ନୂଆଦିଲ୍ଲୀ,୩୦।୯: ଆପଣଙ୍କ ନିକଟରେ ଜନଧନ ବ୍ୟାଙ୍କ ଆକାଉଣ୍ଟ ଅଛି କି? ଯଦି ହଁ, ତେବେ ଏହି ଖବର ଆପଣଙ୍କ ପାଇଁ ଉପଯୋଗୀ ହୋଇପାରେ। ପ୍ରଧାନମନ୍ତ୍ରୀ ଜନଧନ ଯୋଜନା ଆରମ୍ଭ ହେବାର ୧୦ବର୍ଷ ପୂରଣ ହୋଇଛି। ଏହି ଯୋଜନା ସେହି ଲୋକମାନଙ୍କୁ ବ୍ୟାଙ୍କିଂ ସିଷ୍ଟମ ସହ ଯୋଡ଼ିବାରେ ସହାୟକ ହୋଇଛି, ଯେଉଁମାନଙ୍କର ନିଜସ୍ବ ବ୍ୟାଙ୍କ ଆକାଉଣ୍ଟ ନ ଥିଲା। ଯେତେବେଳେ ଏହି ଯୋଜନା ଆରମ୍ଭ ହୋଇଥିଲା, ସେତେବେଳେ ବିନା କୌଣସି ଡିପୋଜିଟ୍, ନ୍ୟୂନତମ ବାଲାନ୍ସ ଆବଶ୍ୟକତା, ଜିରୋ ବାଲାନ୍ସରେ ବହୁ ସଂଖ୍ୟାରେ ଆକାଉଣ୍ଟ ଖୋଲାଯାଇଥିଲା। କିନ୍ତୁ ନିୟମ ଅନୁଯାୟୀ, ବ୍ୟାଙ୍କ ଆକାଉଣ୍ଟ ଖୋଲାଯିବାର ୧୦ ବର୍ଷ ପରେ କେୱାଇସି (ନୋ ୟୋର କଷ୍ଟମର) ଅପଡେଟ୍ କରିବା ଆବଶ୍ୟକ। ୨୦୧୪-୨୦୧୫ରେ ଖୋଲାଯାଇଥିବା ଜନଧନ ଆକାଉଣ୍ଟ ଧାରକମାନଙ୍କୁ ରି-କେୱାଇସି କରାଇବାକୁ ହେବ, କାରଣ ଏହି ଆକାଉଣ୍ଟଗୁଡ଼ିକର କେୱାଇସି ବୈଧତା ୧୦ ବର୍ଷ ପାଇଁ ରହିଛି।
ଆକାଉଣ୍ଟ ସକ୍ରିୟ ରଖିବା ପାଇଁ କ’ଣ କରିବା ଦରକାର?
ଆକାଉଣ୍ଟକୁ ଆଗକୁ ମଧ୍ୟ ସକ୍ରିୟ ରଖିବା ପାଇଁ ଏହି କାମ କରିବା ଆବଶ୍ୟକ, ନଚେତ ଆପଣଙ୍କ ବ୍ୟାଙ୍କ ଆକାଉଣ୍ଟ ବନ୍ଦ ହୋଇଯାଇପାରେ। ଆପଣ ଏଥିରୁ ପୁଣି ଟଙ୍କା ଉଠାଇ ପାରିବେ ନାହିଁ କିମ୍ବା ଜମା କରି ପାରିବେ ନାହିଁ। ସରକାର ୩୦ ସେପ୍ଟେମ୍ବର ୨୦୨୫ ପର୍ଯ୍ୟନ୍ତ ଏହି ଆକାଉଣ୍ଟଗୁଡ଼ିକର କେୱାଇସି କରାଇବାକୁ ବାଧ୍ୟତାମୂଳକ କରିଛନ୍ତି।
ଡେଡ଼ଲାଇନ କ’ଣ?
