ନିଜ ବୃତ୍ତିଗତ ଦାୟିତ୍ୱ ସୁଚାରୁ ରୂପେ ନିର୍ବାହ କରିବା ସହ ସମାଜ ତଥା ପରିବେଶ ପାଇଁ କାର୍ଯ୍ୟ କରୁଥିବା ବ୍ୟକ୍ତି କମ୍ ଦେଖିବାକୁ ମିଳନ୍ତି। ଏମାନଙ୍କ ମଧ୍ୟରେ ସିକିମର ଲୋମାସ ଧୁଙ୍ଗଲ ଜଣେ। ବୃତ୍ତିରେ ଶିକ୍ଷକ। ବୟସ ତାଙ୍କର ୩୫। ମାଖା ଗାଁର ସରକାରୀ ଉନ୍ନୀତ ମାଧ୍ୟମିକ ସ୍କୁଲ୍ରେ ସେ ଗଣିତ ଓ ବିଜ୍ଞାନ ପଢାନ୍ତି। ପୁର୍ସତ ପାଇବା କ୍ଷଣି ଲାଗିପଡନ୍ତି ସମାଜ ମଙ୍ଗଳରେ। ୨୦୧୫ରେ ପ୍ରଦୂଷଣ ରୋକିବା ପାଇଁ ‘ହରିଓମାଖା- ସିକିମ୍ ଏଗ୍ନେଷ୍ଟ ପଲ୍ୟୁଶନ’ ପ୍ରୋଜେକ୍ଟ ଆରମ୍ଭ କରିଥିଲେ। ଏହା ମାଧ୍ୟମରେ ପିଲାମାନଙ୍କ ସହ ମିଶି ସେ ବର୍ଜ୍ୟବସ୍ତୁ ପରିଚାଳନା ଉପରେ ଗୁରୁତ୍ୱ ପ୍ରଦାନ କରୁଛନ୍ତି। ପ୍ଲାଷ୍ଟିକ ବ୍ୟାଗଗୁଡିକର ଅପ୍ସାଇକ୍ଲିଂ କରି ଏବେସୁଦ୍ଧା ଧୁଙ୍ଗଲ ୮୫ ହଜାର ପ୍ଲାଷ୍ଟିକ ପ୍ୟାକେଟର ଅପ୍ସାଇକ୍ଲିଂ କରି ୬,୧୦୦ ବୁକ୍ କଭର୍ ବା ବହି ମଲାଟ ପ୍ରସ୍ତୁତ କରିପାରିଛନ୍ତି। ଏହାକୁ ବିକ୍ରି କରି ସେ ସ୍କୁଲ୍ ପାଇଁ ପାଣ୍ଠି ଯୋଗାଡ କରୁଛନ୍ତି। ଏଥିରୁ କିଛି ଅଂଶ ଅର୍ଥାଭାବରୁ ଉଚ୍ଚତର ଶିକ୍ଷା ପାଇବାରୁ ବଞ୍ଚିତ ହେଉଥିବା ପିଲାମାନଙ୍କୁ ବି ସାହାଯ୍ୟ କରୁଛନ୍ତିି। ଅପ୍ସାଇକ୍ଲିଂର ପ୍ରଥମ ପର୍ଯ୍ୟାୟ ଫେବୃୟାରୀ ୨୦୧୫ରୁ ଡିସେମ୍ବର ୨୦୧୯ ମଧ୍ୟରେ ଶେଷହୋଇଛି। ଏହି ସମୟରେ ସେ ସିକିମର ୨୦ରୁ ଅଧିକ ସ୍କୁଲ ଓ ଶିକ୍ଷାନୁଷ୍ଠାନର ପିଲାମାନଙ୍କୁ ସାମିଲ କରି ୫୫, ୦୦୦ ପ୍ଲାଷ୍ଟିକ ପ୍ୟାକେଟର ଅପସାଇକ୍ଲିଂ ଶେଷ କରିଛନ୍ତି। ଏଥିରେ ସେ ୪ ହଜାରରୁ ଊର୍ଦ୍ଧ୍ୱ ନୋଟ୍ବୁକ୍ ପାଇଁ କଭର୍ ପ୍ରସ୍ତୁତ କରିବାରେ ସକ୍ଷମ ହୋଇପାରିଛନ୍ତି। ଏବେ ୧୦ଟି ସରକାରୀ ଓ ବେସରକାରୀ ସ୍କୁଲକୁ ସେମାନଙ୍କ ପାଖରେ ଥିବା ଗାଁଗୁଡିକରୁ ପ୍ଲାଷ୍ଟିକ୍ ପ୍ୟାକେଟ ସଂଗ୍ରହ କରି ଦେବା ଲାଗି ଅନୁରୋଧ କରିଛନ୍ତି ଧୁଙ୍ଗଲ। କେବଳ ଏତିକି ନୁହେଁ ମାଖା ପାଖରେ ଥିବା ଏକ ସ୍ବୟଂ ସହାୟିକା ଗୋଷ୍ଠୀ (ଏସ୍ଏଚ୍ଜି )ର ମହିଳାମାନଙ୍କୁ କଭର୍ ପ୍ରସ୍ତୁତ କରିବାରେ ନିୟୋଜିତ କରିଛନ୍ତି। ପରବର୍ତ୍ତୀ ପର୍ଯ୍ୟାୟରେ ସେ ୧୦ଟି ଏସ୍ଏଚଜି ଓ ଏନ୍ଜିଓ ସହାୟତାରେ ୫ ଲକ୍ଷ ପ୍ଲାଷ୍ଟିକ ବ୍ୟାଗ୍ର ଅପସାଇକ୍ଲିଂ କରିବାର ଯୋଜନା କରିଛନ୍ତି।
