ଖଣ୍ଡପଡ଼ା,୨୭ା୫(ସ୍ବ.ପ୍ର.): ସମ୍ପ୍ରତି କଣ୍ଟିଲୋ ଅଞ୍ଚଳର ବିଭିନ୍ନ ସାହି, ବସ୍ତି ଓ ମୁଖ୍ୟ ରାସ୍ତାକଡ଼ରେ ଥିବା ଡ୍ରେନଗୁଡିକ ଉପଯୁକ୍ତ ରକ୍ଷଣାବେକ୍ଷଣ ଅଭାବରୁ ଆବର୍ଜନାରେ ପୋତି ହୋଇପଡ଼ିଛି। କେତେକ ଡ୍ରେନ୍ର ନର୍ଦ୍ଦମା ପାଣି ରାସ୍ତା ଉପରେ ଭାସିବା ଫଳରେ ଦୂଷିତ ପରିବେଶ ସୃଷ୍ଟିହେଉଛି ା ଏଥିଯୋଗୁ ମଶାମାଛିଙ୍କ ବଂଶବୃଦ୍ଧି ହେବାରେ ଲାଗିଛି ା ଏଣୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଦୋକାନ, ବଜାରଠାରୁ ଆରମ୍ଭ କରି ଗ୍ରାମାଞ୍ଚଳର ବର୍ଜ୍ୟବସ୍ତୁ ଓ ନର୍ଦ୍ଦମା ପାଣିକୁ ଠିକ୍ ଭାବେ ନିଷ୍କାସନ ନ କରିବା ଯୋଗୁ ଡ୍ରେନ୍ଗୁଡିକ ଭାରି ବର୍ଜ୍ୟବସ୍ତୁରେ ପୋତି ହୋଇଗଲାଣି ା ଏହି ଦୂଷିତ ଜଳ ଜମାହୋଇ ଏବେ ଲୋକଙ୍କ ବାସଗୃହ ସମ୍ମୁଖସ୍ଥ ଅତି ନିକଟରେ ପ୍ରବାହିତ ହେବାରେ ଲାଗିଛି, ଯାହା ସାଧାରଣ ଜୀବନ ଯାତ୍ରାରେ ଘୋର ସମସ୍ୟା ସୃଷ୍ଟି ହୋଇଛି ା
ବିଭିନ୍ନ ମହଲରେ ଅଭିଯୋଗ ହେଉଛି ଯେ , କଣ୍ଟିଲୋ ଗ୍ରାମ ପଞ୍ଚାୟତ ଅଧୀନ ସାହି, ବସ୍ତି ଅଞ୍ଚଳର ଡ୍ରେନ୍ଗୁଡ଼ିକୁ ଠିକ୍ ସମୟରେ ସଫା କରାଯାଉନାହିଁ। ବିଶେଷ କରି ହାଟମୁଣ୍ଡପାଟଣା ଜନକଲ୍ୟାଣ କ୍ଲବ୍ ତଥା ୨ ଓ ୩ ନମ୍ବର ୱାର୍ଡ ପଛପାଖ ଡ୍ରେନଟି ଅଳିଆ ଆବର୍ଜନାରେ ପୋତିହେବା ଫଳରେ ଜମା ହୋଇଥିବା ନର୍ଦ୍ଦମା ପାଣି ରାସ୍ତା ଉପର ଦେଇ ପ୍ରବାହିତ ହେଉଛି ା ଘରୋଇ ଡ୍ରେନରୁ ନିର୍ଗତ ମଇଳା ପାଣି ଓ ବର୍ଜ୍ୟବସ୍ତୁ ଭାସି ଆସି ରାସ୍ତା କଡ଼ରେ ଥିବା ଡ୍ରେନରେ ପଡି ପଚିଶଢି ଦୂଷିତ ପରିବେଶ ସୃଷ୍ଟିକରୁଛି। ଏହି ଦୂଷିତ ପାଣିରେ ମଶା ବଂଶ ବୃଦ୍ଧି କରୁଥିବାରୁ ଅସ୍ବାସ୍ଥ୍ୟକର ପରିବେଶ ସୃଷ୍ଟି ହେବା ସହ ଡେଙ୍ଗୁ ଭଳି ବିଭିନ୍ନ ରୋଗ ସଂକ୍ରମିତ ହେବାର ଆଶଙ୍କା ସୃଷ୍ଟି ହେଉଛି। ଉଲ୍ଲେଖଯୋଗ୍ୟ, କଣ୍ଟିଲୋ କଂସା ପିତ୍ତଳ ବାସନ ଶିଳ୍ପ, ଶ୍ରୀନୀଳମାଧବଜୀଙ୍କ ଭଳି ଠାକୁରଙ୍କ ପୀଠ ଭାବେ ସ୍ବୀକୃତ ପର୍ଯ୍ୟଟନ କ୍ଷେତ୍ର ପାଇଁ ବେଶ୍ ପ୍ରସିଦ୍ଧ। ଦୁର୍ଗନ୍ଧ ତଥା ଆବର୍ଜନାପୂର୍ଣ୍ଣ ପରିବେଶ ପର୍ଯ୍ୟଟକ ତଥା ଲୋକଙ୍କ ମନରେ ନକାରାତ୍ମକ ପ୍ରଭାବ ମଧ୍ୟ ପକାଉଥିବା ଅଭିଯୋଗ ହେଉଛି। ତେଣୁ ପଞ୍ଚାୟତରେ ଆବର୍ଜନା ସଫେଇ ଦିଗରେ ସ୍ବାସ୍ଥ୍ୟ ବିଭାଗ ଓ ପ୍ରଶାସନ ପକ୍ଷରୁ ସ୍ଥାୟୀ ପଦକ୍ଷେପ ଗ୍ରହଣ ନିମନ୍ତେ ବିଭିନ୍ନ ମହଲରେ ଦାବି କରାଯାଇଛି। ଡ୍ରେନ୍ ସଫେଇ କାର୍ଯ୍ୟ ପଞ୍ଚାୟତ କାର୍ଯ୍ୟାଳୟର ସୀମିତ ଅର୍ଥରେ ସହଜ ମନେ ହେଉ ନ ଥିବାରୁ ବ୍ଲକ ପ୍ରଶାସନ ପକ୍ଷରୁ ଏ ଦିଗରେ ବିଶେଷ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହେଉଛି ା ସୂଚନାଯୋଗ୍ୟ କି, ନାଏବ ସରପଞ୍ଚ ଗୀତାଞ୍ଜଳି ବେହେରାଙ୍କ ବାସଗୃହ ନିକଟରେ ମଧ୍ୟ ନର୍ଦ୍ଦମା ଜଳ ଭାସୁଛି। ସେ କହିଥିଲେ ଯେ ଆମେ ଏ ସମସ୍ୟା ନେଇ ବାରମ୍ବାର ଅଭିଯୋଗ କରିବା ପରେ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଓ ବ୍ଲକ କନିଷ୍ଠ ଯନ୍ତ୍ରୀ ସମ୍ପୃକ୍ତ ଅଞ୍ଚଳର ଡ୍ରେନ୍ଗୁଡ଼ିକର ସ୍ଥିତି ଅନୁଧ୍ୟାନ କରିଥିଲେ। ଏ ଦିଗରେ ସେମାନେ ପଦକ୍ଷେପ ଗ୍ରହଣ କରିବେ ବୋଲି ସୂଚନା ଦେଇଥିବା ନାଏବ ସରପଞ୍ଚ କହିଛନ୍ତି।
