ବମ୍ବେ: ୩ ବର୍ଷର ପ୍ରେମ, ୧୬ ବର୍ଷର ବିବାହକୁ ଭୁଲି ଆଗକୁ ବଢ଼ିଛନ୍ତି ବଲିଉଡ୍ ଅଭିନେତା ଫରହାନ୍ ଅଖ୍ତର। ଶନିବାର ସେ ପ୍ରେମିକା ଶିବାନୀ ଦାଣ୍ଡେକରଙ୍କୁ ବିବାହ କରିଛନ୍ତି। ଉଭୟ ଦୀର୍ଘ ଚାରି ବର୍ଷ ଧରି ପରସ୍ପରକୁ ଡେଟ୍ କରୁଥିଲେ। ସେମାନଙ୍କ ବିବାହର ଅନେକ ଫଟୋ ଏବଂ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି।
ବ୍ୟକ୍ତିଗତ ଜୀବନ ଦେଖିଲେ ଫର୍ହାନ ଅଧୁନା ଭବାନୀଙ୍କୁ ପ୍ରଥମେ ବିବାହ କରିଥିଲେ। ୨୦୧୬ରେ ସେମାନେ ଅଲଗା ହେବାକୁ ନିଷ୍ପତ୍ତି ନେଇଥିଲେ। ୨୦୧୭ରେ ସେମାନଙ୍କ ଛାଡ଼ପତ୍ର ହୋଇଥିଲା। ଏହି ବିବାହରୁ ସେମାନଙ୍କର ଦୁଇ ଝିଅ ରହିଛି।
ପେସାରେ ଅଧୁନା ଜଣେ ସେଲିବ୍ରିଟି ହେୟାରଷ୍ଟାଇଲିଷ୍ଟ। ଲଣ୍ଡନରେ ତାଙ୍କ ଜନ୍ମ। ଫର୍ହାନଙ୍କଠାରୁ ୬ ବର୍ଷ ବଡ଼ ଥିଲେ ସେ।
ଏକ ନାଇଟ୍ କ୍ଲବରେ ଦେଖା ହେବା ପରେ ପ୍ରେମରେ ପଡ଼ିଥିଲେ ଉଭୟ। ତିନି ବର୍ଷ ଧରି ସେମାନେ ଡେଟ୍ କରିଥିଲେ। ବୟସରେ ବଡ଼ ଥିବା ସତ୍ତ୍ୱେ ଫର୍ହାନ ୨୦୦୦ରେ ଅଧୁନାଙ୍କ ହାତ ଧରିଥିଲେ। ମାତ୍ର ଅଲଗା ହେବା ପରେ ଅନେକ ନାୟିକାଙ୍କ ସହ ଫରହାନଙ୍କ ନାଁ ଯୋଡ଼ା ଯାଇଥିଲା। ସେଥିରେ ଅଦିତି ରାଓ ହୈଦରୀ ଏବଂ ଶ୍ରଦ୍ଧା କପୁର ପ୍ରମୁଖ ରହିଥିଲେ। ମାତ୍ର ଶେଷରେ ଶିବାନୀ ହିଁ ତାଙ୍କ ହୃଦୟରେ ଜାଗା କରିବାରେ ସଫଳ ହୋଇଥିଲେ।
