ମନିଲା: ଫିଲିପାଇନ୍ସର ଏକ ସକ୍ରିୟ ଜ୍ୱାଳାମୁଖୀ ହେଉଛି ‘ତାଲ୍’। ରବିବାର ଏହାର ଆଖପାଖ ଅଞ୍ଚଳରେ ପରିସ୍ଥିତି ଜଟିଳ ହୋଇପଡ଼ିଥିଲା। ଏହା ସତ୍ତ୍ୱେ ଜ୍ୱାଳାମୁଖୀ ନିକଟରେ ବିବାହ କରିଛନ୍ତି ବରକନ୍ୟା। ଏହି ସମୟର ଫଟୋ ଏବେ ସୋସିଆଲ ମିଡିଆରେ ବେଶ୍ ଭାଇରାଲ ହୋଇଛି। ଜ୍ୱାଳାମୁଖୀ ମଝିରେ ଦୁହିଁଙ୍କର ଫଟୋ ଶୁଟ୍ ହୋଇଥିବା ଦେଖିବାକୁ ମିଳିଛି।
ଓ୍ବେଡିଂ ଫଟୋଗ୍ରାଫର ରାଣ୍ଡୋଲ୍ଫ ଇବନ୍ କୁହନ୍ତି, କନ୍ୟା ଚିନୋ ଏବଂ ବର କାଟ୍ ଓ୍ବାଫ୍ଲର୍ଙ୍କ ବିବାହ ସ୍ଥଳ ଜ୍ୱାଳାମୁଖୀ ନିକଟରୁ ୧୦ କିଲୋମିଟର ଦୂରରେ ଥିଲା। ଆଗ୍ନେୟ ଉଦ୍ଗିରଣ ହେବା ପରେ ଏହା ଚାରିଆଡ଼କୁ ବ୍ୟାପୀ ଯାଇଥିଲା। ବିପଦକୁ ଦୃଷ୍ଟିରେ ରଖି ଏଠାକାର ପ୍ରଶାସନ ପକ୍ଷରୁ ପ୍ରାୟ ୮୦୦୦ ହଜାର ଲୋକଙ୍କୁ ସ୍ଥାନାନ୍ତର କରାଯାଇଥିଲା। ଏହାର ଲାଭା ତାଲ୍ ହ୍ରଦରେ ପଡ଼ିବ ବୋଲି ପ୍ରଶାସନ ପକ୍ଷରୁ ସୂଚାଇ ଦିଆଯିବା ସହ ଆଖପାଖ ଅଞ୍ଚଳରେ ସୁନାମୀ ଆସିବ ବୋଲି ଘୋଷଣା ପୂର୍ବକ ସଚେତନ କରାଯାଇଥିଲା। ସମସ୍ତେ ଭୟଭୀତ ହୋଇପଡ଼ିଥିଲେ। ମାତ୍ର ଚିନୋ ଏବଂ କାଟ୍ ଏହାକୁ ଖାତିର ନ କରି ଜ୍ୱାଳାମୁଖୀ ନିକଟରେ ବିବାହ କରିବାକୁ ଚାହିଁଥିଲେ।
