ବାଲେଶ୍ୱର ଅଫିସ, ୨୦।୯-ବାଲେଶ୍ୱର ଓଟିରୋଡ୍ର କୁରୁଡ଼ା ବାଇପାସ୍ରୁ ରେମୁଣା ଗୋଲେଇ ପର୍ଯ୍ୟନ୍ତ ରାସ୍ତାର ସମ୍ପ୍ରସାରଣ ପାଇଁ ଉଭୟପାର୍ଶ୍ୱରେ ଜବରଦଖଲକାରୀ ଦୋକାନୀଙ୍କୁ ପ୍ରଶାସନ ପକ୍ଷରୁ ଉଚ୍ଛେଦ କରାଯିବା ପାଇଁ ବାଲେଶ୍ୱର ପ୍ରଶାସନ ପକ୍ଷରୁ ଅଭିଯାନ ଆରମ୍ଭ ହୋଇଛି। ବିଭିନ୍ନ ବ୍ୟବସାୟୀ ସଂଘ ପକ୍ଷରୁ ଏହାକୁ ବିରୋଧ କରାଯାଇଛି। ଗୁରୁବାର ସନ୍ଧ୍ୟାରେ ଆଇଟିଆଇସ୍ଥିତ ଇଡ୍କୋ ଛକରେ ବ୍ୟବସାୟୀମାନେ ଏକ ମେଳି କରି ଏଥିରେ ୭୦ରୁ ଊର୍ଦ୍ଧ୍ୱ ଦୋକାନୀ ସାମିଲ ହୋଇଥିଲେ। ଦୀର୍ଘଦିନ ଧରି ବ୍ୟବସାୟ କରି ପରିବାର ଭରଣପୋଷଣ କରୁଥିବାରୁ ପ୍ରଶାସନ ପ୍ରଥମେ ଥଇଥାନ କରି ଉଚ୍ଛେଦ କରିବା ପାଇଁ ଦାବି ହୋଇଛି।
ପ୍ରଶାସନ ପକ୍ଷରୁ ଆସନ୍ତା ୨୦, ୨୧ ଓ ୨୨ ତାରିଖରେ ଆଇଟିଆଇରୁ ତାମୁଳିଆ ଫାଟକ ପର୍ଯ୍ୟନ୍ତ ଥିବା ୭୦ରୁ ଊର୍ଦ୍ଧ୍ୱ ଦୋକାନୀଙ୍କୁ ଉଚ୍ଛେଦ କରିବା ପାଇଁ ଗତ ଦୁଇଦିନ ଧରି ଡାକବାଜି ଯନ୍ତ୍ର ଦ୍ୱାରା ବାରମ୍ବାର ସୂଚିତ କରାଯାଇଛି। ରାସ୍ତାର ଉଭୟପାର୍ଶ୍ୱରେ ସରକାରୀ ଜାଗାରେ ପକାଇଥିବା ଗୁମୁଟି ଏବଂ ବେଆଇନ ଭାବେ ନିର୍ମାଣ କରିଥିବା ପକ୍କା ଦୋକାନ ଘରକୁ ଭାଙ୍ଗି ସ୍ବଇଚ୍ଛାରେ ନିଜର ଜିନିଷପତ୍ର ନେଇଯିବା ପାଇଁ ନିବେଦନ କରାଯାଇଛି। ପୂର୍ବରୁ ଆରମ୍ଭ ହୋଇଥିବା ଉଚ୍ଛେଦ ପ୍ରକ୍ରିୟାକୁ ଦୋକାନୀମାନଙ୍କ ଅନୁରୋଧକ୍ରମେ ପ୍ରଶାସନ କିଛିଦିନ ସମୟ ଦେଇଥିଲା। କିନ୍ତୁ ଦୋକାନୀମାନେ ଏଥିରେ ସହଯୋଗ ନ କରି ମିଳିତ ଭାବେ ବିରୋଧ କରିବା ଆରମ୍ଭ କରିଛନ୍ତି। ବୈଠକରେ ପୂର୍ବତନ ସଦର ବିଧାୟକ ଅରୁଣ ଦେ, ଭାଜପା ନଗର ସଭାପତି ସୀତାକାନ୍ତ ସ୍ବାଇଁ, ପୂର୍ବତନ କାଉନ୍ସିଲର ଚିତ୍ତରଞ୍ଜନ ପଣ୍ଡା, ଯୁବନେତା ମନୋଜ ପୋଦ୍ଦାର ଏବଂ ରେମୁଣା ବିଧାୟକ ସୁଧାଂଶୁ ଶେଖର ପରିଡ଼ା ଯୋଗଦେଇ ଭିନ୍ନ ଭିନ୍ନ ମତ ରଖିଥିଲେ। ବିଧାୟକ ପରିଡ଼ାଙ୍କ କହିବାନୁସାରେ ବ୍ୟବସାୟୀମାନଙ୍କର ଥଇଥାନ କଥା ପ୍ରଶାସନ ଚିନ୍ତା କରିବା ଉଚିତ୍। ସେହିପରି ପୂର୍ବତନ ବିଧାୟକ ଦେ ମଧ୍ୟ ଆଗ ଥଇଥାନ ପରେ ଉଚ୍ଛେଦ ଉପରେ ଗୁରୁତ୍ୱ ଦେଇଥିଲେ। ଆୟୋଜିତ ବୈଠକ ଗଗନ ସେଠୀଙ୍କ ନେତୃତ୍ୱରେ ହୋଇଥିବାବେଳେ ବହୁ ଦୋକାନୀ ଏଥିରେ ଯୋଗଦେଇଥିଲେ।
