ଶେଫିଲ୍ଡ (ଇଂଲଣ୍ଡ), ୫।୫(ଏପି)- କ୍ରୁକିବଲ ଥିଏଟରରେ ଭରପୂର ଦର୍ଶକଙ୍କ ଗହଣରେ ଇଂଲଣ୍ଡର ମାର୍କ ସେଲବି ବିଶ୍ୱ ସ୍ନୁକର ଟାଇଟଲ ହାସଲ କରିଛନ୍ତି। ଫାଇନାଲରେ ନିଜ ଦେଶର ଶନ ମର୍ଫିଙ୍କୁ ୧୮-୧୫ରେ ହରାଇ ସେଲ୍ବି କ୍ୟାରିୟରରେ ୪ର୍ଥ ଥର ପାଇଁ ଚାମ୍ପିୟନ ହୋଇଛନ୍ତି। କେବଳ ସ୍କଟଲାଣ୍ଡର ଷ୍ଟିଫେନ ହେଣ୍ଡ୍ରି (୭ ଥର), ଇଂଲଣ୍ଡର ରୋନି ଓ’ସୁଲିଭାନ, ଓ୍ବେଲ୍ସର ରୟ ରିଅର୍ଡନ ଏବଂ ଇଂଲଣ୍ଡର ଷ୍ଟିଭ୍ ଡେଭିସ (ସମସ୍ତେ ୬ ଥର ଲେଖାଏ) ସେଲ୍ବିଙ୍କଠାରୁ ଅଧିକଥର ବିଶ୍ୱ ଟାଇଟଲ ହାସଲ କରିଛନ୍ତି। ୪ର୍ଥ ଟାଇଟଲ ସହ ସେଲ୍ବି ସ୍କଟଲାଣ୍ଡର ଜନ୍ ହିଗିନ୍ସଙ୍କ ସମକକ୍ଷ ହୋଇଛନ୍ତି। ମହାମାରୀଜନିତ ଲକ୍ଡାଉନ୍ କଟକଣା ସମୟରେ ବହୁଳ ସମାବେଶରୁ ସୁରକ୍ଷିତଭାବେ ଘରକୁ ଫେରିବା ପାଇଁ ଇଂଲଣ୍ଡର ଶେଫିଲ୍ଡରେ ୧୭ ଦିନ ବିଶିଷ୍ଟ ଏହି ଇନ୍ଡୋର ଟୁର୍ନାମେଣ୍ଟ ପାଇଲଟ ପ୍ରୋଗ୍ରାମର ଅଂଶବିଶେଷ। କ୍ରୁକିବଲ ପକ୍ଷରୁ ପ୍ରଥମ ରାଉଣ୍ଡ ଅବସରରେ ୩୩ ପ୍ରତିଶତ, ଦ୍ୱିତୀୟ ରାଉଣ୍ଡରେ ୫୦ ପ୍ରତିଶତ ଏବଂ ୨ଦିନ ବିଶିଷ୍ଟ ଫାଇନାଲ ବେଳକୁ ଶତ ପ୍ରତିଶତ ଦର୍ଶକଙ୍କୁ ଅନୁମତି ଦିଆଯାଇଥିଲା। କୌଣସି ଦର୍ଶକ ଭେନ୍ୟୁରେ ପ୍ରବେଶ ପୂର୍ବରୁ କୋଭିଡ୍-୧୯ ଟେଷ୍ଟ ବାଧ୍ୟତାମୂଳକ ଥିଲା। ରିପୋର୍ଟ ନେଗେଟିଭ ଥିବା ବ୍ୟକ୍ତିଙ୍କୁ ହିଁ ଅନୁମତି ମିଳୁଥିଲା।
