ନୂଆଦିଲ୍ଲୀ,୭ ।୧୦: ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ବୁଧବାର ଭାରତର ଏକ ମେଡିସିନ କମ୍ପାନୀକୁ ନେଇ ସତର୍କ ସୂଚନା ଜାରି କରିଛି । ଗାମ୍ବିୟାରେ ୬୬ ଶିଶୁଙ୍କ ମୃତ୍ୟୁ ପରେ ଡବ୍ଲୁଏଚଓ କହିଛି ଭାରତରେ ପ୍ରସ୍ତୁତ କରାଯାଇଥିବା ୪ କୋଲ୍ଡ ଓ କଫ୍ ସିରପ ଯୋଗୁ ଗାମ୍ବିୟାରେ ଶିଶୁଙ୍କ ମୃତ୍ୟୁ ହୋଇଛି । ଏହାକୁ ଭାରତର ମେଡିନ ଫାର୍ମାସୁଟିକାଲ କମ୍ପାନୀ ପ୍ରସ୍ତୁତ କରିଛି । ଏହାପରେ କମ୍ପାନୀ ବିରୋଧରେ ଯାଞ୍ଚ ଆରମ୍ଭ କରାଯାଇଛି ।
ଡବ୍ଲୁଏଚଓ କହିଛି ୬୬ ଶିଶୁଙ୍କ ମୃତ୍ୟୁରେ ଗୋଟିଏ ପାଟର୍ନ ସାମ୍ନାକୁ ଆସିଛି । ସମସ୍ତ ଶିଶୁଙ୍କ ବୟସ ୫ ବର୍ଷରୁ କମ ଥିଲା ଓ ଏମାନେ କଫ ସିରପ ଖାଇବାର ୩-୫ ଦିନ ମଧ୍ୟରେ ରୋଗରେ ଆକ୍ରାନ୍ତ ହେଉଥିଲେ । ଏହାସହ କୁହାଯାଇଛି କି ୪ଟି ଯାକ କଫ ସିରପରେ ଡାଇଥିଲିନ ଗ୍ଲାୟକୋଲ ଓ ଇଥିଲିନ ଗ୍ଲାୟକୋଲର ମାତ୍ରା ଆବଶ୍ୟକତାଠାରୁ ଅଧିକ ଥିଲା ।
ଏହି ବିବାଦ ପରେ ହରିୟାଣାର ସ୍ୱାସ୍ଥ୍ୟମନ୍ତ୍ରୀ ଅନିଲ ବିଜ କହିଛନ୍ତି, କମ୍ପାନୀ ପକ୍ଷରୁ ଉତ୍ପାଦିନ କଫ ସିରପର ସାମ୍ପଲକୁ କୋଲକାତା ସ୍ଥିତ କେନ୍ଦ୍ରୀୟ ଔଷଧ ପ୍ରୟୋଗଶାଳାକୁ ଯାଞ୍ଚ ପାଇଁ ପଠାଯାଇଛି । ନମୁନାକୁ ଡିସିଜିଆଇ ଓ ହରିୟାଣାର ଫୁଡ ଏବଂ ଡ୍ରଗ୍ସ ଆଡମିନିଷ୍ଟ୍ରେଶନ ବିଭାଗ ଏକାଠି କରିଛନ୍ତି ଓ ଏହାକୁ କୋଲକାତା ସ୍ଥିତ ସିଡିଏଲକୁ ପଠାଯାଇଛି । କେନ୍ଦ୍ର ଔଷଧ ବିଭାଗର ଜଣେ ବରିଷ୍ଠ ଅଧିକାରୀ ହରିୟାଣାର ଅତିରିକ୍ତ ମୁଖ୍ୟ ସଚିବ(ସ୍ୱାସ୍ଥ୍ୟ)ଙ୍କ ସହ କଥା ହୋଇଛନ୍ତି । କମ୍ପାନୀ ଦ୍ୱାରା ଉତ୍ପାଦିତ କଫ ସିରପ ପ୍ରସ୍ତୁତ ପାଇଁ ମଞ୍ଜୁରୀ ପ୍ରଦାନ କରାଯାଇଥିଲା ହେଲେ ଏହା ଦେଶରେ ବିକ୍ରି ହେଉ ନ ଥିଲା । ଯାହା ବି କାର୍ଯ୍ୟାନୁଷ୍ଠାନ ନେବା କଥା ତାହା ସିଡିଏଲ ରିପୋର୍ଟକୁ ନେଇ ନିଆଯିବ ।
