ଲୋଇସିଂହା,୧୬।୯(ଡି.ଏନ୍.ଏ.)- ବଲାଙ୍ଗୀର ଜିଲା ଲୋଇସିଂହା ବ୍ଲକ ଯୋଗୀସର୍ଡା ଗାଁର ଦୁଖି ପଧାନ(୪୫)। ଟଁକା ପଏସା ଅଭାବୁ ମାଏକିନାର ପଥରୀ ରୋଗ୍ର ଚିକିଛା କରେଇ ନାଇଁପାରବାର। ଏନ୍ତାଥି ଫେର ଲଗେତ୍ ବରଷା ତାକର ପାରିବାରିକ୍ ଜୀବନକେ ଦୁହୁଲେଇ ଦେଇଛେ। ବରଷାରେ ତାକର ଘରଟା ଭାଂଗି ଯାଇଛେ। ଇଥ୍ରେ ତାକର ୫ ବଛର୍ର ପୁଓର ଗୋଡ଼ ଭାଂଗି ଯାଇଛେ। ଗୁଟେ ପରେ ଗୁଟେ ବିପଦ୍ ପରିବାରର ପିଛା ନାଇଁଛାଡ଼ବାର। ହେଲେ ଦୁଖର କଥା ଏବ୍ତକ ଇ ପରିବାରଟା ସରକାରୀ ସାହାଯ୍ରୁ ବଁଚିତ୍ ହେଇ ରହିଛନ୍।
ସୂଚନା ଅନ୍ସାରେ ଲୋଇସିଂହା ବ୍ଲକ ଯୋଗୀସର୍ଡ଼ା ପଁଚେତ୍ ସଦର ଗଁାର ସ୍ବର୍ଗତ ବିରଞ୍ଚତ୍ ପଧାନ, ମା’ ବେଦ ପଧାନକଁର ୫ ପୁଓ ଭିତରୁ ଦୁଖି ସମକିରନୁ ସାନ। ଏହେଦେ ଦୁଖିକଁର ପରିବାର କହେଲେ ମାଏକିନା ଭାରତୀ, ଝି’ ଶ୍ରାବଣୀ(୮), ପୁଓ ସାହିଲ(୫)କେ ନେଇ ତାକର ସଁସାର। ଗଁାର ଜଗନ୍ନାଥ ଗୁଡ଼ି ପାସେ ତାକର ଘର ରହିଛେ। କୁଲିମଜୁରି କରି ଦୁଖି ୪ ପରାନୀ କୁଟୁମ ପୁଷୁଛନ୍। ହେଲେ ବଛ୍ରେ ତଲେ ମାଏକିନା ଭାରତୀର ପେଟ ବଥେଇଥିଲା। ଡାକ୍ତରୀ ଚିକିଛା ଉତାରୁ ସେ ପଥରୀ ରୋଗ୍ରେ ପୀଡ଼ିତ ଥିବାର ଜନାପଡ଼ିଥିଲା। ଲାଗ୍ବରମସ୍ କରି ଭାରତୀକଁର ଅପରେଶନ କରବାର ଯୋଜନା କରିଥିଲେ। ହେଲେ ଗଲା ଅଗଷ୍ଟ ୧୨, ୧୩ ତାରିଖରେ ହେଇଥିବାର ବରଷା ତାକର ସବୁ ଭାବନାକେ ଉଲଟପାଲଟ କରିଦେଲା। ୧୩ ତାରିଖ ସଖାଲେ ପୁଓ ବାରନ୍ଡାରେ ଶୌଚ ହେଲାବେଲେ ହଠାତ୍ ଘରଟା ଭୁଷ୍ଲି ଯାଇଥିଲା। ଘରର ଗୁଟେ ଉରା ଛିଟ୍କି ସାହିଲର ଡେବ୍ରି ଗୁଡ଼େ ବାଜିଥିଲା। ଇଥ୍ରେ ସାହିଲକଁର ଡେବ୍ରି ଗୋଡ଼ ଭାଂଗି ଯାଇଛେ। ବଲାଙ୍ଗୀର ଭୀମଭୋଇ ମେଡିକାଲରେ ତାହାକୁ ଚିକିଛା କରି ଏଭେ ଘରକେ ଆନିଛନ୍। ଇଆଡ଼େ ବରଷାରେ ଘରଟା ଭାଂଗି ଯିବାର ଲାଗି ପରିବାରଟା ବାସହରା ହେଇଯାଇଛନ୍। ଏନ୍ତାଥି କୁଟୁମବସିଆ ଗଁାରେ ଝନ୍କର ଘରେ ଭଡ଼ାରେ ରହୁଛନ୍। ଅଲପ୍ ରୁଜଗାରରେ ମାଏକିନା ଆର ପୁଓର ଚିକିଛା ଖରଚ୍ ତୁଲାବାର ଦୁଖିର ପକ୍ଷେ ସମ୍ଭବ ନୁହେ। ଇଆଡ଼େ ମାସ୍ ପୂରଲେ ଘରଭଡ଼ା ଦେବାକେ ପଡ଼ୁଛେ, ଯେନ୍ଟା ବୋଝ୍ ଉପରେ ଲଲିତା ବିଡା ସାଜୋ ହେଇଛେ। ଘର ଭାଂଗ୍ଲା ଉତାରୁ ତହସିଲ ତରଫୁ ସରକାରୀ ସାହାଯ୍ ହିସାବେ ପଲିଥିନ୍ ଖଁଡ଼େ ପାଇଥିବାର ଦୁଖି କହିଛନ୍। ଜିଲା ପରଶାସନ ଇ ଦୁଖି ପରିବାର ଉପରେ ଦୁରୁଷ୍ଟି ଦେଇ ଚିକିଛା ସାହାଯ୍ ସଂଗେ ଆବାସ ଯୋଜନାରେ ଘର ଖଁଡ଼େ ଯୁଗେଇ ଦେବାକେ ଗଁାବାସୀ ଦାବି କରିଛନ୍।