ସରକାର ୩୦ ସେପ୍ଟେମ୍ବର ୨୦୨୫ ପର୍ଯ୍ୟନ୍ତ ସମସ୍ତ ଆକାଉଣ୍ଟ ଧାରକଙ୍କୁ ରି-କେୱାଇସି କରାଇବାକୁ ବାଧ୍ୟତାମୂଳକ କରିଛନ୍ତି। ଯଦି ଆପଣ ଏହି ସମୟ ପର୍ଯ୍ୟନ୍ତ ଏହି ପ୍ରକ୍ରିୟା ସମ୍ପୂର୍ଣ୍ଣ ନ କରନ୍ତି, ତେବେ ଆପଣଙ୍କ ଜନଧନ ଆକାଉଣ୍ଟ ବନ୍ଦ ହୋଇପାରେ। ରି-କେଓୱାଇସି ପ୍ରକ୍ରିୟା ଅତ୍ୟନ୍ତ ସହଜ। ଏଥିରେ ଆପଣ ବ୍ୟାଙ୍କ ଶାଖାକୁ ଯାଇ ନିଜର ପୁରୁଣା ତଥ୍ୟ ଯେପରି ନାମ, ଠିକଣା ଏବଂ ଫଟୋ ଅପଡେଟ କରିପାରିବେ। ଏହା ଠକେଇକୁ ରୋକିବାରେ ସାହାଯ୍ୟ କରେ ଏବଂ ବ୍ୟାଙ୍କିଂ ସେବାକୁ ସୁଗମ ରଖିଥାଏ। ଏହି ପ୍ରକ୍ରିୟା ପାଇଁ କୌଣସି ଶୁଳ୍କ ଲାଗୁ ହୁଏ ନାହିଁ।
ଜନଧନ ଆକାଉଣ୍ଟର ସଂଖ୍ୟା
ଗତ ଦଶ ବର୍ଷ ମଧ୍ୟରେ ଜନଧନ ଆକାଉଣ୍ଟର ସଂଖ୍ୟା ନିରନ୍ତର ବୃଦ୍ଧି ପାଇଛି। ୨୦୧୫ରେ ୧୪.୭୨ କୋଟି ଆକାଉଣ୍ଟ ଖୋଲାଯାଇଥିଲା। ୨୦୧୭ ସୁଦ୍ଧା ଏହା ୨୮.୧୭ କୋଟିକୁ ବୃଦ୍ଧି ପାଇଥିଲା। ୨୦୧୯ରେ ଏହା ୩୫.୨୭ କୋଟି, ୨୦୨୧ରେ ୪୨.୨୦ କୋଟି ଏବଂ ୨୦୨୩ରେ ୪୮.୬୫ କୋଟିକୁ ପହଞ୍ଚିଥିଲା। ଅନୁମାନ କରାଯାଉଛି ଯେ ୨୦୨୫ ସୁଦ୍ଧା ଏହି ସଂଖ୍ୟା ୫୬.୧୬ କୋଟିକୁ ପହଞ୍ଚିପାରେ।
ଆକାଉଣ୍ଟ ବନ୍ଦ ହେବାର ଆଶଙ୍କା
ଯଦି ୩୦ ସେପ୍ଟେମ୍ବର ୨୦୨୫ ପର୍ଯ୍ୟନ୍ତ ରି-କେଓୱାଇସି କରାଯାଏ ନାହିଁ, ତେବେ ଆକାଉଣ୍ଟ ନିଷ୍କ୍ରିୟ ବା ଇନଅପରେଟିଭ ହୋଇପାରେ। ଏହା ଦ୍ୱାରା ଲେଣଦେଣ ବନ୍ଦ ହୋଇପାରେ ଏବଂ ସରକାରୀ ସବସିଡି ପାଇବାରେ ମଧ୍ୟ ଅସୁବିଧା ହୋଇପାରେ। ଏହାକୁ ଦୃଷ୍ଟିରେ ରଖି ସରକାରୀ ବ୍ୟାଙ୍କଗୁଡ଼ିକ ୧ ଜୁଲାଇରୁ ୩୦ ସେପ୍ଟେମ୍ବର ୨୦୨୫ ପର୍ଯ୍ୟନ୍ତ ସମଗ୍ର ଦେଶରେ ଗ୍ରାମ ପଞ୍ଚାୟତ ସ୍ତରରେ କ୍ୟାମ୍ପ ଆୟୋଜନ କରୁଛନ୍ତି। ଏହି କ୍ୟାମ୍ପଗୁଡ଼ିକରେ ବ୍ୟାଙ୍କ କର୍ମଚାରୀମାନେ ସିଧାସଳଖ ଆକାଉଣ୍ଟ ଧାରକଙ୍କ ଘରେ ପହଞ୍ଚି ରି-କେଓୱାଇସି କରୁଛନ୍ତି। ଏଯାଏଁ ପ୍ରାୟ ୧ ଲକ୍ଷ ଗ୍ରାମ ପଞ୍ଚାୟତରେ କ୍ୟାମ୍ପ ଆୟୋଜିତ ହୋଇସାରିଛି।
ଜନଧନ ଆକାଉଣ୍ଟର ସୁବିଧା
ଜନଧନ ଆକାଉଣ୍ଟ ହେଉଛି ଜିରୋ ବାଲାନ୍ସ ଆକାଉଣ୍ଟ, ଅର୍ଥାତ ଏଥିରେ କୌଣସି ନ୍ୟୂନତମ ରାଶି ରଖିବାର ଆବଶ୍ୟକତା ନାହିଁ। ଆକାଉଣ୍ଟ ସହିତ ମାଗଣା ରୁପେ କାର୍ଡ ମିଳିଥାଏ, ଯାହା ଦ୍ୱାରା ଆପଣ ଏଟିଏମରୁ ଟଙ୍କା ଉଠାଇ ପାରିବେ କିମ୍ବା ଦୋକାନରେ ପେମେଣ୍ଟ କରିପାରିବେ। ଆକାଉଣ୍ଟ ଧାରକମାନଙ୍କୁ ପ୍ରଦାନ କରାଯାଇଥିବା ରୁପେ କାର୍ଡ ସହିତ ୨ ଲକ୍ଷ ଟଙ୍କାର ଦୁର୍ଘଟଣା ବୀମା ମଧ୍ୟ ମିଳିଥାଏ। ଏହା ବ୍ୟତୀତ, ଆକାଉଣ୍ଟ ଉପରେ ୧୦,୦୦୦ ଟଙ୍କା ପର୍ଯ୍ୟନ୍ତ ଓଭରଡ୍ରାଫ୍ଟ (ଋଣ) ସୁବିଧା ମଧ୍ୟ ଉପଲବ୍ଧ।
