ପୁରୁଣା ଭୁବନେଶ୍ୱର,୧୮।୨(ଡି.ଏନ୍.ଏ.): ଆସନ୍ତା ୨୧ତାରିଖ ତଥା ଶୁକ୍ରବାର ମହାଶିବରାତ୍ରି। ମହାପ୍ରଭୁ ଶ୍ରୀଲିଙ୍ଗରାଜଙ୍କ ଜାଗରଯାତ୍ରା ତଥା ମହାଶିବରାତ୍ରି ଉପଲକ୍ଷେ ସୋମବାର ସନ୍ଧ୍ୟାରେ କମିଶନରେଟ ପୋଲିସ ପକ୍ଷରୁ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଦକ୍ଷିଣେଶ୍ୱରୀ ମଣ୍ଡପଠାରେ ଥିବା ଶ୍ରୀ ଲିଙ୍ଗରାଜ ଥାନାର ନୂତନ ପ୍ରେକ୍ଷାଳୟଠାରେ ଆୟୋଜିତ ବୈଠକରେ ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ ଅଧ୍ୟକ୍ଷତା କରିଥିଲେ। ବୈଠକରେ ପ୍ରମୁଖ ନିଯୋଗ କର୍ମକର୍ତ୍ତା, ସାମାଜିକ କର୍ମୀ, ବୁଦ୍ଧିଜୀବୀମାନେ ଯୋଗଦେଇ ମତ ରଖିଥିଲେ। ପୁରୀ ଶ୍ରୀମନ୍ଦିର ଭଳି ଜାଗରରେ ଶ୍ରୀଲିଙ୍ଗରାଜ କ୍ଷେତ୍ର ଆଲୋକୀକରଣ କରାଯିବା ସହ ଝଲସିବ। ରାତି ୧୦ଟାରେ ମହାଦୀପ ଉଠିବ। ଏହା ସହ ୨୪ଘଣ୍ଟିଆ ପୋଲିସ ଫୋର୍ସ ମୁତୟନ ଏବଂ ପୋଲିସ ନିୟନ୍ତ୍ରଣ କକ୍ଷ ରହିବ। ମନ୍ଦିର ବାହାରେ ସମ୍ବେଦନଶୀଳ ସ୍ଥାନମାନଙ୍କରେ ସିସି କ୍ୟାମେରା ଲଗାଯିବ ବୋଲି କମିଶନର ଷଡ଼ଙ୍ଗୀ କହିଥିଲେ। ଭିଡ଼ରେ ଲୁଟେରାଙ୍କ ପ୍ରତି ଶ୍ରଦ୍ଧାଳୁମାନେ ଅନାବଶ୍ୟକ ଅଳଙ୍କାର ପରିଧାନ ନ କରିବାକୁ ଅନୁରୋଧ କରିଥିଲେ। ବୈଠକରେ ଅନ୍ୟମାନଙ୍କ ମଧ୍ୟରେ ଲିଙ୍ଗରାଜ ଥାନା ଅଧିକାରୀ ଶରତ ଚନ୍ଦ୍ର ପାତ୍ର, ମନ୍ଦିର କାର୍ଯ୍ୟନିର୍ବାହୀ ଅଧିକାରୀ ପ୍ରସନ୍ନ କୁମାର ଦାସ, ଏ.ଡି.ଏମ. ପ୍ରଫୁଲ ସ୍ବାଇଁ, ପୂର୍ବତନ କର୍ପୋରେଟର ପ୍ରମୋଦ ମହାପାତ୍ର, ରଜେନ୍ଦ୍ର ସମର୍ଥା, ବିରଞ୍ଚି ନାରାୟଣ ମହାସୁପକାର, କମଳାକାନ୍ତ ବଡୁ, ନାରୀ ନେତ୍ରୀ ରଶ୍ମି ମହାପାତ୍ର ଏବଂ ପୋଲିସ ଅଧିକାରୀମାନେ ଉପସ୍ଥିତ ଥିଲେ।
