ନୂଆଦିଲ୍ଲୀ/ବନ୍ଦା,୧୩ା୮: ଉପର ଅବବାହିକାରେ ପ୍ରବଳ ବର୍ଷା ଲାଗିରହିବା ଫଳରେ ଯମୁନା ନଦୀ ବିପଦ ସଙ୍କେତ ଅତିକ୍ରମ କରି ଦିଲ୍ଲୀରେ ୨୦୫.୩୩ ମିଟର ଉଚ୍ଚରେ ପ୍ରବାହିତ ହେଉଛି। ଫଳରେ ନଦୀକୂଳବର୍ତ୍ତୀ ତଳିଆ ଅଞ୍ଚଳରୁ ଲୋକଙ୍କୁ ସ୍ଥାନାନ୍ତର କରିବା ଲାଗି ପ୍ରଶାସନ ପକ୍ଷରୁ ଯୋଜନା କରାଯାଇଛି। ଦିଲ୍ଲୀର ପୁରୁଣା ରେଲଓ୍ବେ ବ୍ରିଜ୍ ନିକଟରେ ଯମୁନା ନଦୀର ଜଳପତ୍ତନ ଶୁକ୍ରବାର ଅପରାହ୍ନରେ ୨୦୫.୨୯ ମିଟର ରହିଛି। ସେପଟେ ଗୁରୁବାର ସନ୍ଧ୍ୟାରେ ଉତ୍ତରପ୍ରଦେଶର ବନ୍ଦା ଜିଲା ଅନ୍ତର୍ଗତ ଯମୁନାରେ ବୋଟ୍ ବୁଡ଼ି ଘଟଣାରେ ଏବେ ବି ୨୫ ଜଣ ଯାତ୍ରୀ ନିଖୋଜ ଅଛନ୍ତି। ବର୍ତ୍ତମାନ ସୁଦ୍ଧା ୩ ଜଣଙ୍କ ମୃତଦେହ ମିଳିଛି। ଉଦ୍ଧାର କାର୍ଯ୍ୟରେ ଏନ୍ଡିଆର୍ଏଫ୍, ଏସ୍ଡିଆର୍ଏଫ୍ ଏବଂ ବୁଡ଼ାଳିମାନେ ନିୟୋଜିତ ଅଛନ୍ତି। ମୃତକଙ୍କ ପରିବାର ପାଇଁ ୟୁପି ସରକାରଙ୍କ ବିପର୍ଯ୍ୟୟ ରିଲିଫ୍ ପାଣ୍ଠିରୁ ୪ ଲକ୍ଷ ଟଙ୍କା ଲେଖାଏ ଅନୁକମ୍ପାମୂଳକ ସହାୟତା ଘୋଷଣା କରାଯାଇଛି।
