ବଲାଙ୍ଗୀର ଅଫିସ, ୧ା୫: ବଲାଙ୍ଗୀର ନାଗରିକ କମିଟିର କାର୍ଯ୍ୟକାରୀ ବୈଠକ ସଭାପତି ଇଂ. ବେଲାର ସିଂଭୋଇଙ୍କ ସଭାପତିତ୍ୱରେ ରବିବାର ସ୍ଥାନୀୟ ଟାଉନ ବାଳିକା ଉଚ୍ଚ ବିଦ୍ୟାଳୟଠାରେ ଅନୁଷ୍ଠିତ ହୋଇଥିଲା। କମିଟି ସାଧାରଣ ସମ୍ପାଦକ ମନୋରଞ୍ଜନ ସାହୁ ବିଭିନ୍ନ ପ୍ରସ୍ତାବ ଆଗତ କରି ସଭା ପରିଚାଳନା କରିଥିଲେ ା ବୈଠକରେ ଗତ ଏପ୍ରିଲ ୧୨ରେ ଅନୁଷ୍ଠିତ ହୋଇଥିବା ଧାରଣା କାର୍ଯ୍ୟକ୍ରମ ଉପରେ ସମୀକ୍ଷା କରାଯାଇଥିଲା। ଏଥିରେ ଯୋଗ ଦେଇଥିବା ବିଭିନ୍ନ ଅନୁଷ୍ଠାନ ବଲାଙ୍ଗୀର କ୍ରିୟାନୁଷ୍ଠାନ କମିଟି, କୋଶଳ ରାଜ୍ୟ ସମନ୍ବୟ ସମିତି, ସ୍ବେଚ୍ଛାସେବୀ ସଙ୍ଗଠନ, କୋଶଳ ମୁକ୍ତି ମୋର୍ଚ୍ଚା, ବରିଷ୍ଠ ନାଗରିକ ମଞ୍ଚ, ଓବିସି ମଞ୍ଚ, ବଜରଙ୍ଗ ଦଳ, ପଶ୍ଚିମ ଓଡ଼ିଶା ଯୁବା ମଞ୍ଚ, ବିଙ୍ଗ୍ ହ୍ୟୁମନ୍ ଫାଉଣ୍ଡେସନ୍, ଅବସରପ୍ରାପ୍ତ ସରକାରୀ କର୍ମଚାରୀ ସଂଘ, ଅଭିଭାବକ ସଂଘ, ସ୍ମାଇଲ୍ ଫର୍ ଅଲ୍ ସଙ୍ଗଠନ ଓ ତାଙ୍କର ପ୍ରତିନିଧି ମାନଙ୍କୁ କମିଟି ତରଫରୁ ଧନ୍ୟବାଦ ଅର୍ପଣ କରାଯାଇଥିଲା ା ଏପରିକି ଆଗାମୀ ଦିନମାନଙ୍କରେ ମିଳିତ ଭାବେ ଆନ୍ଦୋଳନ କାର୍ଯ୍ୟକ୍ରମ କରିବାକୁ ନିଷ୍ପତ୍ତି ନିଆଯାଇଥିଲା। ଭୀମ ଭୋଇ ମେଡିକାଲ କଲେଜ ଓ ହସ୍ପିଟାଲରେ କାର୍ଯ୍ୟରତ ଡାକ୍ତର, ପ୍ରଫେସର ଓ ଅନ୍ୟ କର୍ମଚାରୀ ମାନେ ବାରମ୍ବାର ଅନୁପସ୍ଥିତ ରହୁଥିବାରୁ ବୈଠକରେ ଗଭୀର ଉଦ୍ବେଗ ପ୍ରକାଶ ପାଇଥିଲା। ସ୍ବାସ୍ଥ୍ୟସେବା କ୍ଷେତ୍ରରେ ପଛୁଆ ବଲାଙ୍ଗୀର ଏବଂ ପଡୋଶୀ ଜିଲାବାସୀଙ୍କୁ ଚିକିତ୍ସା ସେବା ଯୋଗାଇବା ପରିବର୍ତ୍ତେ ଡାକ୍ତରମାନେ ଛୁଟି ନେଇ ଅନ୍ୟତ୍ର ବ୍ୟସ୍ତ ରହିବା ଗମ୍ଭୀର ବିଷୟ ବୋଲି ମତପ୍ରକାଶ ପାଇଥିଲା। ଛୁଟିରେ ରହୁଥିବା ଡାକ୍ତରଙ୍କ ବିରୋଧରେ ଭୀମ ଭୋଇ ମେଡିକାଲ କଲେଜ ଗଭର୍ନିଂ ବଡି ବୈଠକରେ ଉଦ୍ବେଗ ପ୍ରକାଶ କରାଯାଇ କାର୍ଯ୍ୟାନୁଷ୍ଠାନ ନେବାର ନିଷ୍ପତ୍ତିକୁ ନାଗରିକ କମିଟି ପକ୍ଷରୁ ସ୍ବାଗତ କରାଯାଇଛି। ନାଗରିକ କମିଟି ପକ୍ଷରୁ ହସ୍ପିଟାଲ ଗଭର୍ନିଂ ବଡି ଅଧ୍ୟକ୍ଷ ତଥା ଉତ୍ତରାଞ୍ଚଳ ରାଜସ୍ବ କମିଶନର ଡ. ସୁରେଶ ଚନ୍ଦ୍ର ଦଲାଇ ଏବଂ ଅନ୍ୟ ସଭ୍ୟମାନଙ୍କୁ ଧନ୍ୟବାଦ ଅର୍ପଣ କରାଯାଇଛି ା ଆସନ୍ତା ମେ ୫ ତାରିଖରେ ନାଗରିକ କମିଟି ପକ୍ଷରୁ ବୁଦ୍ଧଜୟନ୍ତୀ ପାଳନ କରାଯିବ ବୋଲି ନିଷ୍ପତ୍ତି ନିଆଯାଇଛି ା ବୈଠକରେ ଅନ୍ୟ ବିଷୟ ଆଲୋଚନା ପରେ ସହସମ୍ପାଦକ ଡା. ଚକ୍ରପାଣି ଦାଶ ଧନ୍ୟବାଦ ଦେଇଥିଲେ। ବୈଠକରେ ଉପସଭାପତି ନିତ୍ୟାନନ୍ଦ ମିଶ୍ର, ଗଜେନ୍ଦ୍ର ଭମର, ଗୋପଭୂଷଣ ନାଥ, ଜୟରାମ ମିଶ୍ର, ମନୋରଞ୍ଜନ ପୁରୋହିତ, ଦିବାକର ହୋତା, ଗୋପବନ୍ଧୁ ପୁରୋହିତ, ସଲିମ୍ ଖାନ୍ ଓ ବ୍ରଜରାଜ ପୁରୋହିତ ଉପସ୍ଥିତ ରହି ଆଲୋଚନାରେ ଅଂଶଗ୍ରହଣ କରିଥିଲେ ା
