ବଲାଙ୍ଗୀର,୧୪।୫ (ସୁନିଲ କୁମାର ମହାନ୍ତି): କୋସଲାଞ୍ଚଳର ମହାନ ସ୍ବାଧୀନତା ସଂଗ୍ରାମୀ ଶହିଦ ମାଧୋ ସିଂଙ୍କ ଜୀବନୀ ବିଷୟରେ ସ୍କୁଲ ପାଠ୍ୟ ପୁସ୍ତକରେ ଭୁଲ ତଥ୍ୟ ଦିଆଯାଇଥିବା ପ୍ରତିବାଦରେ ଗୁରୁବାର କୋଶଲ ରାଜ୍ୟ ମୁକ୍ତି ମୋର୍ଚ୍ଚା ପକ୍ଷରୁ ବଲାଙ୍ଗୀର ଜିଲା ଶିକ୍ଷାଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଥିଲା । ମୋର୍ଚ୍ଚା ପକ୍ଷରୁ କୁହାଯାଇଛି ଯେ, କୋସଲାଞ୍ଚଳର ଗର୍ବ ଓ ଗୌରବ ସ୍ବାଧୀନତା ସଂଗ୍ରାମୀ ଶହିଦ ମାଧୋ ସିଂଙ୍କ ଜୀବନୀକୁ ନେଇ ଗଣଶିକ୍ଷା ବିଭାଗ ଓଡ଼ିଶା ଦ୍ବାରା ଚଳିତବର୍ଷ ପ୍ରଚଳିତ ହୋଇଥିବା ସପ୍ତମ ଶ୍ରେଣୀର ସାହିତ୍ୟ ବହିରେ ଲେଖକ ବୀରେନ୍ଦ୍ର ମହାନ୍ତିଙ୍କ ଦ୍ବାରା ରଚିତ ଏକ ପ୍ରବନ୍ଧ ଛପାଯାଇଛି । ଯେଉଁଥିରେ ତାଙ୍କ ଜୀବନୀ ସମ୍ପୂର୍ଣ୍ଣ ବିକୃତ କରାଯାଇ ଭୁଲ ତଥ୍ୟ ଲେଖାଯାଇଥିବା ଅଭିଯୋଗ କରିଛନ୍ତି। ଏଭଳି ଭୁଲ ତଥ୍ୟ ସପ୍ତମ ଶ୍ରେଣୀ ପାଠ୍ୟ ପୁସ୍ତକରେ କିପରି ସାମିଲ ହେଲା ବୋଲି ପ୍ରଶ୍ନ କରିଥିଲେ । କୋସଲାଞ୍ଚଳର ଗର୍ବ ଓ ଗୌରବ ମହାନ ସ୍ବାଧୀନତା ସଂଗ୍ରାମୀଙ୍କ ଇତିହାସକୁ ଜାଣିଶୁଣି ବିକୃତ କରାଯାଇଥିବା ଅଭିଯୋଗ କରି ଡିଇଓ ଅଫିସ ସମ୍ମୁଖରେ ଧାରଣା ଦେଇଥିଲେ। ଏହାର ବିଧାବଦ୍ଧ ତଦନ୍ତ କରି ଉଚିତ ପଦକ୍ଷେପ ନେବାକୁ ସେମାନେ ଜିଲା ଶିକ୍ଷାଧିକାରୀଙ୍କ ଅନୁପସ୍ଥିତିରେ ଅତିରିକ୍ତ ଜିଲା ଶିକ୍ଷଧିକାରୀ ପ୍ରବୀର କୁମାର ପଣ୍ତାଙ୍କୁ ଦାବିପତ୍ର ପ୍ରଦାନ କରିଛନ୍ତି।
