ମୁମ୍ବାଇ,୧୪।୮: ୟୁଏଇରେ ଆସନ୍ତା ସେପ୍ଟେମ୍ବରରୁ ଆରମ୍ଭ ହେବାକୁ ଥିବା ଆଇପିଏଲ-୧୪’ର ବଳକା ମ୍ୟାଚ୍ ଲାଗି ଅଷ୍ଟ୍ରେଲିଆ ଓ ଇଂଲଣ୍ଡ ଦଳର ଖେଳାଳିମାନେ ଉପଲବ୍ଧ ରହିବେ। ଏ ନେଇ କ୍ରିକେଟ ଅଷ୍ଟ୍ରେଲିଆ (ସିଏ) ଏବଂ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ପକ୍ଷରୁ ବିସିସିଆଇକୁ ସୂଚନା ଦିଆଯାଇଛି। ଏଥି ସହିତ ଆଇପିଏଲ ଫ୍ରାଞ୍ଚାଇଜଙ୍କ ଚିନ୍ତା ଶେଷ ହୋଇଛି। କାରଣ ବିଭିନ୍ନ ଅନ୍ତର୍ଜାତୀୟ ସିରିଜ୍ କାରଣରୁ ଦୁଇ ଦେଶର ଖେଳାଳିମାନେ ଆଇପିଏଲରେ ଖେଳିବେ ନାହିଁ ଚର୍ଚ୍ଚା ହେଉଥିଲା।
ଉଭୟ ବୋର୍ଡ ସ୍ପଷ୍ଟ କରିବା ପରେ ଏ ସମ୍ପର୍କରେ ଆଇପିଏଲ ଫ୍ରାଞ୍ଚାଇଜମାନଙ୍କୁ ସୂଚନା ଦେଇଛି ବିସିସିଆଇ। ଆଇପିଏଲ ସିଓଓ ହେମଙ୍ଗ ଆମିନ ପ୍ରତ୍ୟେକ ଫ୍ରାଞ୍ଚାଇଜକୁ ଫୋନ କରି ଉଭୟ ଦେଶର ଖେଳାଳିଙ୍କ ଉପଲବ୍ଧ ରହିବେ ବୋଲି ଜଣାଇ ଦେଇଛନ୍ତି। ଏବେ ସବୁ କିଛି ଖେଳାଳିଙ୍କ ବ୍ୟକ୍ତିଗତ ନିଷ୍ପତ୍ତି ଉପରେ ନିର୍ଭର କରେ।
ଆମକୁ ଆଇପିଏଲ ଅଫିସରୁ ଫୋନ ଆସିଥିଲା। ଅଷ୍ଟ୍ରେଲିଆ ଓ ଇଂଲଣ୍ଡ ଦଳର ଖେଳାଳିଙ୍କୁ ଆଇପିଏଲରେ ଭାଗ ନେବା ପାଇଁ ସେମାନଙ୍କ ବୋର୍ଡ ରୋକିବ ନାହିଁ। ଏବେ ସବୁକିଛି ଖେଳାଳିଙ୍କ ଉପରେ। ଏହାର ଅର୍ଥ ଆମର ଅଷ୍ଟ୍ରେଲିଆନ ଓ ଇଂଲଣ୍ଡ ଖେଳାଳି (ଜାନସ ବେହରେନଡର୍ଫ, ସାମ କୁରାନ ଓ ମୋଇନ ଅଲି) ଉପଲବ୍ଧ ରହିବେ ବୋଲି ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)ର ସିଇଓ କାସି ବିଶ୍ୱନାଥନ କହିଛନ୍ତି।
