ବାସୁଦେବପୁର,୨୭ା୫(ଡି.ଏନ୍.ଏ.): ଭଦ୍ରକ ଜିଲା ବାସୁଦେବପୁର ବ୍ଲକ ବିଦେଇପୁର ପଞ୍ଚାୟତର ଗଦେଇବିନ୍ଧା ମହାଳିକ ସାହି ଅଙ୍ଗନବାଡ଼ି କେନ୍ଦ୍ରରେ ସୋମବାର ସକାଳେ ଅଗ୍ନିକାଣ୍ଡ ଘଟି ଅଙ୍ଗନବାଡ଼ି କେନ୍ଦ୍ରଟି ସମ୍ପୂର୍ଣ୍ଣ ଜଳିଯାଇଛି। ରୋଷେଇ ପାଇଁ ଗ୍ୟାସ ଲଗାଯାଉଥିବାବେଳେ ଗ୍ୟାସ ଲିକ୍ ହୋଇ ଏହି ଅଘଟଣ ଘଟିଛି। ତେବେ କେନ୍ଦ୍ରରେ ଉପସ୍ଥିତ ୧୫ରୁ ଊର୍ଦ୍ଧ୍ୱ ଛାତ୍ରୀଛାତ୍ର ଅଳ୍ପକେ ରକ୍ଷା ପାଇ ଯାଇଥିବାବେଳେ ସମସ୍ତ କାଗଜପତ୍ର ଜଳିଯାଇଛି। ପ୍ରକାଶ ଯୋଗ୍ୟ ଯେ, କେନ୍ଦ୍ରଟି ଏକ ଚାଳଘରେ ଭଡ଼ାସୂତ୍ରରେ ଚାଲୁଥିଲା। ଘଟଣାର ତଦନ୍ତ ପାଇଁ ସିଡିପିଓ ଜାନକୀ ଦାସ ନିର୍ଦ୍ଦେଶ ଦେବା ପରେ ସୁପରଭାଇଜର ରୁକ୍ମିଣୀ ମହାଳିକ ଘଟଣାସ୍ଥଳକୁ ଯାଇଛନ୍ତି।
