ଭୁବନେଶ୍ୱର,୨୧।୩: ଓଡ଼ିଶାରେ ଭାରତୀୟ ଜନତା ପାର୍ଟି(ଭାଜପା) ଏବଂ ବିଜୁ ଜନତା ଦଳ(ବିଜେଡି) ମଧ୍ୟରେ ହେବାକୁ ଥିବା ସମ୍ଭାବ୍ୟ ମେଣ୍ଟ ଆସନ ଭାଗବଣ୍ଟାରେ ଅଟକିଛି। ରାଜ୍ୟରେ ଏକା ସାଙ୍ଗରେ ହେବାକୁ ଥିବା ବିଧାନସଭା ଏବଂ ଲୋକସଭା ନିର୍ବାଚନକୁ ଆଉ ଗୋଟିଏ ସପ୍ତାହ ବାକି ଥିବା ବେଳେ ଏଭଳି ସ୍ଥିତି ଲାଗି ରହିଛି।
ବିଜେଡି ସୂତ୍ରରୁ ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁଯାୟୀ ଓଡ଼ିଶାରେ ଭାଜପା ୫୭ ଟି ବିଧାନସଭା ଆସନ ଏବଂ ୧୩-୧୪ ଲୋକସଭା ଆସନରେ ଲଢ଼ିବାକୁ ଚାହୁଁଛି। ଏହାଫଳରେ ବିଜେଡି ପାଖରେ କେବଳ ୯୦ ବିଧାନସଭା ଆସନ ଏବଂ ୬-୭ ଲୋକସଭ ଆସନ ରହିବ।
ବର୍ତମାନ ଓଡ଼ିଶାରେ ଭାଜପାର ୮ ଲୋକସଭା ଏମପି ଏବଂ ୨୩ ବିଧାୟକ ରହିଛନ୍ତି। ଯେତେବେଲେକି ବିଜେଡି ନିକଟରେ ୧୧୨ ବିଧାୟକ ଏବଂ ୧୨ଲୋକସଭ ଏମପି ରହିଛନ୍ତି। ସୂତ୍ର ଅନୁସାରେ ମେଣ୍ଟରେ ବିଜେଡି ଭାଜପାକୁ ବଡ଼ ଭାଇ ରୂପେ ଗ୍ରହଣ କରୁ ବୋଲି ଦଳ ଚାହୁଁଛି। ତେବେ ବିଜେଡି ନେତାମାନେ ଏହି ପ୍ରସ୍ତାବକୁ ପ୍ରତ୍ୟାଖାନ କରିଥିବା କୁହାଯାଉଛି।
ଅନ୍ୟପକ୍ଷରେ ଭାଜପାର ରାଜ୍ୟ ୟୁନିଟ୍ ଏହାର ମୂଳଦୁଆକୁ ମଜବୁତ କରିବା ଏବଂ ସମସ୍ତ ଆସନରେ ପ୍ରତିଦ୍ୱନ୍ଦ୍ୱିତା କରିବା ପାଇଁ ଓଡ଼ିଶାରେ ଏକାକୀ ନିର୍ବାଚନ ଲଢ଼ିବାକୁ ଆଗ୍ରହୀ ରହିଛି। ରାଜ୍ୟ ଭାଜପା ନେତାମାନେ ଯୁକ୍ତି କରିଛନ୍ତି ଯେ ଗତ 10 ବର୍ଷ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଲୋକପ୍ରିୟତା ହେତୁ ଦଳର ଭୋଟ୍ ପ୍ରତିଶତ ବୃଦ୍ଧି ପାଇଛି।
ବିଧାନସଭା ନିର୍ବାଚନରେ ୬୦ ରୁ ଅଧିକ ସିଟ୍ ଏବଂ ଲୋକସଭା ନିର୍ବାଚନରେ ୧୪-୧୫ ସିଟ୍ ଜିତିବାକୁ ଭାଜପା ରାଜ୍ୟ ନେତୃତ୍ୱ ଆଶାବାଦୀ ଅଛନ୍ତି। ନିକଟରେ ଏକ ଗଣମାଧ୍ୟମ ସମ୍ମିଳନୀରେ ବିଜେଡି ନେତା କାର୍ତ୍ତିକ ପାଣ୍ଡିଆନଙ୍କ ମନ୍ତବ୍ୟ ଏକ ସମ୍ଭାବ୍ୟ ସହଯୋଗୀ ଦଳ ଉପରେ ଅନ୍ତିମ ନିଷ୍ପତ୍ତି ଶୀର୍ଷ ନେତୃତ୍ୱଙ୍କ ଉପରେ ରହିଛି।
