ଖୋର୍ଦ୍ଧା ଅଫିସ୍,୨୮।୨: ଖୋର୍ଦ୍ଧା ଟାଉନ ଥାନା ଅନ୍ତର୍ଗତ ପଲ୍ଲାରୁ ଜଣେ ବିବାହିତ ମହିଳାଙ୍କ ମୃତଦେହ ଜବତ ହୋଇଛି। ସେ ହେଲେ ଶ୍ରଦ୍ଧାଞ୍ଜଳି ରାଉତରାୟ(୨୫)।
ମାଜିଷ୍ଟ୍ରେଟଙ୍କ ଉପସ୍ଥିତିରେ ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ଲାଗି ଜିଲା ମୁଖ୍ୟ ଚିିତ୍ସାଳୟକୁ ପଠାଇଛି।
ସୂଚନାଯୋଗ୍ୟ, ଜୟମଙ୍ଗଳ ଗ୍ରାମର ପ୍ରତାପ ରାଉତରାୟଙ୍କ ଝିଅ ଶ୍ରଦ୍ଧାଞ୍ଜଳି ପଲ୍ଲାର ସୁରତ ଧାଉଡିଆସିଂଙ୍କ ପୁଅ ସୁଜିତଙ୍କୁ ୨୦୨୦ ଫେବୃୟାରୀ ୪ରେ ବୈଦିକ ରୀତିରେ ବିବାହ କରିଥିଲେ।
ପ୍ରତାପଙ୍କ ଅଭିଯୋଗ ଅନୁଯାୟୀ, ରବିବାର ସକାଳ ସମୟରେ ଶ୍ବଶୁରଙ୍କ ଫୋନ ଆସିଥିଲା, ଝିଅ ଆଉ ନାହିଁ। ଖବରପାଇ ପହଞ୍ଚିବା ବେଳେ ଝିଅ ଆତ୍ମହତ୍ୟା କରିଛି ବୋଲି ସୂଚନା ଦେଇଥିଲେ। ମୋ ଝିଅ ଉଚ୍ଚ ଶିକ୍ଷିତା। ସେ ଆତ୍ମହତ୍ୟା କରିନି, ବରଂ ତାଙ୍କ ଶାଶୁ,ଶ୍ବଶୁର, ଦୁଇ ନଣନ୍ଦ,ଜ୍ବାଇଁ ମିଶି ହତ୍ୟା କରିଥିବା ସେ ଅଭିଯୋଗ କରିଛନ୍ତି।
