ଭୁବନେଶ୍ୱର,(ବ୍ୟୁରୋ)୨୬ା୮:ଭୁବନେଶ୍ୱର ଜୟଦେବ ବିହାରସ୍ଥିତ ଏକ କ୍ଲିନିକ ବିରୋଧରେ ୨୦୧୯ରେ ହୋଇଥିବା ବେଆଇନ କନ୍ୟା ଭ୍ରୂଣ ହତ୍ୟା ମାମଲାରେ ଗୁରୁବାର ରାୟ ପ୍ରକାଶ ପାଇଛି। ଫେମିଲାଇଫ୍ ଫର୍ଟିଲିଟି ଫାଉଣ୍ଡେଶନ ପ୍ରାଇଭେଟ ଲିଃର ମାଲିକାଣୀ ତଥା ଡାକ୍ତର ନବନୀତା ପାଢୀଙ୍କୁ ଭୁବନେଶ୍ୱର ଜେଏମ୍ଏଫ୍ସି ଭାନୁ ପ୍ରତାପ ମିଶ୍ର ପିସି ଏଣ୍ଡ୍ ପିଏନ୍ଡିଟି ଆକ୍ଟର ଦଫା ୨୩ ଓ ୨୫ରେ ଅଭିଯୁକ୍ତ ଦର୍ଶାଇ ଅଢ଼େଇ ବର୍ଷ ଜେଲଦଣ୍ଡ ଶୁଣାଇଛନ୍ତି। ଏଥିସହ ତାଙ୍କୁ ୯ହଜାର ଟଙ୍କା ଅର୍ଥଦଣ୍ଡରେ ମଧ୍ୟ ଦଣ୍ଡିତ କରାଯାଇଛି। ଜରିମାନା ଅନାଦାୟ କ୍ଷେତ୍ରରେ ଅଧିକ ୫ମାସ ଜେଲଦଣ୍ଡ ଭୋଗିବାକୁ କୋର୍ଟ ତାଙ୍କ ରାୟରେ ଶୁଣାଇଛନ୍ତି।
ସୂଚନାନୁଯାୟୀ, ୨୦୧୯ ଅଗଷ୍ଟ ୩୦ରେ ଭୁବନେଶ୍ୱରର ବିଭିନ୍ନ କ୍ଲିନିକ କର୍ତ୍ତୃପକ୍ଷ ପିସି ଏଣ୍ଡ୍ ପିଏନ୍ଡିଟି ଆକ୍ଟକୁ ଠିକ ଭାବେ ମାନୁଛନ୍ତି କି ନାହିଁ ଯାଞ୍ଚ କରିବାକୁ ଆସିଷ୍ଟାଣ୍ଟ କଲେକ୍ଟର ଅଂଶୁମାନ ରଥଙ୍କୁ ଖୋର୍ଦ୍ଧା ଜିଲାପାଳ ନିର୍ଦ୍ଦେଶ ଦେଇଥିଲେ। ନିର୍ଦ୍ଦେଶକ୍ରମେ ରଥଙ୍କ ସମେତ ପରିବାର କଲ୍ୟାଣ ବିଭାଗର ୫ ଜଣ ସଦସ୍ୟ ଏବଂ ଶହୀଦନଗର ଥାନାରେ କାର୍ଯ୍ୟରତ ଏଏସ୍ଆଇ ଦେବରାଜ କିଶାନ ବିଭିନ୍ନ କ୍ଲିନିକରେ ଯାଞ୍ଚ ଆରମ୍ଭ କରିଥିଲେ। ସେହି ସମୟରେ ଜୟଦେବ ବିହାରସ୍ଥିତ ଫେମିଲାଇଫ୍ ପର୍ଟିଲିଟି ଫାଉଣ୍ଡେଶନ୍ ପ୍ରାଇଭେଟ ଲିଃ କ୍ଲିନିକ୍ର ଗୁମର କଥା ପଦାକୁ ଆସିଥିଲା। ୨୦୧୮ ସେପ୍ଚେମ୍ବର ୧୫ରୁ ପିସି ଏଣ୍ଡ୍ ପିଏନ୍ଡିଟି ଆକ୍ଟ ଲାଇସେନ୍ସ ରଦ୍ଦ ହୋଇଥିଲେ ମଧ୍ୟ ଉକ୍ତ କ୍ଲିନିକ୍କୁ ବେଆଇନ୍ ଭାବେ ଚଲାଯାଉଥିଲା। ଏପରିକି ଯାଞ୍ଚ ବେଳେ ସେଠାରେ କାର୍ଯ୍ୟରତ ଥିବା ଡାକ୍ତର ଓ ନର୍ସମାନେ ସାଧାରଣ ପୋଷାକରେ ଥିବା ଦେଖିବାକୁ ମିଳିଥିଲା। ଏଥିସହ ପ୍ରତିଦିନ କ୍ଲିନିକକୁ ଆସୁଥିବା ଆଗନ୍ତୁକଙ୍କ ସମ୍ଭନ୍ଧରେ ପ୍ରତିମାସରେ ଜିଲାପାଳ ଓ ପରିବାର କଲ୍ୟାଣ ବିଭାଗକୁ ପଠାଯାଉଥିବା ତାଲିକାରେ ତାଳମେଳ ରହୁ ନ ଥିଲା। ତେଣୁ ସେଠାରେ ବହୁଦିନ ଧରି ବେଆଇନ୍ ଭାବେ କନ୍ୟା ଭ୍ରୂଣ ହତ୍ୟା କରାଯାଉଥିବା ଯାଞ୍ଚ ଟିମ୍ ଜାଣିବାକୁ ପାଇଥିଲା। କ୍ଲିନିକ୍ରେ ଥିବା ୨ଟି ଅଲ୍ଟ୍ରାସାଉଣ୍ଡ ମେଶିନକୁ ଟିମ୍ ଜବତ କରିଥିଲା। ଏନେଇ ଖୋର୍ଦ୍ଧା ସିଡିଏମ୍ଓ ବିଶ୍ୱରଞ୍ଜନ ପତି ୨୦୨୧ ଅଗଷ୍ଟ ୩ରେ କ୍ଲିନିକ ମାଲିକାଣୀ ଥିବା ଡାକ୍ତର ନବନୀତାଙ୍କ ବିରୋଧରେ କୋର୍ଟରେ ମାମଲା (୩୨୬/୨୧) ଦାଏର କରିଥିଲେ। ତେବେ ଏହି ମାମଲାରେ ବିଚାରପତି ୭ଜଣ ସାକ୍ଷୀ ଏବଂ ୧୪ଟି ଦସ୍ତାବିଜ୍ ଆଧାରକୁ ଭିତ୍ତି କରି ନବନୀତାଙ୍କୁ ଦଣ୍ଡାଦେଶ ଦେଇଛନ୍ତି। ସହକାରୀ ସରକାରୀ ଓକିଲ ନିରଞ୍ଜନ ବେହେରା ଏହି ମାମଲା ପରିଚାଳନା କରୁଥିଲେ। ତେବେ ଏହି ଦଣ୍ଡାଦେଶ ବିରୋଧରେ ନବନୀତା ଉପର କୋର୍ଟଙ୍କ ଦ୍ୱାରସ୍ଥ ହେବେ ବୋଲି ସର୍ତ୍ତ ରଖି ଜାମିନରେ ଆସିଛନ୍ତି।
