ଯାଜପୁର ରୋଡ୍,୧୨।୧୦ (ଡି.ଏନ୍.ଏ.): ଯାଜପୁର ଜିଲା ବ୍ୟାସନଗର ଲକ୍ଷ୍ମୀନଗରସ୍ଥିତ ସେଣ୍ଟ ଜାଭିୟର ଉଚ୍ଚ ବିଦ୍ୟାଳୟ କର୍ତ୍ତୃପକ୍ଷ ବିନା ରସିଦ୍ରେ ଅତ୍ୟଧିକ ଫି’ ଆଦାୟ କରୁଥିବା ଅଭିଯୋଗ ଆଣିଛି ଅଭିଭାବକ କମିଟି। ୧୦ମ ଶ୍ରେଣୀ ପରୀକ୍ଷା ପାଇଁ ଫର୍ମ ପୂରଣ ବାବଦକୁ ସିବିଏସ୍ଇ ପକ୍ଷରୁ ପ୍ରତି ପିଲା ପାଇଁ ୧୮ଶହ ଟଙ୍କା ନିର୍ଦ୍ଧାରିତ ହୋଇଥିବା ବେଳେ ଉକ୍ତ ସ୍କୁଲ କର୍ତ୍ତୃପକ୍ଷ ୨୬ଶହ ଟଙ୍କା ଆଦାୟ କରୁଛନ୍ତି। ଏହାଛଡ଼ା ବହି, ଖାତା ଓ ୟୁନିଫର୍ମ ପାଇଁ ମଧ୍ୟ ସେମାନେ ଅଧିକ ଫି’ ନେଉଛନ୍ତି। ଏ ସବୁର ରସିଦ୍ ମଧ୍ୟ ଦିଆଯାଉନି ବୋଲି ରବିବାର ଆୟୋଜିତ ଖବରଦାତା ସମ୍ମିଳନୀରେ ଅଭିଭାବକ କମିଟି ଅଭିଯୋଗ ଆଣିଛି। ଏଥିସହ କରୋନା ମହାମାରୀ ସମୟରେ ରି-ଆଡ୍ମିଶନ ଫି’ ଏବଂ ମାସିକ ଦେୟ ବାବଦରେ ମନମୁଖି ଅର୍ଥ ବୃଦ୍ଧି କରାଯାଇଥିଲା। ଏହାଛଡ଼ା ଏହି ଦେୟ ଅନ୍ଲାଇନ୍ରେ ପୈଠ କରିବାକୁ ସରକାରୀ ନିର୍ଦ୍ଦେଶ ରହିଥିଲେ ବି ସ୍କୁଲ କର୍ତ୍ତୃପକ୍ଷ ଏହାକୁ ଉଲ୍ଲଂଘନ କରି ନଗଦ ଟଙ୍କା ଜମା କରିବାକୁ ନିର୍ଦ୍ଦେଶ ଦେଇଥିଲେ। ଏ ସଂକ୍ରାନ୍ତରେ ଗତ ୯ ତାରିଖରେ ଯାଜପୁର ଜିଲାପାଳ, ଅତିରିକ୍ତ ଜିଲାପାଳ କଳିଙ୍ଗନଗର, ଯାଜପୁର ଏସ୍ପି, ଡିଇଓ, ବ୍ୟାସନଗର ତହସିଲଦାର ଓ ଯାଜପୁର ରୋଡ୍ ଥାନାଧିକାରୀଙ୍କୁ ଅଭିଯୋଗପତ୍ର ଦିଆଯାଇଛି। ଏହି ସମସ୍ୟାର ସମାଧାନ କରା ନ ଗଲେ ଅଭିଭାବକ କମିଟି ପକ୍ଷରୁ ଆଗାମି ଦିନରେ ଆନ୍ଦୋଳନ କରାଯିବ ବୋଲି କର୍ମକର୍ତ୍ତା ଚେତାବନୀ ଦିଆଯାଇଛି। ଏ ସମ୍ପର୍କରେ ସେଣ୍ଟ ଜାଭିୟର ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ପ୍ରଦୀପ କୁମାର ତ୍ରିପାଠୀଙ୍କୁ ପଚାରିବାରେ ଫର୍ମ ଫିଲ ଅପ୍ ଫି’ ୧୮୦୦ଟଙ୍କା ନୁହେଁ, ବରଂ ୨୧୫୦ଟଙ୍କା। ଆଉ ୪୫୦ ଟଙ୍କା ଏକ ପୁସ୍ତକ, ଲାବରୋଟରୀ ଓ ଅନ୍ୟାନ୍ୟ ଖର୍ଚ୍ଚ ବାବଦରେ ନିଆଯାଇଛି। ଟଙ୍କା ସିବିଏସ୍ଇରେ ପୈଠ କରାଯିବା ପରେ ଅଭିଭାବକମାନଙ୍କୁ ରସିଦ ଦିଆଯିବ ବୋଲି କହିଛନ୍ତି। ଆୟୋଜିତ ଖବରଦାତା ସମ୍ମିଳନୀରେ କମିଟି ସଭାପତି ସଞ୍ଜିତ କୁମାର ଜେନା, ଉପସଭାପତି ବିନୋଦିନୀ ଦୋରା ଓ ବିଜୟାନନ୍ଦ ମହାରଣା, ସାଧାରଣ ସମ୍ପାଦକ ରଞ୍ଜନ ନାୟକ, ମୁଖ୍ୟ ଉପଦେଷ୍ଟା କୁଳମଣି ଧଳ, ସହ କୋଷାଧ୍ୟକ୍ଷା ମଞ୍ଜୁଶ୍ରୀ ରାଉତ ପ୍ରମୁଖ ଉପସ୍ଥିତ ଥିଲେ।
