨୨ା୧ – ସର୍ବଭାରତୀୟ ବହୁଭାଷୀ ନାଟକ ଉତ୍ସବ ମଠଖାଇ ମହୋତ୍ସବର ତୃତୀୟ ସନ୍ଧ୍ୟା ସଭାରେ ମୁଖ୍ୟଅତିଥି ଭାବେ ଯୋଗଦେଇ ରାଜ୍ୟ ପୂର୍ତ୍ତ, ଖଣି ଓ ଇସ୍ପାତ ବିଭାଗ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ ନାଟକ ମାଧ୍ୟମରେ ଭାଇଚାରା ପ୍ରତିଷ୍ଠା ସମ୍ଭବ ବୋଲି କହିଥିଲେ ା ମଠଖାଇ ମହୋତ୍ସବ ମାଧ୍ୟମରେ ଆମ ସମାଜରେ ସାଂସ୍କୃତିକ ଓ ସାମାଜିକ ଆନ୍ଦୋଳନ ହେଉଛି ଓ ଏହାଦ୍ୱାରା ଆମେ ସମସ୍ତେ ଲାଭବାନ୍ ହେଉଛୁଁ ବୋଲି କହିଥିଲେ। ଏଭଳି କାର୍ଯ୍ୟକ୍ରମ ପାଇଁ ସେ ଏବଂ ତାଙ୍କ ବିଭାଗ ଆଗକୁ ମଧ୍ୟ ସମର୍ଥନ ଓ ସହଯୋଗ ଜାରି ରଖିବେ ବୋଲି କହିଥିଲେ ା ମହୋତ୍ସବ କମିଟି ଅଧ୍ୟକ୍ଷ ବିଧାୟକ ନରସିଂହ ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ମୁଖ୍ୟଅତିଥି ମନ୍ତ୍ରୀ ମଲ୍ଲିକଙ୍କ ସହ ଆନ୍ତର୍ଜାତିକ ଖ୍ୟାତିସମ୍ପନ୍ନ କ୍ରୀଡାବିତ୍ ଆନନ୍ଦିନୀ ଦର୍ଜୀ ଅତିଥିଭାବେ ମଞ୍ଚାସୀନ ଥିଲେ ା ଅତିଥି ଦର୍ଜୀ ତାଙ୍କ ଅଭିଭାଷଣରେ ମଠଖାଇ ମହୋତ୍ସବ ସାଂସ୍କୃତିକ ଚେତନା ଜାଗ୍ରତ କରୁଛି ବୋଲି କହିଥିଲେ ା ସଭାପତୀୟ ଅଭିଭାଷଣରେ ବିଧାୟକ ମିଶ୍ର ମଠଖାଇ ମହୋତ୍ସବର ଲକ୍ଷ୍ୟ ଓ ଉଦ୍ଦେଶ୍ୟ ସମ୍ପର୍କରେ କହିବାକୁ ଯାଇ ନାଟକ, କଳା ଓ ସାଂସ୍କତି ଜରିଆରେ ସମାଜରେ ଭାଇଚାରା ପ୍ରତିଷ୍ଠା ଓ ବଲାଙ୍ଗୀରର ଉନ୍ନତି ହିଁ ଲକ୍ଷ୍ୟ ବୋଲି କହିଥିଲେ ା ଏଥିରେ ଓଡିଶା ସରକାରଙ୍କ ବିଭିନ୍ନ ବିଭାଗର ମନ୍ତ୍ରୀଙ୍କ ସହଯୋଗ ଓ ବଲାଙ୍ଗୀରବାସୀଙ୍କ ସମର୍ଥନକୁ ପ୍ରଶଂସା କରିଥିଲେ ା ଏହି ଅବସରରେ ଗିନିଜ୍ ବୁକ୍ ରେକର୍ଡ ଅଧିକାରୀ ଅମନ୍ ଛତ୍ରିଆଙ୍କୁ ଅତିଥିମାନେ ମଠଖାଇ ସମ୍ମାନରେ ସମ୍ମାନିତ କରିଥିଲେ ା ଏହା ସହିତ କୋଶଲୀ ଚଳଚ୍ଚିତ୍ର ଝରନ୍ର କଳାକାରମାନଙ୍କୁ ମଞ୍ଚରେ ସମ୍ମାନିତ କରାଯାଇଥିଲା ା ସଭା ପ୍ରାରମ୍ଭରେ ବଲାଙ୍ଗୀର ଢ଼ୋଲ ମୁହୁରୀ ଅନୁଷ୍ଠାନ ତରଫରୁ ବଜନିଆ ନୃତ୍ୟ ପରିବେଷଣ କରାଯାଇଥିଲା ା ମଠଖାଇ ମହୋତ୍ସବର ତୃତୀୟ ଦିନ ମଞ୍ଚକୁ ଦିବଙ୍ଗତ ଯୁବ କଳାକାର ତଥା ଭୂମିକା ସଦସ୍ୟ ମନୋଜ ମିଶ୍ରଙ୍କ ଉଦ୍ଦେଶ୍ୟରେ ଉତ୍ସର୍ଗ କରାଯାଇଥିଲା ା ତୃତୀୟ ଦିନର ସଭାକୁ ଅଖିଳ ହୋତା ପରିଚାଳନା କରିଥିଲେ ା ପୂର୍ବାହ୍ନରେ କୋଶଳ କଳାମଣ୍ଡଳ ପୁରୁଣା ମଞ୍ଚରେ ଏନ୍ଏସ୍ଡିଏନ୍ ରାମଚନ୍ଦ୍ର ସାହୁ ହାଇସ୍କୁଲ ଓ କଲେଜ ଛାତ୍ରୀଛାତ୍ରଙ୍କୁ ପ୍ରଦର୍ଶନ ଭିତ୍ତିକ ବକ୍ତୃତା ଦେଇ ମଞ୍ଚ ନାଟକ ସମ୍ପର୍କରେ ଆଲୋଚନା କରିଥିଲେ ା