୩ ଥାକିଆ ୧୪ ପାର୍କିଂ ସ୍ଥଳ
ଟ୍ରାଫିକ୍ ନୟନ୍ତ୍ରଣ ନେଇ ଟ୍ରାଫିକ୍ ଡିସିପି ସାଗରିକା ନାଥ କହିଛନ୍ତି ଯେ, ଜାଗରରେ ହଜାର ହଜାର ଶ୍ରଦ୍ଧାଳୁଙ୍କ ଆଗମନକୁ ନେଇ ଟ୍ରାଫିକ୍ ନକ୍ସା ପ୍ରସ୍ତୁତ କରାଯାଇଛି। ନୂତନ ଭାବେ ମନ୍ଦିର ସମ୍ମୁଖ ଉଚ୍ଛେଦ ସହ ନିର୍ମାଣ ହୋଇଥିବା ୩ ଥାକିଆ ବିଶିଷ୍ଟ ପାର୍କିଂ ସ୍ଥଳକୁ ନେଇ ପ୍ରାୟ ୧୪ଟି ପାର୍କିଂ ସ୍ଥଳ ଚିହ୍ନଟ କରାଯାଇଛି। ଏଥିରେ ୩, ୪ଚକିଆ ଯାନ ସହ ବାଇକ୍ଗୁଡ଼ିକ ପାର୍କିଂ ହୋଇପାରିବ। ଗ୍ୟାରେଜ ଛକ, ମାଉସୀମା’ ଛକ, ସାମନ୍ତରାପୁର, କେଦାରଗୌରୀ ଛକରୁ ନୋ ଏଣ୍ଟ୍ରିଜୋନ ହେବା ସହ ମନ୍ଦିର ରାସ୍ତାରେ ଭାରିଯାନ ନିଷେଧ କରାଯିବ। ଲୋକମାନଙ୍କୁ ସୂଚନା ଦେବାପାଇଁ ବିଭିନ୍ନ ସ୍ଥାନରେ ଟ୍ରାଫିକ୍ ପୋଲିସ ମୁତୟନ କରାଯିବ।
ଦର୍ଶନ ପାଇଁ ସ୍ବତନ୍ତ୍ର ବ୍ୟବସ୍ଥା
ଶିବରାତ୍ରିରେ ହଜାର ହଜାର ଶ୍ରଦ୍ଧାଳୁଙ୍କ ଆଗମନରେ ଶ୍ରୀଜୀଉଙ୍କ ଦର୍ଶନପାଇଁ ଭିଡ଼ ଉପୁଜିବା ସ୍ବଭାବିକ। ଭକ୍ତ ଏବଂ ବିଭିନ୍ନ ଅଧିକାରୀଙ୍କ ଦର୍ଶନକୁ ଶୃଙ୍ଖଳିତ କରିବା ପାଇଁ ସ୍ବତନ୍ତ୍ର ବ୍ୟବସ୍ଥା ହୋଇଛି। ଉତ୍ତରଦ୍ୱାର ଦେଇ ସେବାୟତ, ସେବାୟତଙ୍କ ସମ୍ପକୀୟ, ଦକ୍ଷିଣ ଦ୍ୱାର ଦେଇ ଭି.ଆଇ.ପି ଏବଂ ଭି.ଭି.ଆଇ.ପି., ଅନ୍ୟ ଅଧିକାରୀମାନେ ଏବଂ ସିଂହଦ୍ୱାର ଦେଇ ସର୍ବସାଧାରଣ ଭକ୍ତଙ୍କପାଇଁ ଦର୍ଶନ ବ୍ୟବସ୍ଥା କରାଯାଇଛି ବୋଲି ଡିସିପି. ଅନୁପ ସାହୁ ସୂଚନା ଦେଇଛନ୍ତି। ଜଟଣୀ ବିଧାୟକ ସୁରେଶ କୁମାର ରାଉତରାୟ ବୈଠକରେ ଯୋଗଦେଇ ମତ ରଖିବା ସହ ଗହଳିରେ ଷଣ୍ଢଙ୍କ ପ୍ରବେଶ ପଥରେ ରୋକ ଲଗାଇବାପାଇଁ ବିଏମ୍ସି ଅଧିକାରୀଙ୍କୁ ପରାମର୍ଶ ଦେଇଥିଲେ।
