ଆଜିର ବ୍ୟସ୍ତବହୁଳ ଜୀବନ ହେଉ ଅବା ପରିବର୍ତ୍ତିତ ଜୀବନଶୈଳୀ ଲାଗି ଅନେକ ମହିଳାଙ୍କଠାରେ ବିଭିନ୍ନ ସ୍ବାସ୍ଥ୍ୟ ସମସ୍ୟା ଦେଖାଦେଉଛି; ଯାହା ମଧ୍ୟରୁ ଅଣ୍ଟା, ଆଣ୍ଠୁ ଆଦି ଗଣ୍ଠି ଯନ୍ତ୍ରଣା ପ୍ରମୁଖ। ଆଉ ଏଥିରୁ ଉପଶମ ପାଇବା ଲାଗି ସେମାନେ ସଙ୍ଗେସଙ୍ଗେ ପେନ୍କିଲରର ସାହାଯ୍ୟ ନେଉଛନ୍ତି। ହେଲେ ଆପଣ ଜାଣନ୍ତି କି, ଡାକ୍ତରଙ୍କ ବିନା ପରାମର୍ଶରେ ଏଭଳି ଔଷଧର ଅଧିକ ସେବନ ସ୍ବାସ୍ଥ୍ୟ ପକ୍ଷେ ହାନିକାରକ ହୋଇପାରେ…
ଗ୍ରେଟର ଚିକାଗୋରେ ହୋଇଥିବା ଏକ ଗବେଷଣା ରିପୋର୍ଟ ମୁତାବକ ଡାକ୍ତରଙ୍କ ବିନା ପରାମର୍ଶରେ କିମ୍ବା ମନଇଚ୍ଛା ଦୈନିକ ଆବଶ୍ୟକ ମାତ୍ରାଚ୍ଠାରୁ ଅଧିକ ପେନ୍କିଲର୍ ବା ନନ୍-ଷ୍ଟେରଇଡାଲ୍ ଆଣ୍ଟି- ଇମ୍ଫ୍ଲାମେଟୋରି ଡ୍ରଗ୍ସର ସେବନ କରିବା ଦ୍ବାରା ଲିଭର(ଯକୃତ) ଖରାପ ହେବାର ଆଶଙ୍କା ଖୁବ୍ ବେଶି।
ଥଣ୍ଡା, ସାଇନସ ଏବଂ ଗ୍ୟାସ୍ ଭଳି ସମସ୍ୟା ଲାଗି ବ୍ୟବହୃତ ପେନ୍କିଲର ଅଧିକ ମାତ୍ରାରେ ସେବନ କରିବା ଦ୍ବାରା ଯକୃତ ସହିତ ପାକସ୍ଥଳୀ ମଧ୍ୟ ପ୍ରଭାବିତ ହୋଇଥାଏ; ଯାହାକି ପରବର୍ତ୍ତୀ ସମୟରେ ଅଲ୍ସର୍ର ଆଶଙ୍କାକୁ ବି ଦ୍ବିଗୁଣିତ କରିଥାଏ।
ଡାଇବେଟିସ୍ କିମ୍ବା ବ୍ଲଡ୍ପ୍ରେସର୍ ସମସ୍ୟା ଥିବା ମହିଳାଙ୍କଠାରେ ପେନ୍କିଲର୍ ଅଧିକ ମାତ୍ରାରେ ବ୍ୟବହାର କରିବା ଦ୍ୱାରା କିଡ୍ନୀ ଫେଲ୍ୟୁଅର୍ ହେବାର ଆଶଙ୍କା ରହିଥାଏ।
ପୁଣି କିଛି ପେନ୍କିଲର୍ର ମାତ୍ରାଧିକ ସେବନ କେତେକଙ୍କଠାରେ ରକ୍ତକୁ ପତଳା କରିବା ବା ରକ୍ତର ସାନ୍ଧ୍ରତା ହ୍ରାସ କରିବା ସହ ରକ୍ତଚାପ ସମସ୍ୟା ସୃଷ୍ଟି କରିଥାଏ।
ତେଣୁ ସହଜ ଉପଲବ୍ଧ ହୋଇଥିବାରୁ ପେନ୍କିଲର ସେବନକୁ ନ ଆପଣେଇ ବିଭିନ୍ନ ଘରୋଇ ଉପଚାର ସହ ଯୋଗବ୍ୟାୟାମକୁ ଜୀବନଶୈଳୀରେ ସାମିଲ କରି ଏକ ଯନ୍ତ୍ରଣା ମୁକ୍ତ ଜୀବନ ଜିଅନ୍ତୁ।
