ଜେହାନ ଦାରୁବାଲାଙ୍କୁ ଉପେକ୍ଷା
7:25 amJune 6, 2020 / 21

ନୂଆଦିଲ୍ଲୀ, ୬ା୬ (ପି.ଟି.)-ଅର୍ଜୁନ ପୁରସ୍କାର ପାଇଁ ଭାରତୀୟ ମୋଟର ସ୍ପୋଟର୍‌ସ ଫେଡେରେଶନ ସୁପାରିସ କରିଥିବା ନାମ ତାଲିକାରେ ଜେହାନ ଦାରୁବାଲାଙ୍କ ନାମ ସ୍ଥାନ ପାଇ ନ ଥିବାରୁ ଅନେକେ ଏନେଇ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ଜେହାନ ହେଉଛନ୍ତି ଦେଶର ଭାବୀ ଫର୍ମୁଲା ଓ୍ବାନ ରେସର। ତାଙ୍କ ନାମ ନ ପଠାଇ ଐଶ୍ୱର୍ଯ୍ୟା ପିସେଙ୍କ ନାମ ସୁପାରିସ କରାଯିବା ଉଚିତ୍‌ ହୋଇ ନାହିଁ ବୋଲି ଅନେକେ ମୋଟର ସ୍ପୋଟର୍‌ସ ପ୍ରେମୀ ମତବ୍ୟକ୍ତ କରିଛନ୍ତି। ଫେଡେରେଶନ ଅଫ୍‌ ମୋଟର ସ୍ପୋଟର୍‌ସ କ୍ଲବ ଅଫ୍‌୍‌ ଇଣ୍ଡିଆ (ଏଫ୍‌ଏମ୍‌ଏସ୍‌ସିଆଇ ) ପିସେ, ଅଗ୍ରଣୀ ବାଇକର ସି.ଏସ୍‌. ସନ୍ତୋଷ ଏବଂ ୨୦୧୬ ଏସିଆ ମାକ୍ସ କାର୍ଟିଂ ଚାମ୍ପିୟନ ଶାହାନ ଅଲି ମହସିନ୍‌ଙ୍କ ନାମ ଦେଶର ଦ୍ୱିତୀୟ ଶ୍ରେଷ୍ଠ କ୍ରୀଡ଼ା ସମ୍ମାନ ପାଇଁ ସୁପାରିସ ହୋଇଛି। ୨୧ ବର୍ଷୀୟ ଦାରୁବାଲା ଜଣେ ଇଣ୍ଡିଆନ ରେସ୍‌ରେ ଭାବେ ଏକାଧିକ ରେସ୍‌ରେ ପ୍ରଥମ ସ୍ଥାନ ଅଧିକାର କରିଛନ୍ତି। ସୂଚନାଯୋଗ୍ୟ, ୩ ଥର ଉପେକ୍ଷା ପରେ ରାଲି ଡ୍ରାଇଭର ଗୌରବ ଗିଲ୍‌ ଗତବର୍ଷ ଅର୍ଜୁନ ପୁରସ୍କାର ପାଇଥିଲେ। ଜେହାନ ହେଉଛନ୍ତି ଭାରତୀୟ ମୋଟର ସ୍ପୋଟର୍‌ସ ଅନ୍ୟତମ ଷ୍ଟାର। ସୁପାରିସ ପୂର୍ବରୁ ଜେହାନଙ୍କ ନାମ ଆଲୋଚନା ହୋଇଥିଲା। ଯଦି ନିକଟରେ କୌଣସି ଭାରତୀୟ ଫର୍ମୁଲା ଓ୍ବାନ ରେସ୍‌ରେ ଭାଗନେବାର ସୌଭାଗ୍ୟ ଅର୍ଜନ କରନ୍ତି ସେ ହେଉଛନ୍ତି ଜେହାନ। ଯଦି ସମ୍ଭବ ହୁଏ ତେବେ ନାରାୟଣ କାର୍ତ୍ତିକେୟନ ଓ କରୁଣ ଚାଣ୍ଡୋକଙ୍କ ପରେ ସେ ଭାରତର ତୃତୀୟ ଫର୍ମୁଲା ଓ୍ବାନ୍‌ ଡ୍ରାଇଭର ବିବେଚିତ ହେବେ। ସ୍ବଳ୍ପ ବୟସରେ ଦାରୁବାଲା ଇତିମଧ୍ୟରେ ଅନେକ ସଫଳତା ହାସଲ କରି ସାରିଲେଣି। ୨୦୧୭ରେ ସେ ପ୍ରଥମ ଭାରତୀୟ ଭାବେ ନ୍ୟୁଜିଲାଣ୍ଡ ଗ୍ରାଁ ପ୍ରି ଟାଇଟଲ ହାସଲ କରିଥିଲେ। ଏଫ୍‌ଆଇଏ ଫର୍ମୁଲା ୩ ୟୁରୋପିଆନ ଚାମ୍ପିୟନଶିପ୍‌ର ଦୁଇଟି ସିଜନ (୨୦୧୭-୨୦୧୮)ରେ ଦୁଇଟି ରେସ୍‌ ଜିତିବା ବ୍ୟତୀତ ୮ଟିରେ ପୋଡିୟମ ଫିନିଶ କରିଥିଲେ। କୋଭିଡ୍‌-୧୯ ଯୋଗୁ ଫର୍ମୁଲା-୨ ସିଜନ ଜୁଲାଇକୁ ଘୁଞ୍ଚାଇ ଦିଆଯାଇଛି। ୪ଥର ବିଶ୍ୱ ଚାମ୍ପିୟନ ରେଡ୍‌ ବୁଲ୍‌ ଏହାର ଜୁନିୟର ଡ୍ରାଇଭର ପ୍ରୋଗ୍ରାମ ପାଇଁ ଦାରବାଲାଙ୍କୁ ଅନୁବନ୍ଧିତ କରିଛି।