ଭୁବନେଶ୍ୱର,୨୬।୪(ବ୍ୟୁରୋ):ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ (ଓଟିଡିସି) ଓ ଭାରତୀୟ ପର୍ଯ୍ୟଟନ ନିଗମ (ଆଇଟିଡିସି) ନାଁରେ ପୃଥକ୍ ଠକେଇ ମାମଲାରେ ଫେରାର ଥିବା ଅନ୍ୟତମ ଅଭିଯୁକ୍ତ ବିକାଶ ମହାରଣା ଭୁବନେଶ୍ୱର ଏସ୍ଡିଜେଏମ୍ କୋର୍ଟରେ ଆତ୍ମସର୍ପଣ କରିଛନ୍ତି। ୨୦୨୧ ଡିସେମ୍ବରରେ ସେ ହାଇକୋର୍ଟରେ ଆଗୁଆ ଜାମିନ ଆବେଦନ କରିଥିଲେ। ତେବେ ଗତ ଏପ୍ରିଲ ୭ରେ ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଶୁକ୍ରବାର ସେ ଆତ୍ମସମର୍ପଣ କରିବା ପରେ କୋର୍ଟ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦେଇଛନ୍ତି। ପୂର୍ବରୁ ମାମଲା ନଂ.୧୦/୨୧ରେ ଅଭିଯୁକ୍ତ ଅନିକେଶ ସାହୁ ଗତବର୍ଷ ଅକ୍ଟୋବର ୧୦ରେ ଓ ମାମଲା ନଂ.୧୩/୨୧ରେ ଆତ୍ମଘୋଷିତ ବାବା ବିଜୟାନନ୍ଦ ଚୌଧୁରୀ ଓରଫ ସ୍ବାମୀ ବିଜୟାନନ୍ଦ ମହାରାଜ ଏବଂ ଓଟିଡିସିର ପୂର୍ବତନ ଇଞ୍ଜିନିୟର ଚନ୍ଦନ ଆକାଶ ଅଗଷ୍ଟ ୨୨ରେ କ୍ରାଇମ୍ବ୍ରାଞ୍ଚ ଇଓଡବ୍ଲ୍ୟୁ ଦ୍ୱାରା ଗିରଫ ହୋଇ ଜେଲ ଯାଇଛନ୍ତି।
ସୂଚନା ଅନୁଯାୟୀ, ସ୍ପେଶାଲ କ୍ଲାସ କଣ୍ଟ୍ରାକ୍ଟର ଧନୁର୍ଦ୍ଧର ଚମ୍ପତ୍ତିରାୟଙ୍କ ସହ ୨୦୨୦ ମେ’ରେ ବାବା ବିଜୟାନନ୍ଦ ନିଜକୁ ଓଟିଡ଼ିସି ଚେୟାରମ୍ୟାନ ଓ ଆଇଟିଡିସିର ସଦସ୍ୟ କହି ସମ୍ପର୍କ ଯୋଡ଼ିଥିଲେ। ଏଥିସହ ସେ ଚନ୍ଦନଙ୍କୁ ଓଟିଡିସିର ଆସିଷ୍ଟାଣ୍ଟ ଇଞ୍ଜିନିୟର ଓ ବିକାଶଙ୍କୁ ଓଟିଡିସିର କ୍ଲର୍କ କହି ଧନୁର୍ଦ୍ଧରଙ୍କ ସହ ପରିଚୟ କରାଇଥିଲେ। ସେମାନେ ଓଟିଡିସିରେ ବହୁ କୋଟି ଟଙ୍କାର ନକଲି ୱାର୍କ ଅର୍ଡର ଦେଇ ତାଙ୍କଠାରୁ ୩ କୋଟି ଟଙ୍କା ଠକି ନେଇଥିଲେ। ଏହି ଟଙ୍କାରୁ ୧.୧୪ କୋଟି ଧନୁର୍ଦ୍ଧର ଅଭିଯୁକ୍ତଙ୍କ ବ୍ୟାଙ୍କରେ ଜମା କରିଥିବାବେଳେ ବିକାଶ ଜାଲ୍ ମନି ରିସିପ୍ଟ ଦେଇ ବାକି ୧.୮୫ କୋଟି ଟଙ୍କା ନେଇଥିଲେ। ଧନୁର୍ଦ୍ଧର ଠକେଇର ଶିକାର ହୋଇଥିବା ଜାଣିବା ପରେ ଓଟିଡିସିରେ ଅଭିଯୋଗ କରିଥିଲେ। ଓଟିଡିସିର ଅଭିଯୋଗ ଆଧାରରେ ଇଓଡବ୍ଲ୍ୟୁ ମାମଲା(ନଂ.୧୦/୨୧) ରୁଜୁ କରିଥିଲା। ସେହିପରି ପୁରୀରେ ହୋଟେଲ କରିଥିବା ତପନ କୁମାର ମହାନ୍ତିଙ୍କ ସହ ଅଭିଯୁକ୍ତ ଚନ୍ଦନ ନିଜକୁ ଆଇଟିଡିସିର ବରିଷ୍ଠ ଅଧିକାରୀ ଓ ଅନିକେଶ ଆଇଟିଡିସିର ପ୍ରୋଜେକ୍ଟର କଣ୍ଟ୍ରାକ୍ଟର ଏବଂ ବିକାଶଙ୍କ ଓଟିଡିସିର କ୍ଲର୍କ କହି ସମ୍ପର୍କ ବଢାଇଥିଲେ। ଆଇଟିଡିସି ତତ୍ତ୍ୱାବଧାନରେ ପୁରୀରେ ଥିବା ନୀଳାଚଳ ଅଶୋକ ହୋଟେଲକୁ କିଣିବା ପାଇଁ ତପନଙ୍କ ସହ ସେମାନେ ୧୫ କୋଟିର ଡିଲ୍ କରିଥିଲେ। ତପନ ଦିଲ୍ଲୀସ୍ଥିତ ଆଇଟିଡିସିର ଆକାଉଣ୍ଟରେ ୨୦ ଲକ୍ଷ ଟଙ୍କା ଜମା କରିଥିବାବେଳେ ୩୦ ଲକ୍ଷ ନଗଦ ଓ ବ୍ୟାଙ୍କ ଜମା ଆକାରରେ ଅଭିଯୁକ୍ତଙ୍କୁ ଦେଇଥିଲେ। ତେବେ ଠକେଇ ସମ୍ପର୍କରେ ଜାଣିବା ପରେ ତପନଙ୍କ ସ୍ତ୍ରୀ ବିଜୟିନୀ ମହାନ୍ତିଙ୍କ ଅଭିଯୋଗକ୍ରମେ ଇଓଡବ୍ଲ୍ୟୁ ଏକ ମାମଲା( ନଂ.୧୩/୨୧) ରୁଜୁ କରି ତଦନ୍ତ ଆରମ୍ଭ କରିଥିଲା।
