ନୂଆଦିଲ୍ଲୀ, ୨୪ା୫(ପି.ଟି.)-ସାଉଥାମ୍ପଟନର ଏଜାସ ବାଓଲଠାରେ କଣ୍ଡିଶନ ଯଦି ପେସ୍ ବୋଲରଙ୍କୁ ସୁହାଏ ତେବେ ନ୍ୟୁଜିଲାଣ୍ଡ ବିପକ୍ଷ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲରେ ଭାରତୀୟ କ୍ରିକେଟ ଦଳକୁ ସଂଘର୍ଷ କରିବାକୁ ପଡ଼ିପାରେ। ଏକଥା କହିଛନ୍ତି, ଇଂଲଣ୍ଡର ପୂର୍ବତନ ସ୍ପିନର ମଣ୍ଟି ପନେସର। ୟୁନାଇଟେଡ କିଙ୍ଗ୍ଡମ୍ରେ ବର୍ତ୍ତମାନ ବର୍ଷା ଓ କୋହଲା ପାଗ ଚାଲିଛି। ମ୍ୟାଚ୍ ଜୁନ୍ ୧୮ରୁ ଖେଳାଯିବା କାର୍ଯ୍ୟକ୍ରମ ରହିଛି। ସେତେବେଳେ ଯଦି ଏହି ପାଗ ଦେଖାଯାଏ ତେବେ ଭାରତୀୟ ଓ ନ୍ୟୁଜିଲାଣ୍ଡ ସିମରମାନଙ୍କ ମଧ୍ୟରୁ କିଏ ପରିସ୍ଥିତିରୁ ଫାଇଦା ଉଠାଇ ପାରୁଛି ତାହା ଦେଖାଯିବ। କିନ୍ତୁ ମୁଭିଂ ବଲ୍କୁ ଭାରତୀୟ ବ୍ୟାଟ୍ସମ୍ୟାନଙ୍କ ତୁଳନାରେ ନ୍ୟୁଜିଲାଣ୍ଡ ବ୍ୟାଟ୍ସମ୍ୟାନମାନେ ଭଲ ଖେଳିପାରନ୍ତି। ହେଲେ ବନ୍ଦର ସହର ସାଉଥାମ୍ପଟନରେ ଆକାଶ ଯଦି ନିର୍ମଳ ରୁହେ ତେବେ କଣ୍ଡିଶନ ଭାରତୀୟଙ୍କୁ ଅଧିକ ସୁହାଇବ ବୋଲି ପୂର୍ବତନ ବାମହାତୀ ସ୍ପିନର କହିଛନ୍ତି। ଅନ୍ୟପଟେ ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ଗ୍ରୀନ୍ ଟପ୍ ନ କରି ନ୍ୟୁଟ୍ରାଲ ପିଚ୍ ପ୍ରସ୍ତୁତ କରିବ ବୋଲି ସେ ଆଶା କରନ୍ତି। ଏଜାସ ବାଓଲରେ ଉତ୍ତମ ଡ୍ରେନିଂ ସିଷ୍ଟମ୍ ରହିଛି। ମେଘମୁକ୍ତ ଓ ସୂର୍ଯ୍ୟାଲୋକ ପରିବେଶରେ ଏହି ଷ୍ଟାଡିୟମ ଅତି ସୁନ୍ଦର ଦେଖାଯାଇଥାଏ। ମ୍ୟାଚଟି ସମ୍ପୂର୍ଣ୍ଣ ୪ କିମ୍ବା ୫ଦିନ ଖେଳାଯିବ ବୋଲି ତାଙ୍କର ଆଶା। ପାଗ ଯଦି ଭଲ ରୁହେ ତେବେ ଭାରତ ଫେଭରାଇଟ୍ ରହିବ। ଦଳ ୨ ସ୍ପିନର (ଅଶ୍ୱିନ ଓ ଜାଡେଜା) ଏବଂ ୩ ସିମ୍ ବୋଲରଙ୍କୁ ନେଇ ପଡ଼ିଆକୁ ଓହ୍ଲାଇବ। ତେଣୁ ଅନେକ କିଛି ପାଗ ଉପରେ ନିର୍ଭର କରୁଛି। ଭାରତୀୟ ଦଳ ଜୁନ୍ ୨ରେ ୟୁନାଇଟେଡ କିଙ୍ଗ୍ଡମ୍ (ୟୁକେ)ରେ ପହଞ୍ଚତ୍ବ। ଦଳ ଟ୍ରେନିଂ ପାଇଁ ଅତି କମ୍ରେ ୧୦ ଦିନ ସମୟ ପାଇବ। ଅନ୍ୟପକ୍ଷରେ ବିଶ୍ୱ ଟେଷ୍ଟ ଚାମ୍ପିୟଶିପ୍ ଫାଇନାଲ ପୂର୍ବରୁ ନ୍ୟୁଜିଲାଣ୍ଡ ଇଂଲଣ୍ଡ ବିପକ୍ଷରେ ଦୁଇଟି ଟେଷ୍ଟ ମ୍ୟାଚ ଖେଳିବ। ଅନେକଙ୍କ ମତରେ ଏଥିରୁ ଦଳ ଫାଇଦା ଉଠାଇବ। କିନ୍ତୁ ପନିସରଙ୍କ ମତରେ ଏହା ଦୁଇଧାର ବିଶିଷ୍ଟ ଖଣ୍ଡାଭଳି ହେବ। ଦୁଇଟି ଟେଷ୍ଟ ମ୍ୟାଚରେ ନ୍ୟୁଜିଲାଣ୍ଡ ଯଦି ଭଲ କରେ ତେବେ ଭାରତ ବିପକ୍ଷରେ ସେମାନେ ଫେଭରାଇଟ ସାବ୍ୟସ୍ତ ହେବେ। କିନ୍ତୁ ଦଳ ଯଦି ପରାଜୟ ବରଣ କରେ ତେବେ ଆତ୍ମବିଶ୍ୱାସ ହରାଇ ବସିବ। ବର୍ଷର ଏହି ସମୟରେ ଜେମ୍ସ ଆଣ୍ଡରସନ ଓ ଷ୍ଟୁଆର୍ଟ ବ୍ରଡ୍ ବେଶ୍ ପ୍ରଭାବୀ ହୋଇଥାନ୍ତି। କିନ୍ତୁ ନ୍ୟୁଜିଲାଣ୍ଡ ବିପକ୍ଷ ସିରିଜ ପାଇଁ କେତେଜଣ ପ୍ରମୁଖ ଖେଳାଳିଙ୍କ ଅନୁପସ୍ଥିତିରେ ଇଂଲଣ୍ଡ ଏକ ବି’ ଦଳ ମନୋନୟନ କରିଛି। ତେଣୁ ଫଳାଫଳ ଉପରେ ସମସ୍ତଙ୍କ ନଜର ରହିବ।
