ଭଞ୍ଜନଗର,୨୫।୯(ଡି.ଏନ.ଏ.)-ଭଞ୍ଜନଗର ଆର୍ସିରୋଡ଼ରୁ ଜବରଦଖଲ ଉଚ୍ଛେଦ ପରେ ବର୍ଷା ଆରମ୍ଭ ହୋଇଯାଇଥିଲା। ବିଗତ ୨୦ ଦିନ ହେବ ମଝିରେ ମଝିରେ ଏହିଭଳି ବର୍ଷା ହେଉଛି। ତେଣୁ ପ୍ରଶାସନ ପକ୍ଷରୁ ଉଚ୍ଛେଦ ପରେ ଡ୍ରେନ ଓ ରାସ୍ତା ପୁନଃନିର୍ମାଣ କାମ ଦ୍ରୁତ ଗତିରେ ଆରମ୍ଭ ହୋଇପାରୁନାହିଁ। ଲୋକେ ବିପଦସଙ୍କୁଳ ଅବସ୍ଥାରେ ଘର ମଧ୍ୟରୁ କାଠ ପୋଲ ସହାୟତାରେ ଡ୍ରେନ୍ ପାର ହୋଇ ରାସ୍ତାକୁ ଆସୁଛନ୍ତି। ଉଚ୍ଛେଦ ପରଠୁ ଆରସିରୋଡ଼ର ମୁଖ୍ୟରାସ୍ତା ଠିକ୍ ନଥିବା ଯୋଗୁ ଯାନବାହନ ଚଳାଚଳରେ ଅସୁବିଧା ହେଉଛି। ତେଣୁ ବର୍ଷା ଛାଡ଼ିଲେ ହିଁ ପୁନଃରୁଦ୍ଧାର କାର୍ଯ୍ୟ ଦ୍ରୁତଗତିରେ ହେବାର ସମ୍ଭାବନା ରହିଛି। ବିଗତ ୩ଦିନ ହେବ ଭଞ୍ଜନଗରରେ ତୁହାକୁ ତୁହା ବର୍ଷା ହେଉଛି। ଆଗାମୀ ୨୭ ପର୍ଯ୍ୟନ୍ତ ବର୍ଷା ଲାଗି ରହିବା ସମ୍ଭାବନା ରହିଛି। ଯାହାକୁ ନେଇ ସାହି ବାସିନ୍ଦାଙ୍କ ମଧ୍ୟରେ ଚିନ୍ତା ବଢ଼ିଯାଇଛି। ବର୍ତ୍ତମାନ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖିନ ହେଉଛନ୍ତି। ଅପରପକ୍ଷେ ଠିକାଦାର ପୁନଃରୁଦ୍ଧାର କାର୍ଯ୍ୟ ତ୍ୱରାନ୍ବିତ କରିବା ପାଇଁ ଆବଶ୍ୟକ ଯନ୍ତ୍ରପାତି ସହ ପ୍ରସ୍ତୁତ ହୋଇ ଅଛନ୍ତି। କିନ୍ତୁ ବର୍ଷାଯୋଗୁ କାମ ଆରମ୍ଭ ହୋଇପାରୁ ନ ଥିବାବେଳେ ଯନ୍ତ୍ରପାତି ଭଡା ଗଣୁଛନ୍ତି।
ପ୍ରକାଶ ଯେ, ଆର୍ସିରୋଡକୁ ବହୁଦିନ ହେବ ସାହିଲୋକେ ଜବରଦଖଲ କରି ରଖିଥିଲେ। ଏନେଇ ପ୍ରଶାସନ ପକ୍ଷରୁ ବହୁବାର ଉଚ୍ଛେଦ ପାଇଁ ପ୍ରୟାସ କରାଯାଇଥିଲା। କିନ୍ତୁ ବିଭିନ୍ନ ସମୟରେ ବିଭିନ୍ନ ଚାପ ଯୋଗୁ ସମ୍ଭବ ହେଉନଥିଲା। ସହରର ପ୍ରମୁଖ ରାସ୍ତା ଆର୍ସିରୋଡ଼ ହୋଇଥିବା ଯୋଗୁ ଅଧିକାଂଶ ସମୟ ଏଠାରେ ଟ୍ରାଫିକ୍ ସମସ୍ୟା ଦେଖାଦେଉଥିଲା। ଏହିଭଳି ପରିସ୍ଥିତିରେ ଗତ ମାସ ୨୯ରେ ପ୍ରଶାସନ ଜବରଦଖଲ ଉଚ୍ଛେଦ ପାଇଁ ନିଷ୍ପତି ନେଇଥିଲା। ୨୯ରୁ ୪ ପର୍ଯ୍ୟନ୍ତ ଜବରଦଖଲ ଉଚ୍ଛେଦ ଚାଲିଥିଲା। ୨୨୨ଟି ଘର ଉଚ୍ଛେଦ କରାଯାଇଥିଲା। ଉକ୍ତ ଉଚ୍ଛେଦରେ ବହୁ ବିଶିଷ୍ଠ ବ୍ୟକ୍ତିଙ୍କ ଘର ମଧ୍ୟ ଉଚ୍ଛେଦ ହୋଇଛି। ତେଣୁ ପ୍ରଶାସନ ପକ୍ଷରୁ ବର୍ଷା ଛାଡୁଛାଡୁ ତୁରନ୍ତ ଡ୍ରେନ୍ ଓ ରାସ୍ତା କାମ ଆରମ୍ଭ କରିବା ପାଇଁ ଦାବି ହୋଇଛି। ଏନେଇ ପୂର୍ତ୍ତ ବିଭାଗ ନିର୍ବାହୀଯନ୍ତ୍ରୀ ରମେଶ ପ୍ରସାଦ ସ୍ବାଇଁଙ୍କ ସହ ଯୋଗାଯୋଗ କରିବାରୁ ସେ ଏଠାରେ କହିଛନ୍ତି ଯେ, ବର୍ଷା ହିଁ କାମ ଆରମ୍ଭରେ ବାଧକ ସାଜିଛି। ତଥାପି ଖୁବ୍ଶୀଘ୍ର କାମ ଆରମ୍ଭ କରାଯିବ। ଜନସାଧାରଣଙ୍କ ହିତକୁ ଦେଖି ପଦକ୍ଷେପ ନିଆଯାଉଛି। ଡ୍ରେନ ଓ ରାସ୍ତା ନିର୍ମାଣ ପାଇଁ ୧ କୋଟି ୫୪ ଲକ୍ଷ ଟଙ୍କା ଖର୍ଚ୍ଚ କରାଯିବ।
