ମାଡ୍ରିଡ୍,୧୭।୫: ଫ୍ରାନ୍ସ କିମ୍ବଦନ୍ତୀ ଫୁଟ୍ବଲର ଜିନେଡାଇ ଜିଡାନ ରିୟଲ ମାଡ୍ରିଡ୍ କ୍ଲବର କୋଚ୍ ପଦ ଛାଡିବେ ବୋଲି ସୂଚନା ଦେଇଛନ୍ତି। ଚଳିତ ସେସନ ଶେଷ ଆଡକୁ ସେ ଲା ଲିଗା କ୍ଲବର କୋଚ୍ ପଦ ପରିତ୍ୟାଗ କରିବେ ବୋଲି ନିଜ ଖେଳାଳିମାନଙ୍କୁ କହିଛନ୍ତି। ଏ ନେଇ ସ୍ପାନିଶ ଗଣମାଧ୍ୟମ ରିପୋର୍ଟ ପ୍ରକାଶ କରିଛି। ତେବେ ୨୦୨୨ ପର୍ଯ୍ୟନ୍ତ ଜିଡାନଙ୍କ ଚୁକ୍ତି ବଳବତ୍ତର ରହିଛି।
ଦ୍ୱିତୀୟ ଥର ପାଇଁ ଜିଡାନ ରିୟଲ ମାଡ୍ରିଡ କୋଚ ପଦ ଛାଡିବାର ଅବକାଶ ସୃଷ୍ଟି ହୋଇଛି। ଏହାପୂର୍ବରୁ ସେ ୨୦୧୮ରେ ଚାମ୍ପିୟନ୍ସ ଲିଗ୍ ବିଜୟ ପରେ ହେଡ୍ କୋଚ୍ ପଦରୁ ଇସ୍ତଫା ଦେଇଥିଲେ। ଅବଶ୍ୟ ସେ ୨୦୧୬ରୁ ରିୟଲ ମାଡ୍ରିଡର କୋଚ୍ ପଦରେ ରହିଆସିଛନ୍ତି। ୪୮ ବର୍ଷୀୟ ଜିଡାନ ପୂର୍ବରୁ ୨୦୧୪ରୁ ୨୦୧୬ ପର୍ଯ୍ୟନ୍ତ ରିୟଲ ମାଡ୍ରିଡ୍ କାଷ୍ଟିଲାର ହେଡ୍ କୋଚ୍ ଦାୟିତ୍ୱରେ ରହି ବେଶ୍ ସଫଳତା ହାସଲ କରିଥିଲେ। ନିଜର ସିନିୟର କ୍ୟାରିୟରରେ ଜିଡାନ ଫ୍ରାନ୍ସ ତରଫରୁ ପ୍ରତିନିଧିତ୍ୱ କରି ୧୦୮ଟି ମ୍ୟାଚ୍ ଖେଳିବା ସହ ୩୧ଟି ଗୋଲ ସ୍କୋର କରିଛନ୍ତି। ୧୯୯୮ ଫିଫା ବିଶ୍ୱକପ୍ରେ ସେ ଫ୍ରାନ୍ସକୁ ଚାମ୍ପିୟନ କରାଇବାରେ ମୁଖ୍ୟ ଭୂମିକା ଗ୍ରହଣ କରିଥିଲେ।
