ନୂଆଦିଲ୍ଲୀ,୧୭।୫ : ନାରଦା ଲାଞ୍ଚ କାରବାର ମାମଲାରେ ପଶ୍ଚିମବଙ୍ଗର ଦୁଇ ମନ୍ତ୍ରୀ ଓ ଜଣେ ବିଧାୟକ ସମେତ ୪ ଜଣ ଗିରଫ ହେବା ପରେ ମଧ୍ୟ ଅସନ୍ତୋଷ ପ୍ରକାଶ କରିଛନ୍ତି ଅଭିଯୋଗ କାରୀ ତଥା ସିନିୟର ଜର୍ନାଲିଷ୍ଟ ମାଥ୍ୟୁ ସାମୁଏଲ। ୨୦୧୬ରେ ତାଙ୍କ ଦ୍ୱାରା କରାଯାଇଥିବା ଷ୍ଟିଙ୍ଗ୍ ଅପରେଶନ ଜରିଆରେ ଏହି ଲାଞ୍ଚ କାରବାର ଘଟଣା ସାମ୍ନାକୁ ଆସିଥିଲା। ନାରଦା ଲାଞ୍ଚ କାରବାର ଘଟଣାରେ ଶୁଭେନ୍ଦୁ ଅଧିକାରୀ ଓ ମୁକୁଲ ରୟ (ଦୁହେଁ ଟିଏମ୍ସି ଛାଡ଼ି ଭାଜପାରେ ମିଶିଛନ୍ତି)ଙ୍କ ଭଳି କିଛି ହେଭିଓ୍ବେଟ ନେତାଙ୍କ ବିରୋଧରେ ମଧ୍ୟ ପ୍ରମାଣ ରହିଛି। ଏହାସତ୍ତ୍ୱେ କାହିଁକି ଭାଜପା ନେତାଙ୍କୁ ଗିରଫ କରାଯାଉନାହିଁ ବୋଲି ପ୍ରଶ୍ନ କରିଛନ୍ତି ସିନିୟର ଜର୍ନାଲିଷ୍ଟ।
ଦୀର୍ଘ ଦିନ ପରେ ଖୁସି ଆସିଛି। ଷ୍ଟିଙ୍ଗ୍ ଅପରେଶନର ଭିଡିଓ ୨୦୧୬ରେ ପ୍ରକାଶ ପାଇଥିଲା। ୩ ବର୍ଷ ତଳେ ପ୍ରସ୍ତୁତ ହୋଇଥିଲା ମାମଲାର ଚାର୍ଜ ଶିଟ। ଏହାସତ୍ତ୍ୱେ ସେତେବେଳେ ସିବିଆଇ ରାଜନେତାଙ୍କୁ ଛୁଇଁ ପାରି ନ ଥିବା କହିଛନ୍ତି ଇନଭେଷ୍ଟିଗେଟିଭ ଜର୍ନାଲିଷ୍ଟ ତଥା ନାରଦା ନ୍ୟୁଜର ପ୍ରତିଷ୍ଠାତା ସାମୁଏଲ।
୨୦୧୬ରେ ପଶ୍ଚିମବଙ୍ଗ ବିଧାନସଭା ନିର୍ବାଚନ ପରେ ନାରଦା ନ୍ୟୁଜ ପକ୍ଷରୁ ଏକ ଭିଡିଓ ଶେୟାର କରାଯାଇଥିଲା। ସେଥିରେ ଦେଖିବାକୁ ମିଳିଥିଲା କିଛି ସହାୟତା କରିବା ପାଇଁ ପ୍ରତିଶ୍ରୁତି ବଦଳରେ ତୃଣମୂଳ କଂଗ୍ରେସର ନେତାମାନେ ଲାଞ୍ଚ ନେଉଥିଲେ। ଏମାନଙ୍କ ମଧ୍ୟରେ ମୁଖ୍ୟମନ୍ତ୍ରୀଙ୍କ ମମତାଙ୍କ ପୂର୍ବତନ ଘନିଷ୍ଠ ତଥା ବର୍ତ୍ତମାନ ବିରୋଧି ଦଳ ନେତା ଶୁଭେନ୍ଦୁ ଓ ମୁକୁଲ ରୟ ମଧ୍ୟ ରହିଛନ୍ତି।
” ଶୁଭେନ୍ଦୁ ଅଧିକାରୀଙ୍କୁ ତାଙ୍କ ଅଫିସରେ ମୁଁ ଟଙ୍କା ଦେଇଛି। କିନ୍ତୁ ତାଙ୍କ ନାମ ସିବିଆଇ ତାଲିକାରେ ନାହିଁ। ଫରେନ୍ସିକ ଟେଷ୍ଟରୁ ଶୁଭେନ୍ଦୁ ଦୋଷୀ ବୋଲି ପ୍ରମାଣ ହୋଇଥିଲା। ଏ ସଂକ୍ରାନ୍ତରେ ମୋଠାରୁ ଷ୍ଟେଟ୍ମେଣ୍ଟ ନେଇଥିଲା ସିବିଆଇ। ଶୁଭେନ୍ଦୁ ତାଙ୍କ ଦୋଷ ମଧ୍ୟ ସ୍ବୀକାର କରିଥିବା ମଧ୍ୟ ଜାଣିବାକୁ ପାଇଥିଲି “ ବୋଲି ସାମୁଏଲ କହିଛନ୍ତି। ଉଲ୍ଲେଖଯୋଗ୍ୟ, ମମତା ବାନାର୍ଜୀଙ୍କ ନୂଆ ସରକାରରେ କ୍ୟାବିନେଟ ମନ୍ତ୍ରୀ ଥିବା ସୁବ୍ରତ ମୁଖାର୍ଜୀ ଓ ଫିର୍ହାଦ ହାକିମ, ଟିଏମ୍ସିର ପୂର୍ବତନ ବିଧାୟକ ସୋଭେନ ଚାଟାର୍ଜୀ ଓ ଅନ୍ୟ ଦଳର ବିଧାୟକ ମଦନ ମିତ୍ରଙ୍କୁ ନାରଦା ମାମଲାରେ ସିବିଆଇ ଗିରଫ କରିଛି।
