ନୂଆଦିଲ୍ଲୀ,୩୦।୫: ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ପୂର୍ବତନ କୋଷାଧ୍ୟକ୍ଷ ଅନିରୁଦ୍ଧ ଚୌଧୁରୀ ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ସମର୍ଥନରେ ବାହାରିଛନ୍ତି। ଧୋନୀଙ୍କ ପାଖରେ ଏବେବି ବହୁତ କ୍ରିକେଟ ବାକି ରହିଛି ବୋଲ ସେ କହିଛନ୍ତି। କ୍ରିକେଟ ନେଇ ତାଙ୍କ ଚିନ୍ତାଧାରା ଉଚ୍ଚକୋଟୀର। ଧୋନୀ ଏବେବି ଫିଟ୍ ଅଛନ୍ତି। ସେ ଭାରତର ଶ୍ରେଷ୍ଠ ଉଇକେଟକିପର ମଧ୍ୟ। ପଡିଆରେ ବିଭିନ୍ନ ପ୍ରକାର ପରିସ୍ଥିତିରେ ସେ ଠିକ୍ ନିଷ୍ପତ୍ତି ନେବାର ବେଶ୍ ଧୁରନ୍ଧର। ତେଣୁ ତାଙ୍କ କ୍ୟାରିୟର ଏବେ ଶେଷ ହୋଇଛି ଭାବିବା ଠିକ୍ ହେବ ନାହିଁ ବୋଲି ସେ କହିଛନ୍ତି।
ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆୟୋଜନ ହେବା ଉଚିତ୍। ଏହା ଆର୍ଥିକ ଦୃଷ୍ଟିକୋଣରୁ ଓ ଘରୋଇ କ୍ରିକେଟରଙ୍କ ପାଇଁ ବିଶେଷ ଭାବେ ଗୁରୁତ୍ୱ ବହନ କରେ। ଆଇପିଏଲ୍ ନେଇ ଗଭର୍ନିଂ କାଉନସିଲ୍ ନିଷ୍ପତ୍ତି ନେବ। ତେବେ ଆଇପିଏଲ୍ ପାଇଁ ଉପଯୁକ୍ତ ପରିବେଶ ଓ ପରିସ୍ଥିତି ଆବଶ୍ୟକ ବୋଲି ସେ କହିଛନ୍ତି। ଚଳିତ ବର୍ଷ ଆଇପିଏଲର ୧୩ତମ ଗତ ମାର୍ଚ୍ଚ ୨୯ ତାରିଖରୁ ଆରମ୍ଭ ହେବା କାର୍ଯ୍ୟକ୍ରମ ଥିଲା। କୋଭିଡ୍-୧୯ କାରଣରୁ ଏହା ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରହିଛି। ଯୁବ ମହିଳା ବ୍ୟାଟ୍ସମ୍ୟାନ ଶେଫାଳୀ ବର୍ମାଙ୍କୁ ସେ ପ୍ରଶଂସା କରିଛନ୍ତି। ୧୬ବର୍ଷୀୟ ଶେଫାଳୀଙ୍କ ଭବିଷ୍ୟତ ଉଜ୍ଜ୍ୱଳ। ଭାରତରେ ଶେଫାଳୀ କ୍ରିକେଟ ବିପ୍ଳବ ଆଣିବେ ବୋଲି ଅନିରୁଦ୍ଧ କହିଛନ୍ତି।
