ବେଙ୍ଗାଲୁରୁ/ଓ୍ବାଶିଂଟନ,୯ା୯(ପି.ଟି.): ଚନ୍ଦ୍ରର ଦକ୍ଷିଣ ମେରୁରେ ବାଟବଣା ହୋଇଥିବା ଲ୍ୟାଣ୍ଡର ବିକ୍ରମ ଠାବ ହେବା ପରେ ଚନ୍ଦ୍ରୟାନ-୨ର ସଫଳତାକୁ ଦେଶବାସୀ ନେଇ ଯେତିକି ଆଶାବାଦୀ ହୋଇଛନ୍ତି ତଥ୍ୟାଭିଜ୍ଞ ମହଲରେ ସେତିକି ଆଶଙ୍କା ମଧ୍ୟ ସୃଷ୍ଟି ହୋଇଛି। କାରଣ ବିକ୍ରମର ଜୀବନକାଳ ୧୪ ଦିନରୁ ୨ ଦିନ ଅତିକ୍ରାନ୍ତ ହୋଇସାରିଥିବାରୁ ଅବଶିଷ୍ଟ ୧୨ ଦିନ ମଧ୍ୟରେ ଏହାସହ ପୁନଃ ଯୋଗାଯୋଗ ରକ୍ଷା କରାଯାଇ ନ ପାରିଲେ ମୂଳ ଉଦ୍ଦେଶ୍ୟ ସାଧିତ ହେବ ନାହିଁ ବୋଲି କୁହାଯାଉଛି। ଭାରତୀୟ ମହାକାଶ ଗବେଷଣା ସଂସ୍ଥା (ଇସ୍ରୋ) ବିକ୍ରମ ସହ ସମ୍ପର୍କ ପ୍ରତିଷ୍ଠା ପାଇଁ ଜୋର୍ଦାର ଉଦ୍ୟମ ଚଳାଇଥିବା ଏହାର ଅଧ୍ୟକ୍ଷ କେ. ଶିବନ୍ କହିଛନ୍ତି। ଅନ୍ୟପକ୍ଷରେ ଏହାର ସମ୍ଭାବନା ଅତି କମ୍ ବୋଲି ଆଉ କେତେଜଣ ବୈଜ୍ଞାନିକ ମତବ୍ୟକ୍ତ କରିଛନ୍ତି।
ମହାକାଶ ଗବେଷଣା ସଂସ୍ଥା ନାସା ଭାରତର ଦ୍ୱିତୀୟ ଚନ୍ଦ୍ର ମିଶନ ଚନ୍ଦ୍ରୟାନ-୨କୁ ପ୍ରଶଂସା କରିଛି। ଇସ୍ରୋ ସହ ମିଳିତ ଭାବେ ସୌରମଣ୍ଡଳ ଆବିଷ୍କାର ପାଇଁ ନାସା ପ୍ରସ୍ତୁତ ଥିବା କହିଛି। ଚନ୍ଦ୍ରର ଦକ୍ଷିଣ ମେରୁରେ ସୂକ୍ଷ୍ମ ଅବତରଣ ପାଇଁ ଚନ୍ଦ୍ରୟାନ-୨ର ଉଦ୍ୟମ ଅବିଶ୍ୱସନୀୟ ଓ ପ୍ରଶଂସନୀୟ। ଏଥିରୁ ଆମକୁ ପ୍ରେରଣା ମିଳିବ ବୋଲି ଇସ୍ରୋକୁ ଅଭିନନ୍ଦନ ଜଣାଇବା ସହ ନାସା ଟୁଇଟ୍ କରିଛି। ସେହିପରି ଚନ୍ଦ୍ର କକ୍ଷରେ ଘୂରୁଥିବା ଅର୍ବିଟରରୁ ବିକ୍ରମର ଲେଜର ଇମେଜ୍ ଆସିବା ପରେ ଦେଶବ୍ୟାପୀ ଉତ୍ସାହ ଦେଖିବାକୁ ମିଳିଛି। ସୋସିଆଲ ମିଡିଆ ୟୁଜର୍ସ ଗର୍ବ ଓ ଉତ୍ସାହର ସହ ତ୍ରିରଙ୍ଗା ପତାକା ସହିତ ଲ୍ୟାଣ୍ଡର ଫଟୋ ଶେୟାର କରିଛନ୍ତି। ନିଜ ପରିଚୟ ଗୋପନ ସର୍ତ୍ତରେ ଇସ୍ରୋର ଜଣେ ବୈଜ୍ଞାନିକ କହିଛନ୍ତି, ସମୟ ଗଡ଼ିଚାଲିବା ସହ ବିକ୍ରମ ସହ ସମ୍ପର୍କ ପୁନଃ ସ୍ଥାପନ କରିବା ଅତ୍ୟନ୍ତ କଠିନ ହୋଇପଡ଼ିବ। ତେବେ ଉପଯୁକ୍ତ ନିୟନ୍ତ୍ରଣ ବଳରେ ସୌର ଶକ୍ତି ବଳରେ ଏଥିରୁ ଊର୍ଜା ସୃଷ୍ଟି ହେବା ସହ ବ୍ୟାଟେରି ରିଚାର୍ଜ କରାଯାଇପାରିବ। ତେବେ ଏହାର ସମ୍ଭାବନା ବହୁତ କମ୍। ସେହିପରି ଇସ୍ରୋର ଅନ୍ୟ ଜଣେ ଅଧିକାରୀ କହିଛନ୍ତି, ଚନ୍ଦ୍ରପୃଷ୍ଠରେ ବିକ୍ରମ ହାର୍ଡ ଲ୍ୟାଣ୍ଡିଂ କରିଛି। ଏହା ତା’ର ୪ ଗୋଡ଼ରେ ଅବତରଣ କରିଥାଇ ନ ପାରେ। ଏଥିଯୋଗୁ ୧,୪୭୧ କେ.ଜି ଓଜନର ଲ୍ୟାଣ୍ଡର କ୍ଷତିଗ୍ରସ୍ତ ହୋଇଥିବ ବୋଲି ସେ ଆଶଙ୍କା ବ୍ୟକ୍ତ କରିଛନ୍ତି।
