ନୂଆଦିଲ୍ଲୀ,୨୮।୧୦ : ଯଦି କୌଣସି ଯୁବତୀ ଜଣେ ପୁଅକୁ ପସନ୍ଦ କରନ୍ତି ତା’ହେଲେ ସେହି ପୁଅକୁ ବିବାହ କରିବାର ଅଧିକାର ତାଙ୍କର ଅଛି। ପରିବାର ମଧ୍ୟ ଏଥିରେ ଆପତ୍ତି କରିପାରିବେ ନାହିଁ। ସମ୍ବିଧାନ ଅନୁଯାୟୀ, ଯୁବତୀଙ୍କର ନିଜ ପସନ୍ଦର ପୁଅକୁ ବିବାହ କରିବାର ସମସ୍ତ ଅଧିକାର ଅଛି। ନାଗରିକମାନଙ୍କୁ ସୁରକ୍ଷା ଯୋଗାଇବା ରାଜ୍ୟ ସରକାରଙ୍କ ସାମ୍ବିଧାନିକ କର୍ତ୍ତବ୍ୟ। ତେଣୁ ପୋଲିସ ବିବାହିତ ଦମ୍ପତିଙ୍କୁ ସୁରକ୍ଷା ଯୋଗାଇବା ଉଚିତ। ଯୁବତୀଙ୍କର ମାତାପିତା କିମ୍ବା ପରିବାର ସଦସ୍ୟଙ୍କ ଏଥିରେ କୌଣସି ବାଧା ଦେବା ଉଚିତ ନୁହେଁ। ଏହି ଐତିହାସିକ ରାୟ ଦିଲ୍ଲୀ ହାଇକୋର୍ଟ ଏକ ମାମଲାର ଶୁଣାଣି ବେଳେ ପ୍ରଦାନ କରିଛନ୍ତି।
ଜଷ୍ଟିସ ତୁଷାର ରାଓ ଗେଡେଲାଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏହି ରାୟ ଦେଇଛନ୍ତି। ପ୍ରେମ ବିବାହ ପରେ ଦୁଇ ଙ୍ପରିବାରରୁ ଆସୁଥିବା ଧମକ ଦ୍ୱାରା ଅସୁବିଧାରେ ପଡ଼ିଥିବା ଦମ୍ପତିଙ୍କୁ ସୁରକ୍ଷା ପ୍ରଦାନ କରୁଥିବାବେଳେ ଖଣ୍ଡପୀଠ ଏହି ମନ୍ତବ୍ୟ ଦେଇଛନ୍ତି। ହାଇକୋର୍ଟ କହିଛନ୍ତି ଆବେଦନକାରୀ ଜଣେ ସାବାଳିକା। ଉଭୟ ପରସ୍ପରକୁ ପସନ୍ଦ କରୁଥିବାରୁ ବିବାହ କରିଥିଲେ। ଉଭୟ ପରସ୍ପରକୁ ଭଲ ପାଉଥିଲେ। ସେମାନେ ସାବାଳକ ହୋଇଥିବା ନେଇ କୌଣସି ସନ୍ଦେହ ନାହିଁ। ଉଭୟଙ୍କର ନିଜ ନିଜ ପସନ୍ଦ ଅନୁଯାୟୀ ବିବାହ କରିବାର ଅଧିକାର ଅଛି। ଏଭଳି ସମ୍ପର୍କକୁ ନେଇ ପରିବାର ସଦସ୍ୟ ମଧ୍ୟ ଆପତ୍ତି କରିପାରିବେ ନାହିଁ। ଯଦି ପ୍ରେମ ବିବାହ ପାଇଁ ପରିବାର ଦ୍ୱାରା ସେମାନଙ୍କୁ ଧମକ ଦିଆଯାଉଛି ତେବେ ଏହା ଭୁଲ ଅଟେ। ଏହାକୁ ସହ୍ୟ କରାଯିବ ନାହିଁ। ପୋଲିସ ସେମାନଙ୍କୁ ସମ୍ପୂର୍ଣ୍ଣ ସୁରକ୍ଷା ଯୋଗାଇବା ଉଚିିତ।
ହାଇକୋର୍ଟରେ ଦାଖଲ ହୋଇଥିବା ଆବେଦନକାରୀ ଦର୍ଶାଇଛନ୍ତି ସେମାନେ ମାତାପିତାଙ୍କ ଇଚ୍ଛା ବିରୁଦ୍ଧରେ ଏପ୍ରିଲରେ ବିବାହ କରିଥିଲେ। ସେମାନେ ଖୁସିରେ ଜୀବନ ବିତାଉଥିବା ବେଳେପରିବାର ସଦସ୍ୟ, ବିଶେଷକରି ଝିଅର ପରିବାର ଧମକ ଦେବା ଆରମ୍ଭ କରିଥିଲେ। । ଉଭୟ ପକ୍ଷ ଏବଂ ଓକିଲଙ୍କ ଯୁକ୍ତି ଶୁଣିବା ପରେ ହାଇକୋର୍ଟ ଯୁବକଙ୍କ ବିରୋଧରେ ପଞ୍ଜୀକୃତ ମାମଲାକୁ ଖାରଜ କରି ଦେଇଛନ୍ତି। ଉଭୟ ଆବେଦନକାରୀଙ୍କୁ ସୁରକ୍ଷା ଯୋଗାଇବା ଏବଂ ସେମାନଙ୍କ ମଧ୍ୟରୁ କାହାର ଯେପରିି କିଛି କ୍ଷତି ନ ହେବ ସେଥିଲାଗି କୋର୍ଟ ନିର୍ଦ୍ଦେଶ ଦେଇଛନ୍ତି।
