ମହାକାଳପଡ଼ା,୬ା୧ (ଡି.ଏନ.ଏ.): ସଭିଁଏ ପଢ଼ିବେ ସଭିଁଏ ବଢ଼ିବେ ସର୍ବଶିକ୍ଷା ଅଭିଯାନର ସ୍ଲୋଗାନ। ଘରୋଇ ବିଦ୍ୟାଳୟ ପ୍ରତି ମୋହ ତୁଟାଇ କିପରି ସରକାରୀ ବିଦ୍ୟାଳୟରେ ପିଲାମାନେ ପାଠ ପଢ଼ିବେ, ସେଥିପାଇଁ ତୃଣମୂଳ ସ୍ତରରେ ସରକାର ବିଦ୍ୟାଳୟକୁ ସରସ ସୁନ୍ଦର କରୁଛନ୍ତି। ୫-ଟି ମାଧ୍ୟମରେ ବିଦ୍ୟାଳୟକୁ ରୂପାନ୍ତରଣ କରାଯିବା ପରେ ଉପସ୍ଥାନ ବଢ଼ାଇବା ପାଇଁ ଶ୍ରେଣୀ ପ୍ରକୋଷ୍ଠଗୁଡ଼ିକୁ ଅତ୍ୟାଧୁନିକୀକରଣ ସହ ଡିଜିଟାଲାଇଜେଶନ କରାଯାଉଛି। ଶୈକ୍ଷିକ ଓ ଗୁଣାତ୍ମକ ଶିକ୍ଷା ପାଇଁ ଉତ୍ତମ ପରିବେଶ ଗଠନ ନିମନ୍ତେ ସରକାର ଅର୍ଥ ଖର୍ଚ୍ଚ କରୁଛନ୍ତି। ଛାତ୍ରୀଛାତ୍ରମାନେ ବିଦ୍ୟାଳୟ ପ୍ରବେଶ ନିମନ୍ତେ ପୋଷାକ, ପାଠ୍ୟ ପୁସ୍ତକ, ମଧ୍ୟାହ୍ନଭୋଜନ ପାଇଁ ପୁଷ୍ଟିକର ଖାଦ୍ୟ ପ୍ରସ୍ତୁତ କରାଯାଇଛି। ଏହାସତ୍ତ୍ୱେ ବିଦ୍ୟାଳୟରେ ମଧ୍ୟାହ୍ନଭୋଜନ ପ୍ରତି ମୋହ ତୁଟାଇ ଛାତ୍ରୀଛାତ୍ର ଘରେ ଖାଇ ପୁଣି ବିଦ୍ୟାଳୟକୁ ଯାଉଛନ୍ତି। ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଧୀନ ରାମନଗର ସରକାରୀ ପ୍ରାଥମିକ ବିଦ୍ୟାଳୟରେ। ଗୁରୁବାର ପିଲାମାନେ ବିଦ୍ୟାଳୟରୁ ମଧ୍ୟାହ୍ନଭୋଜନ ନ ଖାଇ ଘରକୁ ଖାଇବା ପାଇଁ ଆସୁଥିବା ସାମ୍ନାକୁ ଆସିଛି। କାହିଁକି ବିଦ୍ୟାଳୟରେ ମଧ୍ୟାହ୍ନଭୋଜନ ନ ଖାଇ ଘରକୁ ଆସିଛ ବୋଲି ପ୍ରିୟା ମଜୁମଦାର, ଆରାଧ୍ୟା ପାଇକ, ଗାୟତ୍ରୀ ସମଦାର, ମିଥୁନ ମଣ୍ଡଳ, ଶଙ୍କର ମଣ୍ଡଳ, ଶୁଭଜିତ ମଣ୍ଡଳ, ସ୍ନେହା ପାଇକ, ପାୟଲ ମାଝି ଓ ବ୍ରତତୀ ମଣ୍ଡଳ, ରଶ୍ମି ସମଦାର୍, ସୁପ୍ରିୟା ସମଦାର୍, ମନୋଜ ସାମନ୍ତଙ୍କୁ ପଚାରିବାରୁ ମଧ୍ୟାହ୍ନଭୋଜନ ଭାତରୁ ପୋକ, ଚୁଟି, ପୋଡ଼ି ଯାଇଥିବା ଭାତ ଓ ଅଲଣା ତରକାରି ପରଷା ଯାଉଛି ବୋଲି ଅଭିଯୋଗ କରିଛନ୍ତି। ସରକାରୀ ମଧ୍ୟାହ୍ନଭୋଜନ ନିୟମ ଅନୁସାରେ, ଭୋଜନ ପ୍ରସ୍ତୁତ ପରେ ସମ୍ପୃକ୍ତ ବିଦ୍ୟାଳୟର ପ୍ରଧାନଶିକ୍ଷକ ଓ ପରିଚାଳନା କମିଟି ବା ଯାଞ୍ଚ କମିଟି ଖାଦ୍ୟର ମାନ ପରଖିବା କଥା। ହେଲେ ଏଠାରେ ସରକାରୀ ନିୟମକୁ ଅଣଦେଖା କରାଯାଉଛି।
ରାମନଗର ସରକାରୀ ପ୍ରାଥମିକ ବିଦ୍ୟାଳୟର ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ଦୁଇଶହରୁ ଅଧିକ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ବିଦ୍ୟାଳୟ ଦାୟିତ୍ୱରେ ପ୍ରଧାନଶିକ୍ଷକ ଦୀପଙ୍କର ଦାସ ୧୦ ବର୍ଷରୁ ଊର୍ଦ୍ଧ୍ୱ ହେବ ରହିଲେଣି। ଦୀର୍ଘଦିନ ହେବ ପିଲାମାନେ ମଧ୍ୟାହ୍ନଭୋଜନ ନ ଖାଇ ଘରକୁ ଫେରୁଥିବାରୁ ବୁଦ୍ଧିଜୀବୀ ମହଲରେ ଏହାକୁ ନାପସନ୍ଦ କରାଯାଇଛି। ଏ ସମ୍ପର୍କରେ ପ୍ରଧାନ ଶିକ୍ଷକ ଦାସଙ୍କ ମତାମତ ନେବାରେ ଯୋଗାଯୋଗ କରାଯାଇଥିଲେ ମଧ୍ୟ ସେ ଫୋନ ରିସିଭ କରି ନ ଥିଲେ। ଏ ସମ୍ପର୍କରେ ବ୍ଲକ ଶିକ୍ଷା ଅଧିକାରୀ ତନ୍ମୟ କୁମାର ବେଉରାଙ୍କୁ ପଚାରିବାରେ ଏହି ଘଟଣାରେ ତଦନ୍ତ କରାଯିବ ବୋଲି ସେ କହିଛନ୍ତି।
