ଭୁବନ, ୪।୧୧(ଡି.ଏନ.ଏ.) ବୟସ ମାତ୍ର ୫। ଅଥଚ ଦର୍ଶକଙ୍କ ଆଖି ଆଗରେ ଇନ୍ଦ୍ରଜାଲ ସୃଷ୍ଟି କରିବାରେ ସେ ବେଶ୍ ପାରଙ୍ଗମ। ପିଲାମାନଙ୍କ ଖେଳିବୁଲିବା ବୟସରେ ମ୍ୟାଜିକ୍ ଭଳି ଜଟିଳ ବିଷୟକୁ ଅତି ସହଜରେ କରାୟତ୍ତ କରିଥିବା ଏହି କୁନି ଝିଅ ହେଲେ ଭୁବନ ଅଞ୍ଚଳର ସାରା ସାହୁ।
କୁହାଯାଏ କଳା ହେଉଛି ଈଶ୍ୱରପ୍ରଦତ୍ତ ପ୍ରତିଭା, ଯାହା ପ୍ରବାହିତ ହେଉଛି ସାରାଙ୍କ ରକ୍ତରେ। ସାରାଙ୍କ ବାପା ଶକ୍ତି ପ୍ରସାଦ ସାହୁ ପେସାରେ ଜଣେ ଇଞ୍ଜିନିୟର। ହେଲେ ରାଜ୍ୟର ପ୍ରତିଷ୍ଠିତ ମ୍ୟାଜିସିଆନ ଭାବେ ସେ ବେଶ୍ ପରିଚିତ। ଏଥିରେ ପିଲାଟି ଦିନରୁ ପ୍ରଭାବିତ ହୋଇଛନ୍ତି ସାରା। ପ୍ରାୟ ବର୍ଷେ ହେଲା ସେ ବାପାଙ୍କଠାରୁ ଶିଖୁଛନ୍ତି ମ୍ୟାଜିକ୍। ଗତ ଶନିବାର ଭୁବନ କାଳୀବଜାର ବଣିକ ସଂଘ ପକ୍ଷରୁ ଆୟୋଜିତ ୪୦ତମ ବାର୍ଷିକ ଉତ୍ସବକୁ ଆମନ୍ତ୍ରିତ ହୋଇ ଆସିଥିଲେ ସାରା। ଆଉ ଅତି ଚମତ୍କାର ଶୈଳୀରେ ତାଙ୍କ ହାତର କରିସ୍ମାରେ ସେ କରିଥିଲେ ଦର୍ଶକଙ୍କ ମନୋରଞ୍ଜନ। ସେ ତାସ୍, କୋଲଡ୍ରିଙ୍କସ୍କୁ ନେଇ ଅତି ସୁନ୍ଦର ଭାବେ ମ୍ୟାଜିକ୍ ଦେଖାଇଥିଲେ, ଯାହା ଦର୍ଶକଙ୍କ ବେଶ୍ କରତାଳି ସାଉଁଟିଥିଲା।
ସୂଚନାଯୋଗ୍ୟ, ସାରା ଭୁବନ ସରସ୍ବତୀ ଶିଶୁ ବିଦ୍ୟାମନ୍ଦିରର ପ୍ରାରମ୍ଭ ଶ୍ରେଣୀର ଛାତ୍ରୀ। ବାପାଙ୍କଠାରୁ ଶିଖିଥିବା ମ୍ୟାଜିକ୍କୁ ସେ ପ୍ରଥମେ ସ୍କୁଲର ସହପାଠୀଙ୍କ ନିକଟରେ ପ୍ରଦର୍ଶନ କରି ଚର୍ଚ୍ଚାର ପରିସରକୁ ଆସିଥିଲେ। ତାଙ୍କର ଯାଦୁବିଦ୍ୟା ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। କୁନି ବୟସରୁ ଏପରି ନିଆରା କଳାର ଅଧିକାରୀ ସାରା ବାପାଙ୍କ ପ୍ରେରଣାରେ ଅଞ୍ଚଳ ପାଇଁ ସୁନାମ ଆଣିବେ ବୋଲି ଅଞ୍ଚଳବାସୀ କହିଛନ୍ତି।
