ଦୁବାଇ,୧୭।୩(ପି.ଟି.): ଦକ୍ଷିଣ ଆଫ୍ରିକା ବିପକ୍ଷ ଘରୋଇ ଦିନିକିଆ ସିରିଜରେ ଦମ୍ଦାର ପ୍ରଦର୍ଶନ କରି ଭାରତୀୟ ମହିଳା କ୍ରିକେଟର ପୁନମ ରାଉତ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ମହିଳା ଦିନିକିଆ ର଼୍ୟାଙ୍କିଙ୍ଗ୍ର ଶ୍ରେଷ୍ଠ ୨୦ରେ ସ୍ଥାନ ପାଇଛନ୍ତି। ମଙ୍ଗଳବାର ପ୍ରକାଶିତ ର଼୍ୟାଙ୍କିଙ୍ଗ୍ରେ ପୁନମ ବ୍ୟାଟିଂ ତାଲିକାରେ ଉନ୍ନତି କରିଛନ୍ତି। ପୂର୍ବରୁ ସେ କ୍ୟାରିୟର ଶ୍ରେଷ୍ଠ ୧୩ତମ ସ୍ଥାନ ଅଧିକାର କରିଥିଲେ। ତେବେ ଏବେ ସେ ୮ଟି ସ୍ଥାନ ଉପରକୁ ଉଠି ୧୮ତମ ସ୍ଥାନ ଅଧିକାର କରିଛନ୍ତି। ଗତ ୩ଟି ମ୍ୟାଚ୍ରେ ସେ ଅପରାଜିତ ୬୨, ୭୭ ଓ ଅପରାଜିତ ୧୦୪ ରନର ଶତକୀୟ ପାଳି ଖେଳିଛନ୍ତି।
ଓପନର ସ୍ମୃତି ମାନ୍ଧନା ପୂର୍ବପରି ୭ମ ସ୍ଥାନରେ ରହି ଶ୍ରେଷ୍ଠ ଭାରତୀୟ ବ୍ୟାଟ୍ସଓମ୍ୟାନ ବିବେଚିତ ହୋଇଛନ୍ତି। ଅଧିନାୟିକା ମିଥାଲି ରାଜ ୯ମ ସ୍ଥାନରେ ରହିଛନ୍ତି। ଉପଅଧିନାୟିକା ହରମନପ୍ରୀତ କୌର ଦୁଇଟି ସ୍ଥାନ ଉପରକୁ ଉଠି ୧୫ତମ ସ୍ଥାନରେ ରହିଛନ୍ତି। ସେହିପରି ବୋଲିଂ ତାଲିକାରେ ହରମନପ୍ରୀତ ୩ଟି ସ୍ଥାନ ଉପରକୁ ଉଠି ୪୯ତମ ସ୍ଥାନ ଅଧିକାର କରିଛନ୍ତି।
ବାମହାତୀ ସ୍ପିନର ରାଜେଶ୍ୱରୀ ଗାଏକ୍ୱାଡ ୪ଟି ସ୍ଥାନ ଉପରକୁ ଉଠି ୧୮ତମ ସ୍ଥାନରେ ରହିଛନ୍ତି। ସେ ଗତ ୩ଟି ମ୍ୟାଚ୍ରେ ୫ଟି ଉଇକେଟ ହାସଲ କରିଛନ୍ତି। ସେହିପରି ବ୍ୟାଟିଂ ତାଲିକାରେ ସେ ୫ଟି ସ୍ଥାନ ଉପରକୁ ଉଠି ୭୧ତମ ସ୍ଥାନରେ ରହିଛନ୍ତି। ସୁଷମା ବର୍ମା ବ୍ୟାଟିଂ ତାଲିକାରେ ୩ଟି ସ୍ଥାନ ଉପରକୁ ଉଠି ୮୧ତମ, ମାନସୀ ଜୋଶୀ ବୋଲିଂ ତାଲିକାରେ ୫ଟି ସ୍ଥାନ ଉପରକୁ ଉଠି ୬୪ତମ ସ୍ଥାନ ଅଧିକାର କରିଛନ୍ତି।
ଦକ୍ଷିଣ ଆଫ୍ରିକା ଓପନର ଲିଜେଲ ଲି ୭ଟି ସ୍ଥାନ ଉପରକୁ ଉଠି ବ୍ୟାଟିଂ ତାଲିକାର ଶୀର୍ଷ ସ୍ଥାନ ଅଧିକାର କରିଛନ୍ତି। ଗତ ସପ୍ତାହରେ ୩ଟି ମ୍ୟାଚ୍ରେ ସେ ୪, ଅପରାଜିତ ୧୩୨ ଓ ୬୯ ରନ ସଂଗ୍ରହ କରିଛନ୍ତି। ଏହା ପୂର୍ବ ସପ୍ତାହରେ ସେ ଭାରତ ବିପକ୍ଷ ପ୍ରଥମ ଦିନିକିଆ ମ୍ୟାଚ୍ରେ ୮୩ ରନର ଇନିଂସ ଖେଳି ୧୧ଟି ସ୍ଥାନ ଉପରକୁ ଉଠିଥିଲେ। ଏକମାତ୍ର ଦକ୍ଷିଣ ଆଫ୍ରିକା ବ୍ୟାଟ୍ସଓମ୍ୟାନ ଭାବେ ଲି ବ୍ୟାଟିଂ ତାଲିକାର ଶୀର୍ଷ ସ୍ଥାନ ଅଧିକାର କରିଛନ୍ତି। ସେହିପରି ଲଉରା ଗୁଡାଲ ୨୭ଟି ସ୍ଥାନ ଉପରକୁ ଉଠି ବ୍ୟାଟିଂ ତାଲିକାର ୪୮ତମ ସ୍ଥାନ ଅଧିକାର କରିଛନ୍ତି। ଅଫ୍ ସ୍ପିନର ନଣ୍ଡୁମିସୋ ଶାଙ୍ଗାସ ୧୮ଟି ସ୍ଥାନ ଉପରକୁ ଉଠି ୬୮ତମ ସ୍ଥାନରେ ରହିଛନ୍ତି। ଆୟାବୋଙ୍ଗା ଖାକା ଗୋଟିଏ ସ୍ଥାନ ଉପରକୁ ଉଠି ବୋଲିଂ ତାଲିକାର ୯ମ ଓ ୨ଟି ସ୍ଥାନ ଉପରକୁ ଉଠି ବ୍ୟାଟିଂ ତାଲିକାର ଟପ୍ ୧୦୦ରେ ସ୍ଥାନ ପାଇଛନ୍ତି।
