ଲଣ୍ଡନ,୧୪ା୯: ବିଶ୍ୱବ୍ୟାପୀ ଅଧିକାଂଶ ଦେଶରେ ଲକ୍ଡାଉନ ଫଳରେ ପ୍ରଦୂଷଣ ହାରରେ ସାମାନ୍ୟ ହ୍ରାସ ଘଟିଥିଲା। ଏବେ ଏହା ମହାମାରୀ ପୂର୍ବ ସ୍ଥିତିକୁ ଟପିଗଲାଣି ବୋଲି ଜାତିସଂଘ ସତର୍କ କରାଇବା ସହ ବିଶ୍ୱ ଭୁଲ୍ ଦିଗରେ ଯାଉଥିବା କହିଛି। ଜାତିସଂଘ ରିପୋର୍ଟ ଅନୁଯାୟୀ, ଚଳିତ ବର୍ଷର ପ୍ରଥମ ୫ ମାସରେ ଅଙ୍ଗାରକାମ୍ଳ ନିର୍ଗମନ ୨୦୧୯ର ସେହି ସମୟଠାରୁ ୧.୨ ପ୍ରତିଶତ ଅଧିକ ରହିଛି। ବିଶେଷକରି ଆମେରିକା, ଭାରତ ଓ ଅଧିକାଂଶ ୟୁରୋପୀୟ ଦେଶରେ କାର୍ବନ ଡାଇଅକ୍ସାଇଡ୍ ନିର୍ଗମନ ବଢ଼ିଥିବା ପ୍ରାରମ୍ଭିକ ତଥ୍ୟରୁ ଜଣାପଡ଼ିଛି। ଜଳବାୟୁକୁ ଉତ୍ତପ୍ତ କରାଉଥିବା ଗ୍ୟାସ ସ୍ତର ସବୁଠି ବଢ଼ୁଛି। ଜଳବାୟୁ ପରିବର୍ତ୍ତନ ବିରୋଧରେ ଅନେକ ଦେଶ ପଦକ୍ଷେପ ନେଉଥିଲେ ମଧ୍ୟ ତାହା ଯଥେଷ୍ଟ ନୁହେଁ। ଉତ୍ତାପ ସୀମା ପ୍ରାକ୍ ଶିଳ୍ପ ସ୍ତରରୁ ୧.୫ ପ୍ରତିଶତ ଅଧିକ ସ୍ତରରେ ସୀମିତ ରଖିବାକୁ ଅନ୍ତର୍ଜାତୀୟ ସ୍ତରରେ ରାଜିନାମା ହୋଇଥିଲା। ଏହାକୁ ବଜାୟ ରଖିବାକୁ ହେଲେ ଆଉ ୭ ଗୁଣ ଆଗ୍ରହର ସହ ଜଳବାୟୁ ପରିବର୍ତ୍ତନ ରୋକିବା ଦିଗରେ କାର୍ଯ୍ୟ କରିବାକୁ ହେବ ବୋଲି ରିପୋର୍ଟରେ କୁହାଯାଇଛି।
ଜଳବାୟୁ ପରିବର୍ତ୍ତନର ପ୍ରଭାବ ନିକଟ ଅତୀତରେ ବେଶ୍ ଅନୁଭୂତ ହୋଇଛି। ବ୍ରିଟେନ ଏବଂ ୟୁରୋପରେ ଅତ୍ୟଧିକ ଗ୍ରୀଷ୍ମ ପ୍ରବାହ, ଚାଇନା ଏବଂ ଆମେରିକାରେ ଅନାବୃଷ୍ଟି ଏବଂ ପାକିସ୍ତାନରେ ପ୍ରଳୟଙ୍କରୀ ବନ୍ୟା ଜଳବାୟୁ ପରିବର୍ତ୍ତନର ପରିଣାମ ବୋଲି କୁହାଯାଉଛି। ଏଭଳି ବିପର୍ଯ୍ୟୟ ଆଦୌ ସ୍ବାଭାବିକ ନୁହେଁ ବୋଲି ଜାତିସଂଘ ମହାସଚିବ ଆଣ୍ଟୋନିଓ ଗୁଟେରେସ୍ କହିଛନ୍ତି। ମାନବଜାତିର ଜୀବାଶ୍ମ ଇନ୍ଧନ ବ୍ୟବହାର ଅଭ୍ୟାସ ଯୋଗୁ ମୂଲ୍ୟ ଦେବାକୁ ପଡ଼ୁଛି। ବନ୍ୟା, ମରୁଡ଼ି, ଗ୍ରୀଷ୍ମଲହରି, ସାମୁଦ୍ରିକ ବାତ୍ୟା, ବନାଗ୍ନି ଅଧିକରୁ ଅଧିକ ଖରାପ ହେବାରେ ଲାଗିଛି ବୋଲି ଗୁଟେରେସ୍ କହିଛନ୍ତି। ଆଗାମୀ ଦିନରେ ଏଭଳି ପ୍ରାକୃତିକ ବିପର୍ଯ୍ୟୟ ବଢ଼ିବ। ତାପମାତ୍ରା ବୃଦ୍ଧି ଯୋଗୁ ଲୋକେ ସାମାଜିକ ଓ ଆର୍ଥତ୍କ ଦୃଷ୍ଟିରୁ କ୍ଷତିଗ୍ରସ୍ତ ହେବେ ବୋଲି ଜାତିସଂଘ ପକ୍ଷରୁ ସତର୍କ କରାଯାଇଛି।
