ଗୋପ,୧୮।୮( ଭାରତୀ ଭୂଷଣ ଉପାଧ୍ୟାୟ): ମଙ୍ଗଳବାର ଭୋର ସମୟରେ ଗୋପ ଥାନା ଅନ୍ତର୍ଗତ ଗଣେଶ୍ବରପୁର ଗ୍ରାମରେ ଛୁରାମାଡ଼ ହୋଇଛି । ରାମଚନ୍ଦ୍ର ରଥଙ୍କ ଏକମାତ୍ର ପୁତ୍ର ବିକି ରଥ (୩୧) କୈଣସି କାରଣକୁ ନିଜ ବାପା ରାମଚନ୍ଦ୍ରଙ୍କୁ ମାଡ଼ ମାରିବା ସହ ଛୁରିରେ ଆକ୍ରମଣ କରିଥିଲେ । ଗୁରୁତର ଅବସ୍ଥାରେ ରାମଚନ୍ଦ୍ରଙ୍କୁ ଗୋପ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଚିକିତ୍ସା ପରେ ସେ ଗୋପ ଥାନାରେ ଅଭିଯୋଗ କରିଥିଲେ।
ଗୋପ ଥାନା ଅଧିକାରୀ ଦୁର୍ଗାଚରଣ ମହାପାତ୍ରଙ୍କ ନେତୃତ୍ବରେ ଏକ ଟିମ୍ ଗଣେଶ୍ବରପୁର ଗ୍ରାମରେ ପହଞ୍ଚି ଥିଲା। ପୋଲିସକୁ ଯୁବକ ଜଣଙ୍କ ଦେଖି ଏକ କୋଠରୀ ମଧ୍ୟରେ ଗୋଟିଏ ଛୁରି ଧରି ରହିଥିଲା। ଗୋପ ଥାନାର କନଷ୍ଟେବଳ ଛୁପେଶ୍ବର ନାୟକ ସେହି କୋଠରୀ ମଧ୍ୟରେ ପଶିବା କ୍ଷଣି ଯୁବକ ଜଣଙ୍କ ତାଙ୍କୁ ହଠାତ୍ ଆକ୍ରମଣ କରିଥିଲା। ଛୁରି ମାଡରେ କନଷ୍ଟେବଳଙ୍କ ମୁହଁରେ ଆଘାତ ଲାଗିଥିଲା। ସଙ୍ଗେ ସଙ୍ଗେ ତାଙ୍କୁ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରା ଯାଇଥିଲା। ଦୀର୍ଘ ଦୁଇ ଘଣ୍ଟା ଧରି ପୋଲିସ ଓ ଅଗ୍ନିଶମ ବିଭାଗ କର୍ମଚାରୀମାନଙ୍କୁ ଛୁରି ଦେଖାଇ ଭୟଭୀତ କରୁଥିବା ଯୁବକକୁ କାବୁ କରାଯାଇ ପାରି ନ ଥିବା ଜଣାପଡିଛି । ହେଲେ କାବୁ କରିବାକୁ ଯାଇଥିବା ଗୋପ ଥାନାର ଏଏସ୍ଆଇ ଶିବରାମ ଶତପଥୀ, ରବିନ୍ଦ୍ର କୁମାର ସାମନ୍ତରାୟଙ୍କୁ ଯୁବକ ଜଣଙ୍କ ଆକ୍ରମଣ କରିଛନ୍ତି ।
ଛୁରି ମାଡରେ ଦୁଇ ପୋଲିସ ଅଫିସର ଆହତ ଅବସ୍ଥାରେ ଗୋପ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ଏବେ ସୁଦ୍ଧା ଯୁବକ ଜଣଙ୍କ ଛୁରୀ ଧରି ଘର ଭିତରେ ରହିଥିବା ବେଳେ ଶହଶହ ଲୋକ ଘଟଣା ସ୍ଥଳରେ ରହିଛନ୍ତି । ଖବର ଯିବା ପର୍ଯ୍ୟନ୍ତ ଯୁବକକୁ କାବୁ କରାଯାଇ ପାରିନାହିଁ।
