ଗର୍ଭସ୍ଥ ଶିଶୁକୁ ହରାଇଲେ ମହିଳା
7:17 amOctober 12, 2022October 12, 2022 / 41

ବେଙ୍ଗାଲୁରୁ,୧୨।୧୦: ଜଗଦୀଶ ଗୌଡ଼ା କର୍ନାଟକର ଚିକ୍କାମାଗଲୁରୁ ଜିଲାରେ ଭାଜପାର ଜଣେ ଦୃଢ଼ ସମର୍ଥକ ଭାବେ ଜଣାଶୁଣା। ସେ ୧୬ ଜଣ ଦଳିତଙ୍କୁ ନିଜ କଫି ବଗିଚାରେ ୧୫ ଦିନ ଧରି ଅଟକ ରଖି ଅକଥନୀୟ ନିର୍ଯାତନା ଦେଇଥିଲେ। ସେମାନଙ୍କ ମଧ୍ୟରେ ଜଣେ ଗର୍ଭବତୀ ମହିଳା ଥିଲେ, ଯିଏକି ଆକ୍ରମଣର ଶିକାର ହେବା ପରେ ୨ ମାସର ଗର୍ଭସ୍ଥ ଶିଶୁକୁ ହରାଇବସିଲେ। ଅଭିଯୋଗ ପରେ ପୋଲିସ ଜଗଦୀଶ ଓ ତାଙ୍କ ପୁଅ ତିଲକ ଗୌଡ଼ାଙ୍କ ବିରୋଧରେ ମାମଲା ରୁଜୁ କରିଛି। ଉଭୟେ ଫେରାର ଥିବାବେଳେ ପୀଡ଼ିତା ମହିଳାଙ୍କୁ ଜିଲା ହସ୍ପିଟାଲରେ ଚିକିତ୍ସା କରାଯାଉଛି। ଏହି ଘଟଣାକୁ ନେଇ ବିବାଦ ସୃଷ୍ଟି ହେବା ପରେ ଭାଜପା ଏଥିରୁ ନିରାପଦ ଦୂରତ୍ୱ ଅବଲମ୍ବନ କରିବାକୁ ଉଚିତ ମଣିଛି। ଜଗଦୀଶ ଦଳୀୟ ନେତା କି ସଦସ୍ୟ ନୁହଁନ୍ତି। ସେ ଅନ୍ୟ ଭୋଟରଙ୍କ ଭଳି ଜଣେ ସମର୍ଥକ ବୋଲି ଭାଜପା ଜିଲା ମୁଖପାତ୍ର ବରସିଦ୍ଧି ବେଣୁଗୋପାଳ କହିଛନ୍ତି। ନିର୍ଯାତନାର ଶିକାର ହୋଇଥିବା ବ୍ୟକ୍ତିମାନେ ଜେନୁଗାଡ୍ଡେ ଗ୍ରାମରେ ଥିବା କଫି ବଗିଚାରେ ଦିନ ମଜୁରିଆ ଭାବେ କାର୍ଯ୍ୟ କରୁଥିଲେ। ସେମାନେ ମାଲିକ ଜଗଦୀଶଙ୍କଠାରୁ ୯ ଲକ୍ଷ ଟଙ୍କା କରଜ ନେଇଥିଲେ। ଋଣ ପରିଶୋଧ କରି ନ ପାରିବାରୁ ସେ ତାଙ୍କୁ ବନ୍ଦ ଘରେ ରଖିଥିଲେ ବୋଲି ପୋଲିସ କହିଛି।