ମସ୍କୋ,୨୬ ।୪: ରୁଷିଆ-ୟୁକ୍ରେନ୍ ଯୁଦ୍ଧକୁ ୨ ମାସ ପୂରଣ ହୋଇ ଗଲାଣି । ଇତିମଧ୍ୟରେ ସୋମବାର ରୁଷିଆର ବୈଦେଶିକ ମନ୍ତ୍ରୀ ସର୍ଗୋଇ ଲାବରୋବ ଏକ ବଡ ବୟାନ ଦେଇଛନ୍ତି । ସେ ୟୁକ୍ରେନ୍ ସହ ଶାନ୍ତି ବାର୍ତ୍ତା ଜାରି ରଖିବା କଥା କହିଛନ୍ତି । ହେଲେ ଅନ୍ୟପଟେ ତୃତୀୟ ବିଶ୍ୱଯୁଦ୍ଧର ବାସ୍ତବିକ ବିପଦର ଚେତାବନି ଦେଇଛନ୍ତି । ଏହାସହ ରୁଷିଆ ସମାଚାର ଏଜେନ୍ସି ସହ କଥା ହେବା ସମୟରେ ସେ ଶାନ୍ତି ବାର୍ତ୍ତାକୁ ନେଇ ୟୁକ୍ରେନର ଚିନ୍ତାଧାରା ସମ୍ପର୍କରେ ଆଲୋଚନା କରିଛନ୍ତି । ବୈଦେଶିକ ମନ୍ତ୍ରୀ କହିଛନ୍ତି, ଭଲ ଇଚ୍ଛାର ଏକ ସୀମା ରହିଛି, ହେଲେ ଏହା ଦୁଇ ପକ୍ଷର ସମାନ ନ ହେଲେ କଥାବାର୍ତ୍ତାର ପ୍ରକ୍ରିୟା କୌଣସି ସାହାଯ୍ୟ କରିବ ନାହିଁ ।
ଲାବରୋବ ଆହୁରି ମଧ୍ୟ କହିଛନ୍ତି, ଆମେ ୟୁକ୍ରେନ୍ ରାଷ୍ଟ୍ରପତି ଭୋଲୋଡେମିର ଜେଲେନସ୍କିଙ୍କ ଟିମ୍ ସହ କଥା ହେଉଛୁ ଆଉ ଏହା ଆଗକୁ ବି ଜାରି ରହିବ । ଏହାସହ ସେ ଜେଲେନସ୍କିଙ୍କ ଉପରେ କଥାବାର୍ତ୍ତାକୁ ନେଇ ସେ ‘ନାଟକ’ କରୁଥିବା ଅଭିଯୋଗ କରିଛନ୍ତି । ଲାବରୋବ କହିଛନ୍ତି ଜେଲେନସ୍କି ଜଣେ ଭଲ ଅଭିନେତା । ଯଦି ଆପଣ ଭଲଭାବେ ଦେଖିବେ ଅବା ଭଲଭାବେ ପଢିବେ ତେବେ ଆପଣ ହଜାର ହଜାର ବିରୋଧାଭାସ ପାଇବେ ।
ବର୍ତ୍ତମାନର ସ୍ଥିତିକୁ ଦେଖି ରୁଷିଆ ବୈଦେଶିକ ମନ୍ତ୍ରୀ କହିଛନ୍ତି, ତୃତୀୟ ବିଶ୍ୱ ଯୁଦ୍ଧର ବିପଦ ବାସ୍ତବିକ । ବିପଦ ଅତି ଗମ୍ଭୀର, ଏହା ବାସ୍ତବିକ, ଆପଣ ଏହାକୁ କମ କରି ଦେଖିପାରିବେ ନାହିଁ । ୟୁକ୍ରେନ୍ ସହ ଚାଲିଥିବା ସଂଘର୍ଷକୁ ନେଇ ସେ କହିଛନ୍ତି, ମୁଁ ବିଶ୍ୱାସ କରୁଛି ବୁଝାମଣା ଉପରେ ହସ୍ତାକ୍ଷର ସହ ସବୁ କିଛି ନିଶ୍ଚିତ ଭାବେ ଶେଷ ହୋଇଯିବ ।