ପାଣ୍ଡିଆନ କହିିଛନ୍ତି, ରାଜ୍ୟରେ ବିଜେଡିକୁ ନିର୍ବାଚନ ଗଣିତ ପାଇଁ ଭାଜପାର ଆବଶ୍ୟକତା ନାହିଁ। ସେହିପରି କେନ୍ଦ୍ରରେ ମଧ୍ୟ ସରକାର ଗଢ଼ିବା ପାଇଁ ଭାଜପାକୁ ବିଜେଡିର ସହଯୋଗ ଦରକାର ବୋଲି ସେ ଭାବୁନାହାନ୍ତି। ନବୀନ ପଟ୍ଟନାୟକ ପୁଣିଥରେ କ୍ଷମତାକୁ ଫେରିବା ଓ ଲୋକଙ୍କ ସେବା କରିବା ପାଇଁ ମେଣ୍ଟର ଆବଶ୍ୟକତା ନାହିଁ। କାହିଁକି ଜଣେ ମେଣ୍ଟ କରିବାକୁ ଚାହାଁନ୍ତି। ନିର୍ବାଚନ ଜିତିବାକୁ ହେଲେ ମେଣ୍ଟ କରିବାକୁ ପଡ଼େ। ମାତ୍ର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରାଜ୍ୟରେ ଜଣେ ଖୁବ୍ ଲୋକପ୍ରିୟ ନେତା। ପ୍ରତ୍ୟେକ ଥର ନିର୍ବାଚନରେ ସେ ତିନି ଚତୁର୍ଥାଂଶ ବହୁମତ ପାଇ ଆସିଛନ୍ତି। ନବୀନ ପଟ୍ଟନାୟକ କେବେ ମଧ୍ୟ ନିର୍ବାଚନ ଜିତିବା ପାଇଁ ମେଣ୍ଟର ଆବଶ୍ୟକତା ଅନୁଭବ କରନ୍ତି ନାହିଁ। ଗତ ପଞ୍ଚାୟତ ନିର୍ବାଚନରେ ୯୦ ପ୍ରତିଶତ ଆସନ ବିଜେଡିକୁ ମିଳିଥିଲା। ରାଜ୍ୟର ୨ ନମ୍ବର ଦଳ ଭାବେ ଭାଜପାକୁ ମାତ୍ର ୫ ପ୍ରତିଶତ ସଫଳତା ମିଳିଥିଲା। ରାଜ୍ୟରେ ସରକାର ଗଢ଼ିବା ପାଇଁ ନବୀନଙ୍କୁ କାହା ସହ ମେଣ୍ଟ କରିବାର ଆବଶ୍ୟକତା ନାହିଁ। ରାଜ୍ୟରେ ନବୀନ ପୁଣି ଥରେ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ତାହା ନିଃସନ୍ଦେହ। ସେହିପରି ବିଭିନ୍ନ ସର୍ଭେ କହୁଛି, କେନ୍ଦ୍ରରେ ନରେନ୍ଦ୍ର ମୋଦି ପୁଣିଥରେ ପ୍ରଧାନମନ୍ତ୍ରୀ ହେବେ। କେନ୍ଦ୍ରରେ ଭାଜପାକୁ ସରକାର ଗଢ଼ିବା ପାଇଁ ବିଜେଡିର ସହାୟତା ଦରକାର ପଡ଼ିବ ନାହିଁ। ତେବେ ଏହି ଦୁଇ ନେତା ବୃହତ୍ତର ଉଦ୍ଦେଶ୍ୟ ପାଇଁ ଏକାଠି ହେବାକୁ ଚାହୁଁଛନ୍ତି।
