ଏଥର ଦଶହରା ବଜାରରେ ଦୁଇଟି ସିନେମା-‘ମିଷ୍ଟର ମଜ୍ନୁ’ ଏବଂ ‘ଦିସ୍ ଇଜ୍ ମାୟାରେ ବାୟା’ ରିଲିଜ୍ ହେବାକୁ ଯାଉଛି। ଅର୍ଥାତ୍ ଚଳିତବର୍ଷ ଏହି ଦୁଇ ସିନେମା ଦଶହରା ଲଢ଼େଇରେ ସାମିଲ ହୋଇଛନ୍ତି। ତରଙ୍ଗ ସିନେ ପ୍ରଡକ୍ସନ ବ୍ୟାନର ତଥା ଜାଗୀ ମଙ୍ଗତ ପଣ୍ଡାଙ୍କ ପ୍ରଯୋଜନାରେ ପ୍ରସ୍ତୁତ ହୋଇଛି ‘ମିଷ୍ଟର ମଜ୍ନୁ’। ଫିଲ୍ମଟି ଚଳିତ ମାସ ୪ରେ ପରଦା ଉପରକୁ ଆସୁଛି। ଫିଲ୍ମର ନିର୍ଦ୍ଦେଶନା ଭାର ଅଶୋକ ପତି ସମ୍ଭାଳିଥିବା ବେଳେ ଟାଇଟଲ ଭୂମିକାରେ ଅଭିନୟ କରିଛନ୍ତି ବାବୁସାନ୍। ଏହା ପୂର୍ବରୁ ଅବଶ୍ୟ ଅଶୋକ-ବାବୁସାନ୍ ଯୋଡ଼ିକୁ ନେଇ ନିର୍ମିତ କେତେକ ଫିଲ୍ମ ଦର୍ଶକଙ୍କ ମନ ଜିଣିବାରେ ସକ୍ଷମ ହୋଇଛି। ତାଙ୍କ ଅପୋଜିଟ୍ରେ ଅଛନ୍ତି ତିନିଜଣ ନାୟିକା-ଶୀତଲ, ଦିବ୍ୟା ଏବଂ ସୂର୍ଯ୍ୟମୟୀ। ଅଭିଜିତ୍ ମଜୁମ୍ଦାରଙ୍କ ସ୍ବର ସଂଯୋଜନାରେ ସଂଯୋଜିତ ଗୀତଗୁଡ଼ିକ ମଧ୍ୟରୁ ‘ଉଠିଗଲା ଧାରା ୩୭୦’ ଭାଇରାଲ ହୋଇସାରିଲାଣି। ଅନ୍ୟପକ୍ଷରେ ସିଦ୍ଧାର୍ଥ ମ୍ୟୁଜିକ୍ ବ୍ୟାନରରେ ପ୍ରସ୍ତୁତ ହୋଇଛି ‘ଦିସ୍ ଇଜ୍ ମାୟାରେ ବାୟା’। ସୀତାରାମ ଅଗ୍ରଓ୍ବାଲଙ୍କ ପ୍ରଯୋଜିତ ଏହି ଫିଲ୍ମଟିର ନିର୍ଦ୍ଦେଶନା ଦେଇଛନ୍ତି ସୁଶାନ୍ତ ମଣି। ଡ. ନିର୍ମଳ ନାୟକ ଗୀତ ଏବଂ ସଂଳାପ ରଚନା କରିଥିବା ବେଳେ ଗୀତଗୁଡ଼ିକୁ ସ୍ବର ଦେଇଛନ୍ତି ବୈଦ୍ୟନାଥ ଦାଶ। ଏହି ଚିତ୍ରର ‘ଆଜିଠାରୁ ତୁ ମୋର, ତୁ ହୋଇଯା ଗୋଟେ ସ୍ମାର୍ଟ ଫୋନ୍ ଏବଂ ଫାଷ୍ଟ ଟାଇମ୍ କାହିଁ ଫିଲ୍ ହେଲା’ ଗୀତ ଚର୍ଚ୍ଚାରେ ରହିଛି। ଏହାର ମେଲ୍ ଲିଡ୍ରେ ସ୍ବରାଜ ଅଭିନୟ କରିଥିବା ବେଳେ ତାଙ୍କ ସହ ପ୍ରଥମ ଥର ପାଇଁ ସ୍କ୍ରିନ୍ ଶେୟାର କରିଛନ୍ତି ଏଲିନା ସାମନ୍ତରାୟ। ଅନ୍ୟପକ୍ଷରେ ସିଦ୍ଧାନ୍ତ ମହାପାତ୍ର ଏବଂ ଝିଲିକଙ୍କୁ ଗୁରୁତ୍ୱପୂର୍ଣ୍ଣ ଭୂମିକାରେ ଦେଖିବାକୁ ମିଳିବ। ତେବେ ଏଥର ଦଶହରା ବଜାରରେ କେଉଁ ଫିଲ୍ମ ବାଜି ମାରୁଛି, ତାହା ରିଲିଜ୍ ପରେ ହିଁ ଜଣାପଡ଼ିବ।
