ଏରସମା,୧ା୮(ସ୍ବ.ପ୍ର.): ଏରସମା ବ୍ଲକ ସଦରମହକୁମାସ୍ଥିତ ଡ୍ରେନ ଗୁଡ଼ିକ ଦୀର୍ଘ ଦିନ ହେବା ସଫା କରାଯାଉ ନାହିଁ। ଫଳରେ ତାହା ବର୍ତ୍ତମାନ ଏଡିସ୍ ମଶାଙ୍କ ଆବାସସ୍ଥଳୀ ପାଲଟିଛି। ଏଥିସହିତ ବର୍ଷାଜଳ ପ୍ରବାହିତ ହେବାରେ ବାଧା ସୃଷ୍ଟି ହୋଇଛି। କିନ୍ତୁ ଏଥିପ୍ରତି ପ୍ରଶାସନର ଦୃଷ୍ଟି ପଡ଼ୁନାହିଁ। ଯାହାକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ସୂଚନାଯୋଗ୍ୟ, ଏରସମା ବଜାରରୁ ବର୍ଷା ଜଳ ନିଷ୍କାସନ ପାଇଁ ବ୍ଲକ ଚାରି ପଟେ ରାସ୍ତା କଡ଼ରେ ଡ୍ରେନ ନିର୍ମାଣ କରାଯାଇଛି। ବିଶେଷ କରି ବ୍ଲକର ପଛ ପାଚେରି ବସ ଷ୍ଟାଣ୍ଡ୍ଠାରୁ ମହିମା ଆଶ୍ରମ ପର୍ଯ୍ୟନ୍ତ ଏକ ଡ୍ରେନ ଲମ୍ବିଛି। ଦେଉଳୀ ଗ୍ରାମ ନିକଟରୁ ଏକ ଡ୍ରେନ ଗାନ୍ଧି ଉଦ୍ୟାନ ନିକଟକୁ ଯାଇଛି। ମହିମା ଆଶ୍ରମ ନିକଟରୁ ମାଛ ବଜାର ଦେଇ ଏକ ଡ୍ରେନ ଉତର ଦିଗକୁ ଯାଇଛି। କାଶୀ ବିଶ୍ୱନାଥ ମନ୍ଦିରର ଯଜ୍ଞ ମଣ୍ଡପଠାରୁ ଫ୍ରେଣ୍ଡସ୍ କ୍ଲବ ଦେଇ ଏରସମା ହାଟକୁ ଏକ ଡ୍ରେନ୍ ଯାଇଛି। ପଞ୍ଚାୟତ କାଯର୍ୟାଳୟ ଦେଇ ଜଗନ୍ନାଥ ମନ୍ଦିର ନିକଟକୁ ମଧ୍ୟ ଏକ ଡ୍ରେନ ଲମ୍ବିଛି। ମାତ୍ର ଏହି ଡ୍ରେନ ଗୁଡିକ ଲକ୍ଷ୍ୟଠାରୁ ଦୂରେଇ ଯାଇଛି। ଭଙ୍ଗାଟିଣ, ପ୍ଲାଷ୍ଟିକ ଡବା, ଗାଡି ଟାୟାର, ଶୋଲରେ ତିଆରି ଖାଇବା ଥାଳି ଓ ଖୁରୀ ଆଦି ପଡି ରହୁଛି। ସେଥିରେ ପାଣି ଜମିବା ଦ୍ୱାରା ମଶା ମାଛିଙ୍କ ବଂଶ ବିସ୍ତାର ହେବାରେ ଲାଗିଛି। ଏଥି ସହିତ ଲୋକେ ସେଥିରେ ଆବର୍ଜନା ପକାଇ ଦେବା ଦ୍ୱାରା ତାହା ପଚି ଦୁର୍ଗନ୍ଧ ହେଲାଣି। ଏଥିପ୍ରତି ବିଭାଗୀୟ ଅଧିକାରୀ ଦୃଷ୍ଟି ଦେଇ ପଦକ୍ଷେପ ନେବାକୁ ଦାବି ହେଉଛି। ଏ ସମ୍ପର୍କରେ ବିଡିଓ କୈଳାଶ ଚନ୍ଦ୍ର ବେହେରାଙ୍କୁ ପଚାରିବାରେ ସେ କହିଛନ୍ତି, ଡ୍ରେନ୍ ସଫେଇ କରିବାକୁ ବିଭାଗୀୟ ଯନ୍ତ୍ରୀଙ୍କୁ ନିର୍ଦ୍ଦେଶ ଦିଆଯାଇଛି। ଏକ ସପ୍ତାହ ମଧ୍ୟରେ ସମସ୍ତ ଡ୍ରେନ୍ ସଫେଇ କାର୍ଯ୍ୟ ଶେଷ ହେବ।