ସେହିଭାଇ ସମାନ କାର୍ଯ୍ୟକ୍ରମରେ ଯୋଗଦେଇ ଶାହା କହିଛନ୍ତି ଯେ ଓଡ଼ିଶାରେ ଏକାଠି ଲଢ଼ିବୁ କିମ୍ବା ଏକା ଲଢ଼ିବୁ ତାହା ସ୍ଥିର ହୋଇନି। ମାତ୍ର ଏକାକୀ ଲଢ଼ିଲେ ରାଜ୍ୟରେ ସରକାର ଗଢ଼ିବା ପାଇଁ ହିଁ ଲଢ଼ିବୁ। ଓଡ଼ିଶାରେ ମେଣ୍ଟ ହେବ କି ନାହିଁ ସେ ନେଇ କିଛି ଚୂଡ଼ାନ୍ତ ହୋଇନି। ଦଳର ରାଷ୍ଟ୍ରୀୟ ଅଧ୍ୟକ୍ଷ ଏ ନେଇ ନିଷ୍ପତ୍ତି ନେବେ। ତେବେ ଏହା ନିଶ୍ଚିତ ଯେ ଓଡ଼ିଶାରେ ଆମର ସ୍ଥିତି ଅଧିକ ସୁଦୃଢ଼ ହେବାକୁ ଯାଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପ୍ରତି ଓଡ଼ିଶା ଲୋକଙ୍କ ଭଲପାଇବା ଅଛି। ଦଳର କର୍ମକର୍ତ୍ତା ଉତ୍ସାହ, ବିନମ୍ରତାର ସହ ଏହାକୁ ସ୍ବୀକାର କରୁଛନ୍ତି ଓ ଅନୁଭବ ମଧ୍ୟ କରୁଛନ୍ତି। ତେଣୁ ଉଭୟ ବିଧାନସଭା ଓ ଲୋକ ସଭା ନିର୍ବାଚନ ଫଳାଫଳ ବହୁତ ଭଲ ହେବ। ନିର୍ବାଚନୀ ପଣ୍ଡିତମାନଙ୍କ ଗଣନାଠୁ ବହୁ ଅଧିକ ସିଟ୍ ପାଇବୁ।
ତେବେ ବିଜେଡି ସହ ମେଣ୍ଟକୁ ନେଇ ଶାହା କହିଛନ୍ତି, କିଛି ବି ହୋଇପାରେ। ଆମେ ଏକାଠି ଲଢ଼ିବୁ କି ଏକାକୀ ଲଢ଼ିବୁ ତାହା ପ୍ରଥମେ ସ୍ଥିର ହୋଇଯାଉ। ଯଦି ମିଶିକି ଲଢ଼ିବୁ, ବିଜୁବାବୁ ନେତା। ସ୍ବାଭାବିକ ଭାବେ ଆମେ ସହଯୋଗୀ ଭଳି ଲଢ଼ିବୁ। ଯଦି ଏକାକୀ ଲଢିବୁ ତା’ହେଲେ ସରକାର ଗଠନ କରିବାକୁ ହିଁ ଲଢ଼ିବୁ। ମେଣ୍ଟ ସର୍ବଦା ଆବଶ୍ୟକତା ଆଧାରରେ ହୁଏନି। ବହୁତ ଦଳ ଦେଶ ସ୍ବାର୍ଥରେ ପ୍ରସଙ୍ଗଭିତ୍ତିକ ସମର୍ଥନ ଦେଇଥାନ୍ତି। ଧାରା-୩୭୦ ଉଚ୍ଛେଦ, ଜିଏସ୍ଟି ଓ ନିର୍ବାଚନ ବଣ୍ଡ ଆଦି ପ୍ରସଙ୍ଗରେ ବି ସମର୍ଥନ ମିଳିଛି। କଂଗ୍ରେସ ମଧ୍ୟ ନିର୍ବାଚନ ବଣ୍ଡ ଆଗତ ବେଳେ ବିରୋଧ କରି ନ ଥିଲା। ରାଜନୀତିରୁ ଊର୍ଦ୍ଧ୍ୱକୁ ଉଠି ରାଷ୍ଟ୍ରୀୟ ହିତରେ ରାଜନୈତିକ ଦଳଗୁଡ଼ିକ ସରକାରଙ୍କୁ ସମର୍ଥନ ଦେଇଥାନ୍ତି। ଏହା ହେଉଛି ଗଣତନ୍ତ୍ରର ସୌନ୍ଦର୍ଯ୍ୟ।
