ଭୁବନେଶ୍ୱର,୧।୫(ବ୍ୟୁରୋ): ଓଡ଼ିଶାରେ କରୋନା ଭୂତାଣୁ ସଂକ୍ରମଣ ବଢ଼ୁଥିବାରୁ ଏହା ରାଜ୍ୟ ସରକାରଙ୍କ ମୁଣ୍ଡବ୍ୟଥାର କାରଣ ପାଲଟିବାରେ ଲାଗିଛି। ମାର୍ଚ୍ଚ ୩୧ ତାରିଖରେ ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ୪ ଥିଲା। କିନ୍ତୁ ମାସକ ପରେ ଏହା ୧୪୨ରେ ପହଞ୍ଚିଛି। ଅର୍ଥାତ ୧ ମାସ ମଧ୍ୟରେ ୧୩୮ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି। ଯଦିଓ ଦେଶ କିମ୍ବା ଅନ୍ୟ ରାଜ୍ୟର ବୃଦ୍ଧି ତୁଳନାରେ ଏହା କମ୍ ତଥାପି ଓଡ଼ିଶା ପାଇଁ ଏହା ଗମ୍ଭୀର ସ୍ଥିତି ସୃଷ୍ଟି କରିବାକୁ ଯାଉଥିବା ସ୍ବାସ୍ଥ୍ୟ ବିଶାରଦମାନେ ଆଶଙ୍କା କରୁଛନ୍ତି।
ଲକ୍ଡାଉନ ଉଠିବା ପରେ ଅନ୍ୟ ରାଜ୍ୟରେ ଥିବା ଲକ୍ଷ ଲକ୍ଷ ଓଡ଼ିଆ ଲୋକମାନେ ଫେରିବେ। ତେଣୁ ସମ୍ପୃକ୍ତ ପ୍ରବାସୀମାନେ ଏହି ମହାମାରୀକୁ ଆହୁରି ଅଧିକ ବଢ଼ାଇଦେବାର ଆଶଙ୍କାକୁ ଏଡାଇ ଦିଆଯାଇ ନ ପାରେ। ବର୍ତ୍ତମାନ ସୁଦ୍ଧା ରାଜ୍ୟରେ ଯେତିକି ସଂକ୍ରମିତ ଅଛନ୍ତି ସେମାନଙ୍କ ମଧ୍ୟରୁ ୫୦ ଜଣ କେବଳ ପଶ୍ଚିମବଙ୍ଗ ଫେରନ୍ତା ବୋଲି ସରକାରୀ ତଥ୍ୟ କହୁଛି। ଆଗାମୀ ଦିନରେ ମହାରାଷ୍ଟ୍ର, ଦିଲ୍ଲୀ, ଗୁଜରାଟ, ଉତ୍ତରପ୍ରଦେଶ ଭଳି ବହୁଳ ସଂକ୍ରମଣ ରାଜ୍ୟରୁ ଆସିବାକୁ ଥିବା ଲୋକମାନଙ୍କୁ ଯଦି ଠିକ୍ ଭାବେ କ୍ୱାରାଣ୍ଟାଇନ୍ କରା ନ ଯାଏ କିମ୍ବା ସ୍ବାସ୍ଥ୍ୟ ପରୀକ୍ଷା ନ ହୁଏ ତେବେ ପରିସ୍ଥିତି ବିଗିଡ଼ିଯିବ ବୋଲି ସ୍ବାସ୍ଥ୍ୟ ବିଶେଷଜ୍ଞମାନେ ଚେତାବନୀ ଦେଇଛନ୍ତି। ମାସକ ପୂର୍ବରୁ ଖୋର୍ଦ୍ଧା ଜିଲାର ଭୁବନେଶ୍ୱରରୁ ୩ ଓ ଭଦ୍ରକ ସହରର ଜଣଙ୍କୁ ମିଶାଇ ସ୍ଥିତି କେବଳ ୪ରେ ଥିଲା। କିନ୍ତୁ ମାସକ ମଧ୍ୟରେ ଏହି ମହାମାରୀ ଅନ୍ୟ ୧୨ଟି ଜିଲା ବାଲେଶ୍ୱର, ଯାଜପୁର, କେନ୍ଦ୍ରାପଡ଼ା, ସୁନ୍ଦରଗଡ଼, କଳାହାଣ୍ଡି, କଟକ, ପୁରୀ, ଢେଙ୍କାନାଳ, କୋରାପୁଟ, କେନ୍ଦୁଝର, ଦେବଗଡ଼ ଏବଂ ଝାରସୁଗୁଡ଼ାକୁ ମିଶାଇ ମୋଟ୍ ୧୪ ଜିଲାରେ ପାଦ ଥାପି ସାରିଲାଣି। ଗତ ସପ୍ତାହରେ ଗ୍ରୀନ୍ ଜୋନ୍ରେ ଥିବା କୋରାପୁଟ, କେନ୍ଦୁଝର, ଝାରସୁଗୁଡା ଓ ଦେବଗଡ ଏବେ ରେଡ୍ ଜୋନକୁ ଆସିଯାଇଛି। ତେବେ ପଡ଼ୋଶୀ ଜିଲାଗୁଡ଼ିକରେ ସଂକ୍ରମଣ ଦେଖାଦେଇଥିବାରୁ ସମ୍ବଲପୁର, ମୟୂରଭଞ୍ଜ, ବରଗଡ, ଅନୁଗୋଳ ଜିଲା ପାଇଁ ତାହା ଶୁଭ ସଂକେତ ନୁହେଁ। ସେହିପରି ଖୋର୍ଦ୍ଧା ରେଡ୍ ଓ କଟକ ଅରେଞ୍ଜ ଜୋନ୍ରେ ଥିବାରୁ ନୟାଗଡ଼ ଜିଲା ମଧ୍ୟ ସମ୍ପୂର୍ଣ୍ଣ ସୁରକ୍ଷିତ ନ ଥିବା ଭଳି ମନେ କରାଯାଉଛି।
କୋରାପୁଟ ଜିଲା ରେଡ୍ ଜୋନ୍ରେ ସାମିଲ ହୋଇଥିବାରୁ ଏଯାଏ ଗ୍ରୀନ୍ ଜୋନ୍ରେ ଥିବା ପଡୋଶୀ ମାଲକାନଗିରି, ରାୟଗଡା ଓ ନବରଙ୍ଗପୁର ଜିଲା ପାଇଁ ବିପଦ ଘନୀଭୂତ ହୋଇଛି। ଏ ପର୍ଯ୍ୟନ୍ତ ଗଜପତି ଓ ସୁବର୍ଣ୍ଣପୁର ଜିଲା ସମ୍ପୂର୍ଣ୍ଣ ଗ୍ରୀନ୍ ଜୋନ୍ରେ ଥିବାବେଳେ ଏହାର ପଡୋଶୀ ଗ୍ରୀନ୍ କିମ୍ବା ରେଡ୍ ଜୋନ୍ରେ ନ ଥିବା ଏକ ଶୁଭସଙ୍କେତ। କିନ୍ତୁ ରାଜ୍ୟ ବାହାରୁ ଆସୁଥିବା ଲୋକମାନଙ୍କ ସ୍ବାସ୍ଥ୍ୟ ପରୀକ୍ଷା ଯଦି ଠିକ୍ ଭାବେ କରାଯାଇପାରିବ ତାହେଲେ ସଂକ୍ରମଣ ଆଶଙ୍କାକୁ ବହୁ ମାତ୍ରାରେ ରୋକାଯାଇପାରିବ ବୋଲି ସ୍ବାସ୍ଥ୍ୟ ବିଶାରଦମାନେ ମତ ପ୍ରକାଶ କରୁଛନ୍ତି।
