ଦିନକ ପରେ ଦୀପାବଳି: ବ୍ୟବସାୟୀଙ୍କୁ ମିଳିଲାନି ଲାଇସେନ୍ସ, ବାଣ ବଜାର ଖୋଲିବା ନେଇ ଅନିଶ୍ଚିତତା
7:52 amOctober 26, 2019October 26, 2019 / 21

ବ୍ରହ୍ମପୁର ଅଫିସ,୨୬ା୧୦-ଦିନକ ପରେ ରବିବାର ପବିତ୍ର ଦୀପାବଳି। ଦକ୍ଷିଣ ଓଡ଼ିଶାର ଏକମାତ୍ର ବୃହତମ ବାଲୁଙ୍କେଶ୍ୱର ବାଣ ବଜାର ଏ ଯାଏ ଖୋଲିନାହିଁ। ଶୁକ୍ରବାର ସନ୍ଧ୍ୟା ସୁଦ୍ଧା ବାଲୁଙ୍କେଶ୍ୱର ବ୍ୟବସାୟୀଙ୍କୁ ଜିଲା ପ୍ରଶାସନ ତରଫରୁ ବାଣ ବିକ୍ରି ପାଇଁ ଲାଇସେନ୍ସ ମିଳିନି। ତେଣୁ ବାଣ ବଜାର ଖୋଲିବ କି ନାହିଁ ଅନିଶ୍ଚିତତା ମଧ୍ୟରେ ରହିଛି। ଅନ୍ୟପଟେ ବାଲୁଙ୍କେଶ୍ୱର ବାଣ ବଜାର ବ୍ୟତୀତ ସହରରେ ଅନ୍ୟ କେଉଁଠି ବାଣ ବିକ୍ରୟ ହୋଇପାରିବ ନାହିଁ ବୋଲି ଗତବର୍ଷଠାରୁ ଜିଲା ପ୍ରଶାସନ କଡା ନିର୍ଦ୍ଦେଶ ଜାରି କରିଛି। ଏଥିଯୋଗୁ ଚଳିତ ବର୍ଷ ସହରରେ ବାଣ ଫୁଟିବା ଦେଖିବାକୁ ମିଳିବ ନାହିଁ ବୋଲି ଚର୍ଚ୍ଚା ହେଉଛି। ବିନା ଲାଇସେନ୍ସରେ ବେଆଇନ ଭାବେ ବାଲୁଙ୍କେଶ୍ୱର ବାଣ ବଜାରରେ ବ୍ୟବସାୟୀମାନେ ବାଣ ମହଜୁଦ ରଖିବା ସହ ବିକ୍ରୟ କରୁଥିବା ପୋଲିସ ନିକଟରେ ଅଭିଯୋଗ ହୋଇଥିଲା। ଗୋଷାଣିନୂଆଗାଁ ପୋଲିସ ବାଣ ବଜାରକୁ ଗତ ସୋମବାର ନିଜ ହେପାଜତକୁ ନେବା ସହ ଦୋକାନୀଙ୍କୁ ହାଜର ପାଇଁ ନୋଟିସ ଜାରି କରିଥିଲା। ବାଣବଜାରରେ ବ୍ୟବସାୟୀ ମାନେ ହାଜର ନ ହେବାରୁ ମାଜିଷ୍ଟ୍ରେଟଙ୍କ ଉପସ୍ଥିତିରେ ପୋଲିସ ଗୋଟିଏ ପରେ ଗୋଟିଏ ଏପରି ୪୭ଟି ଦୋକାନ ତାଲା ଭାଙ୍ଗି ସେଠାରେ ଥିବା ବାଣ ଯାଞ୍ଚ କରିଥିଲା। ପରେ ସେହି ଦୋକାନଗୁଡିକୁ ସିଲ କରିଦେଇଥିଲା। ଏ ନେଇ ୧୧୦/୧୯ରେ ୪୯ ବ୍ୟବସାୟୀଙ୍କ ନାମରେ ଏକ ମାମଲା ରୁଜୁ କରିଥିଲା। ଅନ୍ୟପଟେ ବ୍ୟବସାୟମାନେ ନ୍ୟାୟ ପାଇଁ ଏସଡ଼ିଜେଏମ କୋର୍ଟରେ ଆବେଦନ କରିଥିଲେ। ଏସଡ଼ିଜେଏମ ଶୁକ୍ରବାର ଏହାର ଶୁଣାଣି କରି ଗୋଷାଣିନୁଆଗାଁ ଥାନାଧିକାରୀଙ୍କୁ ରିପୋର୍ଟ ଦେବାକୁ ନିର୍ଦ୍ଦେଶ ଦେଇଥିବା ଥାନାଧିକାରୀ ସୁମିତ କୁମାର ସୋରେନ କହିଛନ୍ତି। ବାଲୁଙ୍କେଶ୍ୱର ବଜାରରେ ୪୯ ବ୍ୟବସାୟୀ ବାଣ ବେପାର କରୁଥିବା ବେଳେ ସେମାନଙ୍କ ମଧ୍ୟରୁ ୪୦ ଜଣଙ୍କୁ ଶୁକ୍ରବାର ଯାଏ ବାଣ ବିକ୍ରି ପାଇଁ ଲାଇସେନ୍ସ ମିଳିନାହିଁ ବୋଲି ପୋଲିସ କହିଛି। ବାଣ ବଜାର ସିଲ୍‌ କରାଯାଇଥିବା ବେଳେ ଏବେ ସେଠାରେ ଦୁଇ ସେକ୍ସନ ଫୋର୍ସ ମୁତୟନ ହୋଇଥିବା ଥାନାଧିକାରୀ ସୋରେନ କହିଛନ୍ତି । ଏନେଇ ବାଣବଜାର କମିଟି ସଭାପତି ରିଙ୍କୁ ଗୌଡ଼ କୁହନ୍ତି ବ୍ୟବସାୟୀ ସଂଘ ଜିଲାପାଳଙ୍କ ଠାରୁ ବାଣ ବିକ୍ରୟ ଲାଇସେନ୍ସ ପାଇବା ପାଇଁ ଆଶା ରଖିଥିଲା। ଜିଲା ପ୍ରଶାସନ ତରଫରୁ ଲାଇସେନ୍ସ ମିଳି ନ ଥିବା ସେ କହିଛନ୍ତି ।