କାବୁଲ,୧୭।୮: ତାଲିବାନ କ୍ଷମତା ଦଖଲ ପରେ ଆଫଗାନିସ୍ତାନରେ ଅନିଶ୍ଚିତତା ଦେଖାଦେଇଛି। ରବିବାର ତାଲିବାନ କାବୁଲ ଏବଂ ରାଷ୍ଟ୍ରପତି ଭବନ କବ୍ଜା କରିଥିଲା। ଏହାପୂର୍ବରୁ ରାଷ୍ଟ୍ରପତି ଅଶରଫ୍ ଗନି ଦେଶ ଛାଡ଼ିଦେଇଥିଲେ। ଫଳରେ ଦେଶରେ ଆତଙ୍କର ବାତାବରଣ ସୃଷ୍ଟି ହୋଇଛଇ। ଲୋକମାନେ ନିଜକୁ ଏବଂ ଦେଶର ଭବିଷ୍ୟତ ଅନ୍ଧାର ଆଡ଼କୁ ଯାଉଛି ବୋଲି ମତ ରଖୁଛନ୍ତି। ଏଭଳି ପରିସ୍ଥିତିରେ ଅନେକ ଲୋକ ଅନ୍ୟ ଦେଶରେ ଆଶ୍ରୟ ନେବାକୁ ପଳାୟନ କରୁଛନ୍ତି। ଫଳରେ ଚିନ୍ତାରେ ପଡ଼ିଯାଇଛନ୍ତି ଆଫଗାନିସ୍ତାନର କ୍ରିକେଟର। ନିକଟରେ ଦେଶର ତାରକା ସ୍ପିନର ରସିଦ ଖାନ ଶାନ୍ତି ପାଇଁ ନିବେଦନ କରିଥିଲେ। ଏହାଛଡ଼ା ହିଂସା ବୃଦ୍ଧି ପାଉଥିବା ବେଳେ ଦେଶ ନ ଛାଡ଼ିବାକୁ ବିଶ୍ୱ ନେତାମାନଙ୍କୁ କହିଥିଲେ।
ରସିଦ ଏବେ ଇଂଲଣ୍ଡରେ ‘ଦ ହଣ୍ଡ୍ରେଡ୍’ ଲିଗ୍ ଖେଳୁଛନ୍ତି। ହେଲେ ତାଙ୍କ ପରିବାର ଆଫଗାନିସ୍ତାନରେ ଫସି ରହିଛନ୍ତି। ଇଂଲଣ୍ଡର ପୂର୍ବତନ ଅଧିନାୟକ କେଭିନ ପିଟରସେନ ଏକ ମ୍ୟାଚ୍ ସମୟରେ ରସିଦଙ୍କ ସହ ଦେଶର ପରିସ୍ଥିତିକୁ ନେଇ ଆଲୋଚନା କରିଥିଲେ। ରସିଦ ବହୁତ ଚିନ୍ତିତ ଥିବା ବେଳେ ପରିବାରକୁ ସେଠାରୁ ବାହାର କରିପାରୁ ନ ଥିବା କହିଥିଲେ। ତେବେ ଏହା ପ୍ରଥମ ଥର ନୁହେଁ ଯେତେବେଳେ ରସିଦଙ୍କ ପରିବାର ଆଫଗାନିସ୍ତାନ ଛାଡ଼ିବାକୁ ନିଷ୍ପତ୍ତି ନେଇଛନ୍ତି। ଅନେକ ବର୍ଷ ପୂର୍ବେ ତାଙ୍କ ପରିବାର ତାଲିବାନଠାରୁ ରକ୍ଷା ପାଇବା ପାଇଁ ସମାନ ପଦକ୍ଷେପ ନେଇଥିଲେ। ସେମାନେ ଦେଶ ଛାଡ଼ି ପାକିସ୍ତାନରେ ଆଶ୍ରୟ ନେଇଥିଲେ।
୧୯୯୮ରେ ରସିଦଙ୍କ ଜନ୍ମ। ତାଙ୍କର ୧୦ ଭାଇ ଭଉଣୀ। ସେ ଛୋଟ ଥିବା ବେଳେ ୨୦୦୧ରେ ଆମେରିକାର ନାଟୋ ସେନା ତାଲିବାନକୁ ପରାସ୍ତ କରିଥିଲେ। ପରେ ଆଫଗାନିସ୍ତାନରେ ଅନିଶ୍ଚିତତା ବ୍ୟାପିବାରେ ଲାଗିଥିଲା। ଏଭଳି ସ୍ଥିତିରେ ରସିଦଙ୍କ ପରିବାର ଆଫଗାନିସ୍ତାନର ପଡୋଶୀ ଦେଶ ପାକିସ୍ତାନକୁ ଯାଇଥିଲେ। ସେଠାରେ ସେମାନେ କିଛି ବର୍ଷ ରହିଥିଲେ। ହେଲେ ପରେ ସେମାନେ ଦେଶକୁ ଫେରିଆସିଥିଲେ। ଏବେ ପୁଣିଥରେ ତାଲିବାନ କ୍ଷମତା ହାସଲ କରିଥିବାରୁ ରସିଦ ଓ ତାଙ୍କ ପରିବାର ଚିନ୍ତିତ ଅଛନ୍ତି।
୨୦୧୫ରେ ରସିଦ ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିଲେ। ସେ ନିଜର ସ୍ପିନ୍ ବୋଲିଂକୁ ନେଇ ଲୋକପ୍ରିୟ। ଏଯାବତ ସେ ୭୪ ଦିନିକିଆ ଏବଂ ୫୧ ଟି୨୦ ମ୍ୟାଚ୍ ଖେଳିଛନ୍ତି। ସେଥିରେ ସେ କ୍ରମଶଃ ୧୪୦ ଏବଂ ୯୫ ଉଇକେଟ ନେଇଛନ୍ତି। ଏହାଛଡ଼ା ସେ ୫ ଟେଷ୍ଟ ମ୍ୟାଚ୍ ଖେଳି ୩୪ ଉଇକେଟ ନେବାରେ ସଫଳ ହୋଇଛନ୍ତି। ସେ ଅନେକ ବଡ଼ କ୍ରିକେଟ ଲିଗ୍ ଖେଳନ୍ତି। ଆଇପିଏଲ୍ରେ ସନରାଇଜର୍ସ ହାଇଦ୍ରାବାଦ ଫ୍ରାଞ୍ଚାଇଜ୍ର ସେ ଅଂଶ।
