କାବୁଲ, ୧ା୧୧: ଆଫଗାନିସ୍ତାନରେ ତାଲିବାନ୍ ସରକାରକୁ ସ୍ବୀକୃତି ଦେବାରେ ସମୟ ନଷ୍ଟ ନ କରିବାକୁ ଆମେରିକା ସମେତ ଅନ୍ୟ ବିଶ୍ୱ ଶକ୍ତିକୁ କହିଛି ଏହି ସଙ୍ଗଠନ। ଏଥିରେ ବିଫଳ ହେଲେ କେବଳ ସେହି ଦେଶ ନୁହେଁ ବରଂ ସମଗ୍ର ବିଶ୍ୱ ଏହାର ଫଳାଫଳ ଭୋଗିବ ବୋଲି ତାଲିବାନ୍ ଚେତାବନୀ ଦେଇଛି। କାବୁଲରେ ଆୟୋଜିତ ଏକ ଖବରଦାତା ସମ୍ମିଳନୀରେ ତାଲିବାନ୍ ସୂଚନା ଓ ସଂସ୍କୃତି ମନ୍ତ୍ରୀ ଜାବିହୁଲ୍ଲା ମୁଜାହିଦ୍ ଆମେରିକା ଉଦ୍ଦେଶ୍ୟରେ ବାର୍ତ୍ତା ଦେଇ କହିଛନ୍ତି, ଯଦି ଜାତିସଂଘ ତାଲିବାନ୍କୁ ସ୍ବୀକୃତି ଦେବାକୁ ଝୁଲାଇ ରଖେ ତେବେ ତାହା ସମଗ୍ର ବିଶ୍ୱ ପାଇଁ ସମସ୍ୟାକୁ ଡାକି ଆଣିବ। ତାଲିବାନ୍ ଏବଂ ଆମେରିକା ମଧ୍ୟରେ ବିଧିବଦ୍ଧ ଦ୍ୱିପାକ୍ଷିକ ସମ୍ପର୍କ ନ ରହିବା ଉଭୟ ପକ୍ଷ ମଧ୍ୟରେ ଯୁଦ୍ଧର କାରଣ ପାଲଟିଥିଲା। ଅଲ୍ କାଏଦା ମୁଖ୍ୟ ଓସାମା ବିନ୍ ଲାଡେନଙ୍କୁ ହସ୍ତାନ୍ତର କରିବାକୁ ମନାକରିବାରୁ ୨୦୦୧ରେ ଆମେରିକା ସେମାନଙ୍କୁ ଶାସନରୁ ହଟାଇଥିଲା। କଥାବାର୍ତ୍ତା ଓ ବୁଝାମଣା ମାଧ୍ୟମରେ ଏହି ଯୁଦ୍ଧକୁ ଏଡ଼ାଇ ଦିଆଯାଇପାରିଥାନ୍ତା। ଅନ୍ତର୍ଜାତୀୟ ସ୍ବୀକୃତି ଆଫଗାନିସ୍ତାନ ଲୋକଙ୍କ ଅଧିକାର। ଏହା ନ ମିଳିଲେ ସିଜ୍ ହୋଇଥିବା ଆଫଗାନିସ୍ତାନର ଅର୍ଥ ଓ ସମ୍ପତ୍ତି ମୁକୁଳିପାରିବନି, ଯାହା କି ଦେଶର ଅର୍ଥନୀତିକୁ ନଷ୍ଟ କରିଦେବ ଏବଂ ମାନବସଙ୍କଟ ଗମ୍ଭୀର ହୋଇପଡ଼ିବ ବୋଲି ସେ କହିଛନ୍ତି।
ସାମ୍ନାକୁ ଆସିଲେ ଅଖୁନ୍ଦଜାଦା
ତାଲିବାନ୍ ସର୍ବୋଚ୍ଚ ନେତା ହିବାତୁଲ୍ଲା ଅଖୁନ୍ଦଜାଦାଙ୍କ ମୃତ୍ୟୁ ହୋଇଥିବା ନେଇ ବାରମ୍ବାର ଚର୍ଚ୍ଚା ହେବାପରେ ପ୍ରଥମ ଥର ସେ ସର୍ବସମ୍ମୁଖକୁ ଆସିଛନ୍ତି। ସେ କାନ୍ଦାହାରରେ ତାଙ୍କ ସମର୍ଥକଙ୍କୁ ଭେଟିଥିବା ରବିବାର ତାଲିବାନ୍ ପକ୍ଷରୁ କୁହାଯାଇଛି। ୨୦୧୬ରୁ ଅଖୁନ୍ଦଜାଦା ତାଲିବାନ୍ର ନେତୃତ୍ୱ ନେଇଥିବାବେଳେ ସେ ପ୍ରଥମ ଥର ସର୍ବସାଧାରଣଙ୍କ ସମ୍ମୁଖକୁ ଆସିଛନ୍ତି।
ଗତ ଅଗଷ୍ଟରେ ତାଲିବାନ୍ ଆଫଗାନିସ୍ତାନକୁ କବ୍ଜା କରିବା ପରେ ମଧ୍ୟ ତାଙ୍କୁ ଦେଖିବାକୁ ମିଳି ନ ଥିଲା। ତାଲିବାନ୍ ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ, ଅଖୁନ୍ଦଜାଦା ଦାରୁଲ ଉଲୁମ୍ ହାକିମ ମାଦ୍ରାସାକୁ ଯାଇ ତାଲିବାନ୍ ଲଢ଼ୁଆଙ୍କୁ ଭେଟିଥିଲେ। ସେଠାରେ ତାଙ୍କ ପାଇଁ କଡ଼ା ସୁରକ୍ଷା ବ୍ୟବସ୍ଥା କରାଯାଇଥିଲା। ସେହି ସମୟର କୌଣସି ଫଟୋ ଶେୟାର ହୋଇ ନ ଥିବାବେଳେ ୧୦ ମିନିଟ୍ର ଏକ ଅଡିଓ ତାଲିବାନ୍ ସୋସିଆଲ ମିଡିଆ ଆକାଉଣ୍ଟରେ ଛଡ଼ା ଯାଇଛି। ଅଡିଓରେ ଅଖୁନ୍ଦଜାଦାଙ୍କୁ ‘ଅମିରୁଲ୍ଲ ମୋମିନିନ୍’ ବୋଲି ସମ୍ବୋଧନ କରାଯାଉଛି ଏବଂ ଏଥିରେ ସେ ଧାର୍ମିକ ବାର୍ତ୍ତା ଦେଇଛନ୍ତି।
