ଧର୍ମଶାଳା,୨୨।୨(ଡିଏନଏ): ଜାତୀୟ ରାଜପଥ ଜାରକା ଛକରେ ହେବାକୁ ଥିବା ଫ୍ଲାଏ ଓଭରବ୍ରିଜକୁ ନେଇ ଚାଲିଥିବା ବିଭିନ୍ନ କଳ୍ପନାଜଳ୍ପନାର ଅବସାନ ଘଟିଛି। ଶୁକ୍ରବାର ପୂର୍ବାହ୍ନରେ ଜାତୀୟ ରାଜପଥ ପ୍ରାଧିକରଣ ଆଞ୍ଚଳିକ ଅଧିକାରୀ ପି.କେ. ପଣ୍ଡା ଜାରକାରେ ପହଞ୍ଚି ଧର୍ମଶାଳା ବିଧାୟକ ପ୍ରଣବ କୁମାର ବଳବନ୍ତରାୟ ଓ ସ୍ଥାନୀୟ ଲୋକଙ୍କ ଉପସ୍ଥିତିରେ ସରଜମିନ ତଦନ୍ତ କରି ଜାରକା ବିଟହାଉସ ନିକଟରେ ଫ୍ଲାଏଓଭର ବ୍ରିଜ ନିର୍ମାଣ ଲାଗି ପ୍ରତିଶ୍ରୁତି ଦେଇଛନ୍ତି। ଏହି କାର୍ଯ୍ୟ ୭ଦିନ ମଧ୍ୟରେ ଆରମ୍ଭ କରିବାକୁ ଠିକାସଂସ୍ଥା ଡିବିଏଲର ପ୍ରକଳ୍ପ ପରିଚାଳକ କମଲ ଚୌହାନଙ୍କୁ ନିର୍ଦ୍ଦେଶ ଦେଇଛନ୍ତି। ସେହିପରି ପୂର୍ବରୁ ଜାରକା ଛକରେ ଥିବା ଗଳିପୋଲଟି ପୂର୍ବ ଭଳି ରହିବବୋଲି ସ୍ଥିର କରାଯାଇଛି। ତେବେ ପୂର୍ବରୁ ଗଳିପୋଲ ଥିବା ସ୍ଥାନରେ ଫ୍ଲାଏ ଓଭରବ୍ରିଜ କରାଯିବା ପାଇଁ ସ୍ଥିର ହୋଇଥିଲା। ହେଲେ ଅବଶ୍ୟକ ଜାଗା ଓ ଗମନାଗମନ ସୁବିଧାକୁ ଦୃଷ୍ଟିରେ ରଖି ଏଠାରୁ ୧୫୦ ମିଟର ଦୂର ଜାରକା ବିଟ ହାଉସ ନିକଟରେ ଫ୍ଲାଇ ଓଭରବ୍ରିଜ କରିବାକୁ ସ୍ଥିର କରାଯାଇଛି।
ଏହି ସମୟରେ ବ୍ଲକ ଅଧ୍ୟକ୍ଷ ପ୍ରଭାତ କୁମାର ବଳବନ୍ତରାୟ, ଧର୍ମଶାଳା ଉନ୍ନୟନ କମିଟି ସଭାପତି ଜଳଧର ମହାନ୍ତି, ସଂଯୋଜକ ଅଖିଳ କୁମାର ସ୍ବାଇଁ, ଧର୍ମଶାଳା ମହୋତ୍ସବ ପୂଜା କମିଟି ସମ୍ପାଦକ ସତ୍ୟପ୍ରିୟ ମହାନ୍ତି, ବଡବଜାର କମିଟି ସଭାପତି ଅଶୋକ କୁମାର ସାହୁ, ସମ୍ପାଦକ ଅଶୋକ ମୁଦୁଲି, ମେନମାର୍କେଟ ସଭାପତି ଅମରେନ୍ଦ୍ର ରାଉତ, ସ୍ଥାନୀୟ ସରପଞ୍ଚ ନଟବର ସାହୁ, ବିକାଶ ବେହେରା, ଅନିରୁଦ୍ଧ ରାଉତ, ଶ୍ରୀକାନ୍ତ ସାହୁ, ନିର୍ମଳ ପ୍ରଧାନ, ପ୍ରଫୁଲ୍ଲ ସାହାଣୀ ପ୍ରମୁଖ ଉପସ୍ଥିତ ଥିଲେ।
