ଭୁବନେଶ୍ୱର, ୧୧।୧୦(ବ୍ୟୁରୋ): କୋଭିଡ୍ ନିୟମ ଉଲ୍ଲଂଘନ ଅଭିଯୋଗରେ ବିଏମ୍ସି ଅଧିକାରୀ ଭୁବନେଶ୍ୱର ଏମ୍ପିଙ୍କ ଦଳୀୟ କାର୍ଯ୍ୟାଳୟକୁ ଶନିବାର ସିଲ୍ କରିବା ପରେ ଅପରାଜିତା ଷଡ଼ଙ୍ଗୀ ବେଶ୍ ପ୍ରତିକ୍ରିୟାଶୀଳ ହୋଇଛନ୍ତି। ଶାସକ ଦଳ ବିଜେଡି ଉପରେ ବର୍ଷିଛନ୍ତି। ସିଲ୍ ପରେ କାର୍ଯ୍ୟାଳୟ ବାହାରେ ଏକ ଖବରଦାତା ସମ୍ମିଳନୀରେ ବିଜେଡି ନେତା ଓ ମନ୍ତ୍ରୀ କୋଭିଡ ନିୟମ ଉଲ୍ଲଂଘନ କରିଥିବା ଅପରାଜିତା ପାଲଟା ଅଭିଯୋଗ କରିଛନ୍ତି। ବିଜେଡି ନେତାମାନେ ନିୟମ ଉଲ୍ଲଂଘନ କରିଥିବାର ୧୭ଟି ଫଟୋ ଓ ଗୋଟିଏ ଭିଡିଓକୁ ଦେଖାଇଛନ୍ତି। ଏଥିସହିତ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେବେ ଏହି ନେତାମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ଅପରାଜିତା ପ୍ରଶ୍ନ କରିଛନ୍ତି। ସ୍ବର୍ଗତ ବିଜେଡି ବିଧାୟକ ପ୍ରଦୀପ ମହାରଥୀଙ୍କ ଅନ୍ତ୍ୟେଷ୍ଟି କାର୍ଯ୍ୟକ୍ରମରେ କୋଭିଡ୍ ପଜିଟିଭ୍ ହୋଇଥିବା ବିଜେଡି ନେତା ଏବଂ ମନ୍ତ୍ରୀଙ୍କ ଯୋଗଦାନ, ବିଜେଡି କାର୍ଯ୍ୟାଳୟରେ ରକ୍ତଦାନ ଏବଂ ତିର୍ତ୍ତୋଲରେ ବିଜେଡି ନେତାଙ୍କ ରାଜନୈତିକ ସଭାରେ ଖୋଲାଖୋଲି ନିୟମ ଉଲ୍ଲଂଘନ କରାଯାଇଛି। ଏନେଇ ସେ ମୁଖ୍ୟମନ୍ତ୍ରୀଙ୍କୁ ଚିଠି ଲେଖି ସମସ୍ତ ପ୍ରମାଣ ଯୋଗାଇଦେବେ ବୋଲି କହିଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିର୍ଦ୍ଦେଶକ୍ରମେ ସେ ସାଧାରଣ ଲୋକଙ୍କ ସମସ୍ୟା ବୁଝୁଛନ୍ତି। ତାଙ୍କ କାର୍ଯ୍ୟାଳୟକୁ ବିଏମ୍ସି ୧୫ ଦିନ ପାଇଁ ସିଲ୍ କରିଛି, ତା ସତ୍ତ୍ୱେ ସେ କାର୍ଯ୍ୟାଳୟ ବାହାରେ ତାଙ୍କ ସେବା ଜାରି ରଖିବେ ବୋଲି ଏହି ଅବସରରେ କହିଛନ୍ତି। ଅପରପକ୍ଷରେ ଅପରାଜିତାଙ୍କ ଏଭଳି ଅଭିଯୋଗ ପରେ ବିଜେଡି ପ୍ରତିକ୍ରିୟା ରଖିଛି। କୌଣସି କୋଠାକୁ ସିଲ୍ କରିବା ନିଷ୍ପତ୍ତି ସମ୍ପୂର୍ଣ୍ଣ ପ୍ରଶାସନିକ ବୋଲି ଦଳୀୟ ମୁଖପାତ୍ର ସୁଲତା ଦେଓ କହିଛନ୍ତି। ସାଧାରଣ ଲୋକଙ୍କ ଧନ ଜୀବନର ସୁରକ୍ଷା ଦୃଷ୍ଟିରୁ ପ୍ରଶାସନ ପକ୍ଷରୁ ଅତୀତରେ ସମଗ୍ର ରାଜ୍ୟରେ ଅନେକ କୋଠା, ହୋଟେଲ ଆଦିକୁ ସିଲ୍ କରାଯାଇଛି। ଲୋକଙ୍କ ସ୍ବାର୍ଥ ଦୃଷ୍ଟିରୁ ଆଗାମୀ ଦିନରେ ଆବଶ୍ୟକ ପଡିଲେ ମଧ୍ୟ ଏଭଳି ସିଲ୍ କରାଯିବ। ଭାଜପା, ବିଜେଡି, କଂଗ୍ରେସ କିମ୍ବା ଅନ୍ୟ କୌଣସି ରାଜନୈତିକ ଦଳକୁ ଦେଖି କରୋନା ସଂକ୍ରମିତ କରେ ନାହିଁ। ଏହା ହେଉଛି ମାନବିକତା ଏବଂ ଆମେ ସମସ୍ତେ କୋଭିଡ୍ ନିୟମ ମାନି ଏହି ମହାମାରୀ ବିରୋଧରେ ଲଢେଇ କରିବାର ଆବଶ୍ୟକ ରହିଛି ବୋଲି ଦେଓ କହିଛନ୍ତି।
