ଭୁବନେଶ୍ୱର, ୨୫।୧(ବ୍ୟୁରୋ): ଓଡ଼ିଶାର ମାଓବାଦୀ ପ୍ରଭାବିତ ମାଲକାନଗିରି ଜିଲାର ସ୍ବାଭିମାନ ଅଞ୍ଚଳରେ ଜାନୁୟାରୀ ୨୬ ଗଣତନ୍ତ୍ର ଦିବସରୁ ବହୁ ପ୍ରତୀକ୍ଷିତ ବୋଟ୍ ଆମ୍ବୁଲାନ୍ସ ସେବା ଆରମ୍ଭ ହେବ। ଫଳରେ ଜଳବନ୍ଦୀ ଅଞ୍ଚଳର ୧୫୧ ଗ୍ରାମର ବାସିନ୍ଦା ଉପକୃତ ହେବେ। ଲାଲ୍ବାହିନୀ ଉପଦ୍ରୁତ ଅଞ୍ଚଳରେ ସୁରକ୍ଷା ବାହିନୀର ଦୃଢ଼ କାର୍ଯ୍ୟାନୁଷ୍ଠାନରେ ମାଓବାଦୀ ସଙ୍ଗଠନ ଦୋହଲିଗଲାଣି। ନୂଆ ଯୁବଗୋଷ୍ଠୀ ସଙ୍ଗଠନରେ ଯୋଗଦେଉନାହାନ୍ତି। ସାଧାରଣ ଲୋକଙ୍କ ମଧ୍ୟରେ ଆତ୍ମବିଶ୍ୱାସ ବୃଦ୍ଧି ପାଉଛି। ଆଗାମୀ ଦିନରେ ମାଓବାଦୀ ଦମନ କାର୍ଯ୍ୟକ୍ରମକୁ ଆହୁରି ଜୋର୍ଦାର କରାଯିବ ବୋଲି କହିଛନ୍ତି ଓଡ଼ିଶା-ଛତିଶଗଡ଼ ସ୍ବତନ୍ତ୍ର ଅପରେଶନ ଦାୟିତ୍ୱରେ ଥିବା ସୀମା ସୁରକ୍ଷା ବାହିନୀ (ବିଏସ୍ଏଫ୍)ର ଅତିରିକ୍ତ ମହାନିର୍ଦ୍ଦେଶକ (ଏଡିଜି) ରାଜଓ୍ବିନ୍ଦର ସିଂ ଭଟ୍ଟି।
ସୋମବାର ରାୟପୁରରେ ଆୟୋଜିତ ଖବରଦାତା ସମ୍ମିଳନୀରେ ଗଣମାଧ୍ୟମକୁ ସୂଚନା ଦେଇ ଏଡିଜି ଭଟ୍ଟି ଓଡ଼ିଶା ଏବଂ ଛତିଶଗଡ଼ରେ ମୁତୟନ ବିଏସ୍ଏଫ ଯବାନ ଏବଂ ଅନ୍ୟ ଅର୍ଦ୍ଧ ସାମରିକ ବାହିନୀର କାର୍ଯ୍ୟଧାରା ସମ୍ପର୍କରେ ସବିଶେଷ ସୂଚନା ଦେଇଛନ୍ତି। ଗତ ୧୦ବର୍ଷରେ ମାଓବାଦୀଙ୍କ ସହ ସଂଘର୍ଷରେ ୩୮ ବିଏସ୍ଏଫ୍ ଯବାନ ଶହୀଦ ହୋଇଛନ୍ତି। ଏହି ସମୟରେ ୧,୬୫୦ ମାଓବାଦୀଙ୍କୁ ଗିରଫ କରାଯାଇଛି। ୮୯୧ଜଣଙ୍କୁ ଆତ୍ମସମର୍ପଣ ପାଇଁ ବାଧ୍ୟ କରାଯାଇଛି। ସୁରକ୍ଷା କର୍ମୀଙ୍କ କାର୍ଯ୍ୟାନୁଷ୍ଠାନରେ ୧୭ ମାଓବାଦୀଙ୍କ ମୃତ୍ୟୁ ଘଟିଛି। ବିପୁଳ ପରିମାଣର ବିସ୍ଫୋରକ ସାମଗ୍ରୀ ଏବଂ ଅସ୍ତ୍ରଶସ୍ତ୍ର ଜବତ କରାଯାଇଛି।
ସୁରକ୍ଷା ବାହିନୀ ପକ୍ଷରୁ ସାମାଜିକ କାର୍ଯ୍ୟକ୍ରମ ସ୍ବରୂପ କୋରାପୁଟ ଏବଂ ମାଲକାନଗିରି ଜିଲାରେ ୨୨ ମେଡିକାଲ କ୍ୟାମ୍ପ କରାଯାଇ ୪ହଜାର ୩୬୨ ରୋଗୀଙ୍କ ଚିକିତ୍ସା କରାଯାଇଛି। ଲକ୍ଡାଉନ ସମୟରେ ଏହି ଦୁଇ ଜିଲାର ବହୁ ଲୋକଙ୍କୁ ଖାଦ୍ୟଶସ୍ୟ, କୃଷି ଉପକରଣ, ମଶାରି, ବାସନକୁସନ, ଛାତ୍ରୀଛାତ୍ରଙ୍କୁ ପାଠ୍ୟ ଉପକରଣ ଯୋଗାଇ ଦିଆଯାଇଛି। ୨୫୦ ତଫସିଲଭୁକ୍ତ ଯୁବକଙ୍କୁ ଦେଶର ବିଭିନ୍ନ ସ୍ଥାନ ଭ୍ରମଣ କରାଯାଇ ସାଂସ୍କୃତିକ ବିଭବ ସହ ପରିଚିତ କରାଯାଇଛି। ସେହିପରି ଓଡ଼ିଶାରେ ବିଭିନ୍ନ ସ୍ଥାନରେ ଥିବା ୧୨୮ ରାସ୍ତା ପ୍ରକଳ୍ପ, ୪୪ ନିର୍ମାଣାଧୀନ ପୋଲ ଏବଂ ୧୯୬ଟି ମୋବାଇଲ ଟାୱାରକୁ ସୁରକ୍ଷା ଯୋଗାଇ ଦିଆଯାଇଛି। ପରିବେଶ ସୁରକ୍ଷା ଲାଗି ପଦକ୍ଷେପ ସ୍ବରୂପ ବନୀକରଣ କାର୍ଯ୍ୟ ହାତକୁ ନିଆଯାଇଥିବା ଭଟ୍ଟି ସୂଚନା ଦେଇଛନ୍ତି।
