ଢାକା,୧୮।୧- ଆସନ୍ତା ସପ୍ତାହରେ ବାଂଲାଦେଶ ପାକିସ୍ତାନ ଗସ୍ତ କରି ଟି୨୦ ସିରିଜ୍ ଖେଳିବ। ଏହି ସିରିଜ୍ରୁ ବାଂଲାଦେଶ ଦଳର ଉଇକେଟକିପର ବ୍ୟାଟ୍ସମ୍ୟାନ ମୁଶଫିକର ରହିମ ବ୍ୟକ୍ତିଗତ କାରଣ ଦର୍ଶାଇ ଓହରିଯାଇଥିଲେ। ତାଙ୍କ ପରେ ଦଳର ୫ ଜଣ କୋଚିଂ ଷ୍ଟାଫ ପାକିସ୍ତାନ ଗସ୍ତ କରିବାକୁ ମନା କରିଦେଇଛନ୍ତି। ଏଥିରେ ବ୍ୟାଟିଂ କୋଚ୍ ନିଲ ମ୍ୟାକକେଞ୍ଜି ଓ ଫିଲ୍ଡିଂ କୋଚ୍ ରିଆନ କୁକ୍ ରହିଛନ୍ତି। ଦୁହେଁ ନିଜ ଆଡ଼ୁ ଓହରିଥିବାବେଳେ ବାଂଲାଦେଶ କ୍ରିକେଟ ବୋର୍ଡ (ବିସିବି) ସ୍ପିନ ପରାମର୍ଶଦାତା ଡାନିଏଲ ଭିଟୋରିଙ୍କୁ ଛୋଟ ସିରିଜ୍ ପାଇଁ ନ ଡାକିବାକୁ ନିଷ୍ପତ୍ତି ନେଇଛି। ଏ ନେଇ ବିସିବିର କ୍ରିକେଟ ଅପରେଶନ୍ସ ଚେୟାରମ୍ୟାନ ଆକ୍ରମ ଖଁା କହିଛନ୍ତି। ଦଳୀୟ ଆନାଲିସିଷ୍ଟ ଶ୍ରୀନିବାସ ଚନ୍ଦ୍ରଶେଖରନ ଭାରତୀୟ ନାଗିରିକ ହୋଇଥିବାରୁ ପାକିସ୍ତାନ ଯିବେ ନାହିଁ। ଷ୍ଟ୍ରେନ୍ଥ ଓ କଡିଶନିଂ କୋଚ୍ ମାରିଓ ଭିଲାଭାରାୟନଙ୍କ ହାତ ଭାଙ୍ଗି ଯାଇଛି। ସେ ସ୍କାଇପି ଜରିଆରେ ନିଜ କାର୍ଯ୍ୟ ତୁଲାଇବେ। ମାତ୍ର ଏପର୍ଯ୍ୟନ୍ତ ପାକିସ୍ତାନ ଗସ୍ତ ଲାଗି ଆମେ ନୂଆ ବୋଲିଂ କୋଚ୍ ନିଯୁକ୍ତ କରିନାହୁଁ ବୋଲି ଆକ୍ରମ ପ୍ରକାଶ କରିଛନ୍ତି। ସୋହେଲ ଇସଲାମ ଓ ତୁଷାରକାନ୍ତି ହଲଦାର କୁକ୍ ଓ ଭିଲାଭାରାୟନଙ୍କ ଦାୟିତ୍ୱ ତୁଲାଇବେ। କେବଳ ମୁଖ୍ୟ କୋଚ୍ ରସେଲ ଡୋମିଙ୍ଗୋ ଓ ଫିଜିଓ ଜୁଲିଆନ କାଲେଫାଟୋ ଦଳ ସହ ଗସ୍ତ କରିବେ। ପାକିସ୍ତାନ ଗସ୍ତରେ ବାଂଲାଦେଶ ୩ ମ୍ୟାଚ୍ ବିଶିଷ୍ଟ ଟି୨୦, ଦୁଇ ଟେଷ୍ଟ ଓ ଏକ ଦିନିକିଆ ମ୍ୟାଚ୍ ଖେଳିବ। ଏହି ସିରିଜ୍ ୩ ଚରଣରେ ଅନୁଷ୍ଠିତ ହେବ।
